DÍLI (Media ONE Timor) – Tanba sistema Administrasaun Governu Timor-Leste (TL) nian ne’ebé domina husi desijaun politika, difikulta jornálista sira atu hetan konfirmasaun informasaun ne’ebé balansu iha notísia.
“Dala barak ami nia jornálista hakarak halo konfirmasaun konaba isu ne’ebé deskute hela iha komunidade nia leet, sempre hetan resposta katak direitu ministru mak koalia. Marka audensia tiha, ba konfirma dehan ministru tempu laiha, no rajaun seluktan hodi hases a’an husi intervista ho jornálista.”
Lia fuan ne’e keisa husi Xefi Redasaun Diáriu Independente, Jorgino dos Santos wainhira simu Formandu Centro Formação Técnico Comunicação (Ceftec) unidade hakerek imprensa iha salaun enkontru Independente, Kinta, (01/10/2020).
Formandu Ceftec unidade hakerek imprensa ne’ebé delega husi estudante finalista universitariu no funsionariu relasoens públikas governu nian ne’e, halo vizita ba da-toluk iha Diáriu Independente, simu husi Xefi redasaun no koordenador kobertura, Jacinto Xavier.
Xefi Redasaun Diáriu Independente, Jorgino esplika, iha TL servisu administrasaun governu nian domina ho intervensaun politika mak obriga jornálista tenki hikis kosar to’o mate. Duni tuir lider sira hodi izmola dadus. Maske nune’e, dala barak lahetan
Jorgino konfesa, média ofisiais barak maka la-intende servisu jornalizmu nian hodi difikulta asesu dadus. Kazu konkreta, Diáriu Independente públika notísia konaba desizaun Ministru Justisa nian.
“Média office mai diretamente iha ami nia fatin. Hasai lia fuan ‘mal’ ba ami. Dehan ami servisu lahatene. Presiza aprendetan. Hafoin ne’e, sira halo direitu ba resposta, uza lian Portugues. Depois haruka ami tradus. Ne’e servisu kumplikadu liu,” esplika Jorgino.
Dehan Jorgino, husi dezintendementu ne’e nu’udar lalenok ba parte hotu-hotu atu hadia a’an ba kualidade dezminasaun informasaun. Sira ne’ebé servisu iha média ofisiais sira tenki iha kuñesementu klean konaba regulamentu liberdade imprenssa nomos liberdade ba expresaun.
Iha parte seluk Jorgino aprezenta servisu jornalista iha Diáriu Independente. Nia hateten, jornalista sira fahe tuir aréa; ekonomia, edukasaun, saúde, justisa, desportu no politika. Hafon halo kobertura, mai hakerek notísia iha sala redasaun.
Maibé ho pandemia covid19 hodi implementa estadu emerjensia katak Jorgino, deside ativa iha WhatsApp (WA) deit hodi hafasil ekipa redasaun haruka planu kobertura nomos notísia.
Hatan pergunta formandu Ceftec konaba preparasaun rekursu umanu hasoru globalizasaun internet, Jorgino rekuñese média sosiais dala ruma lais liu. Jornalista repete deit. Tanba defisil hasoru fontes ne’ebé maioria membru governu.
Média Ofisiais La Perkupa
Husi parte seluk Koordenador kobertura Jacinto Xavier afirma, jornálista Independente sira ba halo kobertura tuir fatin destakadu ho asuntu ne’ebé deside ona. Tanba asuntu protokoler maka jornálista sira tenki marka audensia halo intervista.
Katak Jacinto, marka tiha tempu laiha resposta husi média ofisiais sira. Hein to’o semana no to’o fulan. Ba konfirma, razaun seidauk iha despaisu. La telephone, ka hatudu dalan halo intervista ho metodu seluk. To’o isu ne’e mate tiha deit. La hetan feedback husi informasaun sira ne’ebé públika ona.
“Ami presija kooperasaun diak husi maluk média officer sira. Ligadu ho fontes ne’ebé ami presija halo konfirmasaun ba informasaun públikadu. Dala ruma Ministru balun protesta ba notísia la balansu. Maibé ne’e faillansu média ofisiais nian,” tenik Jacinto.
Hatutan Jacinto, ministru balun fo sala média no jornálista hakerek notísia laiha dadus. Ne’e tanba maioria membru governu no sekretariu estadu sira koalia la aprezenta dadus konreta.
“Servisu média ofisiais sira hodi rekolla no prepara dadus ba ministru no sekretariu estadu, kuandu asuntu ki’ik ka bo’ot ministru ka sekretariu estadu maka tenki fo sai ba públiku. Dalan seluk maka tenki organiza konferensia imprensa rutinitas,” sujere Jacinto.
Desijaun Politika Nia Impedementu
Formadora Ceftec unidade hekerek imprensa, Suzana Cardoso ne’ebé sempre akompanya iha vizita ba edifisiu média emprimi sira hateten, husi vizita ne’e hodi fo kuñesementu ba formandu Ceftec sira konaba lalaok servisu iha jornais sira.
Aliende ne’e katak Suzana, formandu sira ne’ebé mai husi funsionariu públiku iha relasoens públikas no estudante universitariu sira mai hodi rona diretamente perkupasoens wainhira hasoru fontes iha ministeriu no sekretariu estadu sira hodi halibur dadus no faktus.
Katak Suzana, formandu sira hetan ona formasaun no praktika halo intervista, hakerek notísia, foto jurnalizmu, hakerek karta diretu ba resposta, hakerek komunikadu imprensa no oinsa organiza konferensia imprensa.
Maibé hatutan Suzana, husi esperensia fo formasaun iha ceftec desde tinan 2008 no fo formasaun diretamente ba servisu relasoens públikas iha ministeriu balun, prosesu dezminisaun informasaun depende ba lideransa masimu nia desijaun politika.
“Balun hafoin remata formasaun fila ba servisu fali iha fatin seluk. Balun seluk hasoru difikuldade, kuandu ministru ka sekretáriu estadu mai ho pakote husi partidu nian, political appointment,” tenik Suzana hodi hatutan.
Nune’e sira ne’ebé hetan ona formasaun labele implementa sira nia matenek. Tanba, servisu relasaun média nian intrega hotu ba asesor ka political appointment sira. Ambiente média ne’ebé sempre iha mudansa, sei difikulta sira ne’ebé mai ho esperensia diferente ba ligasaun jornálizmu nian.
Atu hetan dadus ne’ebé serteza, maka jornalista senior ne’e husu ba Kompaña média sira, inklui Diáriu Independente atu kapasita jornálista ho diak liutan. Uza kompetensia hodi tulun governu hasae kualidade edukasaun ba futuru hakerek nain ne’ebé kualidade.
Vizita formandu Ceftec ba Diáriu Independente, hakotu ho halo vizita ba departementu redasaun no departementu negosiu nian. Ba emprimi jornál, Diáriu Independente sei aluga emprimi ida iha Fomentu.(Reportájem Formandu Ceftec Juvenal de Araujo/Manuel do Régo-Editor Suzana Cardoso)
Ita nia komentariu konaba post ne'e.