Dili (www.mediaonetimor.co) – Joventude, Estudante no labarik besik atus resin hamrik iha estrada hodi fó yel, yel ‘welcome’ ba Primeiru Ministru (PM) Australia, Anthony Albanese, MP nia vizita mai Timor-Leste iha loron 28 no 29 Janeiru tinan 2026.
PM Australia Anthony mai ho aviauan Royal Australia Air force to’o iha Aeroportu Internasionál Prezidente Nicolao Lobato maizu menus tuku 09:40 OTL no simu husi Prezidente Repúblika, José Ramos Horta, Primeiru Ministru Kay Rala Xanana Gusmão ho ministru IX Governu Konstituisionál sira seluk ne’ebé akompañya ho Parade Militar no mós dansa kulturál husi labarik Timoroan sira seluk.
Durante viajen husi Airoportu Internasionál Prezidente Nicolao Lobato mai Palasiu Prezidente Aitarak Laran, PM Anthony sae kareta moke Prezidente Ramos Horta nian. No eskoltu sira lao ain deit hamutuk ho estudante no joven sira seluk, mai to’o Palasiu Prezidente ne’ebé simu husi Drum band Colegio São Miguel, hafoin parade militar husi F-FDTL.
To’o iha Palasiu Prezidente Aitarak Laran hahú ho guarda de onra ne’ebe inisia ho Hino Nasionál nasaun Timor-Leste no Austrália nian akompaña ho tiru paison dala 17. No kontinua kedas ho inspesaun parada militar iha palasiu prezidensiál.
Durante iha enkontru ho PR Ramos Horta ne’e sei sai parte husi esforsu kontimunidade hodi hametin relasaun diplomátika, parsería estratéjika no amizade istórika entre Timor-Leste ho Australia.
Aliende ne’e mos tuir ajenda husi Palasiu Prezidensiál katak, enkontru ne’e mós hodi diskute asuntu estratéjiku sira ne’ebé relasiona ho koperasaun bilateral, desenvolvimentu sustentavel, seguransa rejionál no parsería iha área edukasaun, ekonomia no mudansa klimátika.
Sei nafatin husi ajenda ne’e katak, enkontru kortézia kontinua iha Salaun Prezidente Nicolau Lobato, ho partisipasaun delegasaun rua nian. Iha momentu ne’e, hala’o troka Prezente ofisiál, foto hamutuk no deklarasaun Simbolíka (Meet the Press) hodi reafirma komitmentu rua-nain ba relasaun amizade entre Nasaun Rua.
Ajenda kortejia Palasiu Prezidensial nian ne’e sei remata ho partida Onorável Primeiru-Ministru Australia hosi Palásiu Prezidensiál, marka enkontru diplomátiku. Enkontru Bilateral ida ne’ebé importante no estratéjiku ba futuru relasaun entre Timor-Leste no Australia. (Favor vizita https://m.facebook.com/story.php?story_fbid=1409025550920261&id=100083490724988&sfnsn=wa&mibextid=2Rb1fB)
Ita nia komentariu konaba post ne'e.