MEDIAONETIMOR- Maske seidauk iha lista ba Membru VII Governu Koligasaun minoridade iha ministerial sira, maibé tuir planu Prezidente Repúblika (PR) Frncisco Guterres Lú Olo sei fo posse deit ba Primeiru Ministru (PM) Dr. Mari Bin Amude Alkatiri iha Palasiu Nobre, Lahane, Sesta, (15/09/2017).
Antes fo posse, PR Lú Olo ofisialmente anúnsia lista kandidatura PM VII Governu Lejislatura, Dr. Mari Bin Amude Alkatiri ne’ebé maka antes ne’e Partidu koligasaun minoridade Fretilin no Partidu Demokratiku (PD) hato’o ona.
Lia tu’un ba jornalista iha Palasiu Prezidente, Kinta, (14/09/2017), PR Lú Olo iha konferensia imprensa hateten, hafoin rona tiha relatoriu no desizaun lista kandidatura koligasaun ninian maka PR hola nia kompetensia anunsia Dr. Mari Bin Amude Alkatiri para atu sai PM.
“Tuir Partidu Koligasaun no mos desizaun ne’ebé maka sira hola hodi asina akordu hamutuk maka sira indizita Dr. Mari Bin Amude Alkatiri para atu sai PM VII Governu Koligasaun,” dehan PR Lú Olo.
Ba públiku no povu TL PR Lú Olo fo hatene katak, iha loron Kuarta, (13/09/2017) maizu menus tuku 12:30 OTL, koligasaun Fretilin ho PD mai aprezenta kandidatu ba kargu PM VII Governu Koligasaun.
PR Lú Olo esplika liutan, hahu hosi momentu ida ne’ebé Partidu koligasaun mai aprezenta kandidatu ba kargu PM ninian, PR hola nia kompetensia tuir Konstituisaun para nomeia PM ne’ebé Partidu koligasaun indizita.
Nune’e, PR Lú Olo afirma hodi hola nia kompetensia Konstitusionais tuir Artigu 106 no 85 alinea D nian, PR nomeia Dr. Mari Bin Amude Alkatiri atu sai PM ba VII Governu Konstitusional liu hosi dekretu PR nian.
“Hau husu ba sidadaun no povu TL tomak para atu bele hakmatek nafatin. Lakleur deit PR sei fo pose ba VII Governu Konstitusional,” husu PR Lú Olo.
Tuir planu iha Loron Sesta, (15/09/2017) PR Lú Olo sei fo nia deskursu ofisial ba dahuluk nian iha uma fukun Parlamentu Nasional. Hafoin iha parte lorokraik kontinua fo posse ba PM VII Governu Koligasaun Minoridade, Dr. Mari Bin Amude Alkatiri iha Palasiu Nobre, Lahane.
Maske nune’e to’o tomada pose PM VII Governu Koligasaun Minoridade seidauk iha lista ba membru governu nian.
“Depois PR nomeia tiha PM, no PM halo negosiasaun para forma Governu. Emprinsipiu esforsu tomak tenki halo para Loron 15 Setembru 2017 lorokraik forma governu. Hosi PR husu para semana ida ne’e tenki iha ona formasaun governu foun,” katak Sekjer Fretilin, Mari Bin Amude Alkatiri iha Comite Central Fretilin (CCF).(Reportájem Deonisio da Cruz)
Ita nia komentariu konaba post ne'e.