Nova Iorke (www.mediaonetimor.co) – Alterasaun klimátika kontinua agrava dezafiu sira dezenvolvimentu nian ne’ebé nasaun sira Estadu Illa Kiik Dezenvolvidu Sira (SIDS) nian enfrenta tanba illa balun lakon kauza hosi subida nível tasi nian maka líder sira hosi Aliansa Estadu Illa Kiik Dezenvolvidu atu unidu no iha espíritu solidariedade forte hodi enfrenta ne’e.
“Ami-nia dezafiu sira boot loos, maibé ami forte. Hamutuk, ita forsa liu problema ne’ebé ita enfrenta. Ami fiar, ami unidu iha solidariedade, ami bele servisu hamutuk ho koletivamente atu transforma ajenda internasionál hodi proteje ami-nia direitu no interesse sira no ami proteje dezenvolvimentu ida sustentável ne’ebé respeita prinsípiu sira Responsabilidade Komún, maibé Diferente no ida-idak iha ninia kapasidade.”
Hatete Primeiru-Ministru (PM), Kay Rala Xanana Gusmão liu Komunikadu Imprensa ne’ebé Media ONE Timor simu iha loron Tersa, (24/09/2024) katak PM enkoraza ne’e iha diskursu reuniaun líder sira Aliansa Estadu Illa Kiik Dezenvolvidu sira perante Sessaun 79 Assembleia Jerál Nasaun Unidas nian iha, Third Avenue, Nova Iorke, Segunda (23/09/2024).
Iha intervensaun, Xanana Gusmão hateten, dékada tolu resin iha pasadu, komunidade internasionál rekoñese dezafiu sira jeográfiku no situaionál úniku ne’ebé Estadu Illa Kiik Dezenvolvidu Sira (SIDS) enfrenta.
Realidade ida-ne’e reafirma fila-fali ho forma konsistente, la’ós de’it iha konferénsia sira multilaterál nian, maibé mós iha instrumentu sira internasionál nian ne’ebé jurídikamente vinkulada.
Maibé, implementasaun bá kompromissu sira ne’ebé nesessáriu tebes atu apoia nasaun sira SIDS nian kontinua seidauk sufisiente.
Katak PM Xanana, alterasaun klimátika kontinua agrava dezafiu sira dezenvolvimentu nian ne’ebé nasaun sira SIDS nian enfrenta. Balun hosi Estadu Illa Kiik Dezenvolvidu sira, enfrenta konsekuénsia terríveis tanba illa balun lakon kauza hosi subida nível tasi nian.
Timor-Leste apoia plenamente deklarasaun hosi Líder sira AOSIS nian kona-bá Subida Nível Tasi nian ho Soberania Estatál.
Nune’e mós, Timor-Leste lian ida hamutuk ho Aliansa ne’e atu apela bá kriasaun mekanizmu finanseira foun ida ne’ebé benefisia nasaun hotu-hotu SIDS nian ho forma ekuitativa, partikularmente sira ne’ebé vulnerável liu.
“Ita mós garante katak nasaun dezenvolvidu sira kumpre sira-nia responsabilidade, tuir duni direitu internasionál, atu apoia ita-nia objetivu dezenvolvimentu sustentável, respeita ita-nia direitu atu dezenvolve ita-nia rekursu sira no defini ita-nia dezenvolvimentu rasik.Timor-Leste apoia kompletamente implementasaun ABAS,” Primeiru-Ministru ne’e deklara.
Xanana mós konta katak, horisehik partisipa iha Simeira Kona-bá Futuru no adopta “Paktu bá Futuru”. Timor-Leste espera katak Paktu ida-ne’e sei iha duni forsa no kapasidade atu hakotu abordazen sira ne’ebé inkonsistente iha sistema internasionál atuál ne’ebé komplikadu no proporsiona kuadru ida realista-liu atu enfrenta situasaun diversa no komplexa ne’ebé nasaun sira AOSIS enfrenta.
“Ita hamutuk bele kontinua ezije futuru ida ne’ebé justu, ekuitativu no sustentável, iha ne’ebé laiha nasaun ida mak hela iha kotuk,” Xanana subliña. (Asesu Youtube/Facebook https://www.facebook.com/Media1Timor Media ONE Timor)
Ita nia komentariu konaba post ne'e.