(Reportajen Jornalista Media ONE Timor- Iria da Cunha/Marquita Freitas)
Dili (www.mediaonetimor.co) – Promove joven Timoroan sira atu kria servisu ba sira nia an rasik no haluan oportunidade bele ba servisu iha rai liur, maka hamutuk ema besik nain 400 tuir formasaun kona-ba emprendedorizmu hodi oinsá atu harii negósiu sira iha Timor-Leste.
Tuir reprezentante Sekretáriu Estadu Formasaun Profisionál no Empregu (Sefope), Cesaltino de Jesus Guterres no Diretór Sentru Formasaun Grace for Development (GFD), Hilário Gusmão Fraga ba jornalista sira iha Salaun Balide, Sesta, (14/02/2025), hafoin remata serimonia abertura hatete, formasaun ne’e atu hasa’e kuñesementu emprendedorizmu nian hodi kria servisu ba an rasik.
Formasaun emprendedorizmu ne’ebé fó husi Sefope, liu husi diresaun nasionál empregu no temporáriu emprendedorizmu ba formandu sira husi Sentru Formasaun Grace For Development (GFD) partisipa husi Timoroan besik nain 400 iha Salaun Balide.
Esplika husi reprezentante Sefope, Cesaltino de Jesus Guterres ba jornalista katak, alvu ba formandu Timoroan sira ne’e maka hirak ne’ebé mai sentru formasaun, finalista ensinu sekundáriu no balun seluk mai husi tékniku vokasionál sira.
“Ami-nia alvu ne’e ba formandu sira husi sentru formasaun no mós finalista husi ensinu sekundáriu no mós tékniku vokasionál sira, liu-liu ba programa sira neʼebé mak liga ho sira-nia nesesidade hanesan emprendedorizmu”, Cesaltino dehan.
Reprezentante Sefope ne’e hatutan, programa auto empregu ne’e nia alvu mak formandu sira gradua ona husi sentru formasaun sira atu bele eleva sira-nia abilidade hodi kria servisu ba sira-nia an rasik.
Iha sorin seluk tuir Diretór Sentru Formasaun GFD, Hilário Gusmão Fraga reforsa tan prezensa Sefope hodi dehan, prezensa Sefope iha ne’e atu hato’o sira-nia papél ba joven sira kona-ba negósiu no mós kampu traballu. Inklui, oinsá atu bele bá servisu iha rai-li’ur, hanesan iha Nasaun Koreia no Nasaun viziñu Austrália.
“Formasaun ne’e fó oportunidade ba joven Timoroan hirak ne’ebé mak mai atu aprende iha sentru formasaun. Ho formasaun ne’e klaru katak Sefope mai hato’o nia papél ba joven sira. Liu-liu kona-ba kria kampu traballu no sira ne’ebé mak atu halo negósiu. Inklui ba hirak ne’ebé hakarak atu ba serbisu iha rai-li’ur”, Hilário tenik.
Entretantu matéria espesífika ne’ebé Sefope aprezenta bá iha formandu sira mak emprendedorizmu hodi oinsá atu harii negósiu sira. Husi materia ne’e, Sefope espera atu banhira remata formasaun ne’e, balun bele kria kampu traballu ba an rasik. No balun seluk bele ba serbisu iha rai-liur.(Asesu Youtube/Facebook https://www.facebook.com/Media1Timor Media ONE Timor)
Ita nia komentariu konaba post ne'e.