MEDIAONETIMOR– Atu hasa’e kualidade edukasaun iha Timor-Leste, entidades hotu-hotu tenki kontribui halo sosializasaun ba Timor-oan hanesan; jovem, alunus no inan-aman para le’e barak ba kualker siensia.
“Hosi ami nia parte nu’udar sosiedade sivil mós kontinua halo aprosimasaun ho entidades hotu-hotu atu koalia ba inan-aman sira no joven sira atu le’e barak. Nune’e tenki estuda lingua ne’ebé maka eziste. Lingua Tetum no Portugues.”
Lia hirak ne’e hato’o hosi Ko’ordenador National Civil Society Education Partnership Timor-Leste (CEPTIL), José de Jesus ba jornalista hafoin remata halo sorumutu ho Prezidente Repúblika (PR), Francisco Guterres Lú Olo iha Palacio Prezidente foin lalais ne’e.
Organizasaun hirak ne’ebé tau atensaun liu ba edukasaun; CEPTIL, Action for Change Foundation (ACF), Many Hands One Nation (MAHON), Institutu Matadalan Integrasido (IMI), Haburas Dezenvolve Talentu (HADEZTA), Feto Hadomi Familia (FHF), inklui mós Uniaun Nasional Professores (UNP) ba halo sorumutuk hó PR Lú Olo hodi hato’o perkupasaun dezemvolvimentu edukasaun iha TL.
José esplika liutan, organizasoens Sosiedade Sivil hirak ne’e servsu iha sétor edukasaun tinan barak ona nota katak ukun a’an tinan 16 ona kualidade edukasaun sei tún liu. Tanba, governu aloka Orsamentu Jerál Estadu (OJE) tinan-tinan ba dezemvolvimentu edukasaun minimu liu.
Hosi alokasaun OJE ba edukasaun ne’ebé minimu la-bele responde prekupasoens infrastrutura; escolar, biblioteka no livru sira iha area rumotas.
Iha parte seluk tuir repzentante sosiadade sivíl parte edukasaun nian ne’e katak, kualidade edukasaun ne’ebé minimu hetan mós influensia hosi la-iha interese no komitmentu Timor-oan atu le’e barak.
Hatan perkupasaun hirak ne’e PR Lú Olo promote sei ajuda hatutan lian sosiadade sivil nian ba públiku, governu atual, governu foun para iha komitmentu ba dezemvolvimentu setor edukasaun.
“PR Lú Olo iha komitmentu atu dezemvolve sétor edukasaun. Nune’e nia husu ba hotu-hotu atu partisipa masimu hodi atinzi kualidade edukasaun ba ema hotu iha TL. No PR Lú Olo mós sei hato’o rekomendasaun ba Parlamentu Nasionál atu halo lei ne’ebé adekuadu no diak ba sosiedade TL,” hateten José.(Reportajem Deonisio da Cruz)
Ita nia komentariu konaba post ne'e.