DÍLI (Media ONE Timor)-Tanba impasse politika desde tinan 2017 to’o 2020 mós seidauk hotu, afeita ba dezemvolvementu rekursu umanu iha instituisaun Falintil-Forsa Deveza Timor-Leste (F-FDTL).
“Impase politika naruk, ita labele kumpri tinan ida ne’e ba planu estratejiku tuir kadernu tinan 2020 ne’ebé efetivus tuir estimativa instituisaun nian hamutuk nain 3.600,” hateten Xefi Estadu Major Jeneral (Majen) Lere Anan Timur iha nia deskursu Selebrasaun Loron Falintil ba dala 45, Kuartel Jeral F-FDTL, Kinta, (20/8/2020).
Majen Lere esplika liutan, hafoin Falintil nakfilak a’an ba F-FDTL, iha loron 2 Fulan Fevereiru 2002 to’o ohin loron iha duni dezemvolvimentu satisfatoriu iha setores hotu-hotu maske hasoru difikuldades barak.
Husi parte rekursu umanu ne’ebé naton katak Majen Lere, Enjenaria F-FDTL fo ona apoiu ba TL iha kualker tempu. Hanesan, Enjinaria F-FDTL kompleta estrutura no fasilidade saúde nian ba kuarentena no izolamentu atu simu pasiente kovid19.
“Ho númeru efetivu ne’ebé to’o tuir planu F-FDTL bele kumpri mós ninia komprimisiu internasionais hodi kuntribui ba operasaun paz iha nasaun unidas nia mahon. Tanba ne’e presiza hasa’e kualidade rekursu umanu iha membru F-FDTL,” katak Lere hodi hatutan.
Hafoin liu tiha impase politika F-FDTL sei kumpri didi’ak ninia kna’ar tuir konstituisaun RDTL haruka mak hanesan; garante independensia nasionál, integridade teritorial, liberdade no garante mós populasaun nia seguransa.
Eis Komandante Rejiaun Pontaleste ne’e esplika, prezija kapasita nafatin rekursu umanu ba kadastes sira atu nune’e fortifika liutan servisu hamutuk ho parseru internasionais liu husi fornasaun no treinamentu ba efetivus sira.
“Hau hamutuk ho forsa efetivus sira hato’o agradese ba país belun Estadus Unidus Amerika, Portugal, Australia, Indonesia, Nova Zelandia, Malaysia, China no Japaun ne’ebe apoiu ona formasaun no kapasitasaun rekursu umanu ba efetivus F-FDTL,” hateten Majen Lere.
Kona-ba infrastrutura Lere fo agradese ba Australia ne’ebé apoiu hari’i instalasaun ba espesialidade enjinaria nian no formasaun Lingua Inglesh iha Metinaro. Agradese mós Republika Popular China ne’ebé konstrui ona edifisiu Kuartel Jeral F-FDTL no Bairu Militar iha Metinaro.
Ezizi Estatutu Natureza Militár
Iha parte seluk Lere ne’ebé asumi kargu Xefi Estadu Major Jeneral ba dala tolu ona ne’e husu atensaun ba estadu no governu konaba veteranus Falintil ne’ebé sei ativu iha F-FDTL la kontenti ho moris ne’e.
Tanba tuir Lere, laiha justisa kona-ba sira nia estatutu no direitu ne’ebé sira merese. Veteranus Falintil-FDTL sira ne’ebé uluk funu durante tinan 24 nia laran ba independensia nasionál hetan tratamentu hanesan fali funsionariu públiku bai-bain de’it.
Situasaun sai a’at liu hatutan Lere, wainhira veteranus Falintil ne’e reforma husi Falintil-FDTL. Ema la tau matan ba sira. No haluha tiha sira nia esforsu nomos sakrifisiu ba hari’i nasaun TL. Tanba ne’e forsas armadas lolos iha estatutu espesial ida ho nia natureza militar.
Lere reforsa liutan, koalia kona-ba osan operasionál ka perdiem. Funsionariu públiku hetan U$40.00, soldadu F-FDTL hetan deit U$10.00. “Ne’e la justu. Veteranus sira ne’ebé to’o ohin loron sei servisu iha instituisaun F-FDTL, ita konta lolos sira halo servisu tinan 44 servi estadu,” katak Lere ho intonasaun husu atensaun ba estadu no governu.
Majen Lere husu ba nai ulun sira ne’ebé aproveita impase politika hodi taka matan ba asuntu injustisa ba veteranus Falintil ne’e, atu tahu ona konsiderasaun. Sei ohin loron Nasaun TL estavel, tanba kuntribuisaun bo’ot husi lider ístoriku hamutuk ho veteranus Falintil ne’ebé luta hodi defende soberania rai ida ne’e.
Majen Lere relata, selebrasaun loron Falintil ba dala 45, espesial liu. Tanba mundu tomak inklui TL, luta hasoru moras pandemia Kovid19. Nune’e, selebra tuir orsamentu duadesimu ne’ebé aloka ona.
Sente Deskriminadu
Lia fuan hanesan mai husi Veteranus Falintil, Bernardino de Cristo alias Teki Timor. Iha ninia intervista ba Jornalista, Teki Timor husu ba governu nu’udar ezekutador Estadu RDTL atu halo planu dignu ba moris Veteranus Falintil ne’ebé luta durante tinan 24.
“Iha Konstituisaun RDTL, artigu 11, alinea a,b,c, hateten momos ona. Mas durante ne’e ita la atensaun ba artigu refere. Nune’e ohin ita mai hatudu fila fali ba governu atu estuda didi’ak hodi halo planu atendementu.
Tanba durante ne’e barak sente deskriminadu husi programa governu,” tenik Teki Timor.
Veterana Organização Popular Mulher de Timorense (OPMT) iha tinan 1975, ho naran kodiku Soimali reforsatan, Falintil nu’udar kulit, isin lolon ka lutu ba nasaun nian. Maibé ohin loron barak mak seodauk hetan atendementu diak husi estadu no governu.
Iha sorin seluk Xefi Estadu Major F-FDTL Calisto dos Santos alias Coliati esplika, selebra loron Falintil ba dala 45, F-FDTL hamatuk ho Ministeiru asuntu Veteranu no Konsellu Veteranus hala’o atividade lima.
Halo atividade Tour hadulas munisipiu 12. Hala’o mini seminariu iha Kuartel Jeral ho tema konsolidasaun estratejia tasi nian. Misa agradesimentu iha Igreja Santo Antonio Motael no parada miltár.(Formandu Ceftec Juvenal de Araújo)
Ita nia komentariu konaba post ne'e.