MEDIAONETIMOR-Timoroan hirak ne’ebé halibur a’an iha groupu Sidadaun Hadomi Paz (SHP) hala’o sorumutu hó Prezidente Repúblika, Francisco Guterres Lú Olo hodi husu atu uza kompetensia para akompañia prosesu formasaun VII governu konstituisional ne’ebé mak lao dadaun ne’e.
“Ami mai husu Prezidente Repúblika (PR) Lú Olo atu uza nia kompetensia nu’udar Prezidente Repúblika hodi akompaña prosesu ne’ebé lao daun-daun ne’e no oinsa maka bele hetan dalan alternativa ida diak ba formasaun governu foun.”
Haktuir reprezentante groupu SHP, atual Diretor Judicial System Monitoring Program (JSMP), Luis Sampaio ba jornalista hafoin remata hasoru malu hó PR Lú Olo iha Palasiu Prezidensial, Segunda, (14/08/2017).
Luis Sampio esplika liutan, Sidadaun Hadomi Paz (SHP) akompañia prosesu ne’ebé mak iha. Hanesan sidadaun, hotu-hotu iha responsabilidade atu fó hanoin ba orgaun soberania sira. Koalia hó politiku sira, saida maka diak ba nasaun no formasaun governu tuir mai.
Liu-liu hateten Luis Sampaio, groupu ka SHP buka meius hotu-hotu atu evita eleisaun antisipada. Nomós intrupsaun durante formasaun governu foun. Nune’e, tenki iha komunikasaun no dialogu entre lider politiku sira.
“Ho ida ne’e mak SHP hasoru malu hó PR hodi hato’o ami nia hanoin alternativa, saida mak diak liu ba ita nia nasaun,” katak Luis Sampaio.
Hatan bá preokupasaun SHP nian ne’e dehan Luís Sampaio, PR Lú Olo konfirma atu uja nia kompetensia hanesan PR tuir norma konstituisaun hodi halo dialogu aberta ka dialogu aprosimasaun ho lider sira atu hetan dalan ida ne’ebé mak diak ba opsaun sira ba formasaun gorvenu mai ne’e.
Sidadaun Hadomi Paz (SHP) mai hosi individu sira ne’ebé ho background oin-oin, hanesan; aktivista, media, igreja no akademista sira.(Reportájem Deonisio da Cruz)
Ita nia komentariu konaba post ne'e.