KI Lansa Manual Reportajen Bazeia Ba Violensia Jeneru

(Reportajen Aniceto Dos Santos, Evania da Silva/Editora Suzana Cardoso)

DILI (Media ONE Timor) – Violensia sai problema tiha ona. Violensia bazeia ba jéneru, nu’udar kestaun ne’ebé sosiedade barak infrenta. Nune’e, manual reportajén bazeia ba violensia jeneru hanesan matadalan ba Jornalista nia kobertura hodi ajuda muda sosiadade nia hanoin.

“Manual ne’e sai hanesan matadalan ba Jornalista, atu redús maneira hanoin. Katak, violensia bazeia ba jéneru laos buat bai-bain. Ne’e moras sosiedade ida. Maka jornalista mós hanesan autór ba transformasaun sosial tenki kontribui atu muda sosiedade nia hanoin ne’e”.

Hateten Prezidente Konsellu Imprensa (KI), Virgilio Guterres alias Lamukan ba Jornalista iha nia knaar fatin, hafoin remata lansamentu manual reportajen bazeia ba violensia jeneru.

Nia esplika liutan, Jornalista tenki iha intendimentu ne’ebé kle’an no komprensaun ne’ebé natoon kona-bá asuntu ne’e, hafoin deside hodi fokus ba anglu ne’ebé maka mai tenki reprezenta sosiedade.

Mazmu dala barak vitima sira hili lakohi atu koalia tanba sosiedade patriakal, maka haktuir Lamukan, dalaruma sosiedade ladun konsidera problema ne’e. Maka KI hanesan orgaun Estadu ida ne’ebé hari’i atu supervizaun ba mídia no ba jornalistika, espera madalan ne’e parte husi kapasitasaun ba jornalista sira.

Lamukan hateten, kapasidade atu intrepreta asuntu ida intelektualmente presiza referensia. Manual ne’ebé produz sei kapasita jornalista sira hodi produz notísia ne’ebé bazeia ba violasaun jeneru ho kualidade ne’ebé aas.

“Manual iha ona. Konsellu Imprensa sei fo ba ema ida-idak. No husu para jornalista sira lee terminolojia sira. Hatene konseitu sira. Bainhira la komprende iha formasaun ruma kontinua levanta ita diskute”, katak Lamukan hodi hatutan.

Iha kódigu étika Jornlizmu pontu 5 no 7 ko’alia kona-ba jéneru. Oinsa respeita ema sira ne’ebé envolve iha violensia sexual. Nune’e, kobertura sira laos deit ba akontese, maibé tenki tuir to’o tribunal ka lae, inklui to’o desizaun se mak sala no se mak los.

Livru Reportajen Kona-bá Violensia Bazeia Ba Jéneru no matadalan ba Jornalista ne’e hakerek liu tinan ida–resin, hahú hosi foti dadus, halo peskiza, elaborasaun hakerek no design to’o ninia lansamentu, tanba kooperasaun KI ho UNDP Timor-Leste.

Iha parte sorin seluk Autór Nungro Cassunkana hatete, objetivu hakerek livru ne’e nu’udar matadalan ba Jornalista atu halo kobertura kona-ba violensia jéneru ne’ebe mak akontese iha Timor Leste ne’ebé ninia numeru aas liu, tanba relasaun tempu pasadu.

Katak Nungro, iha tinan uluk sistema patriakal no sistema koloniál la favorese ba feto. Tempu okupasaun Indonezia Militar sira halo violasaun barak ba feto. Violensia ne’e lao lorloron, ema abitua ona. Susar atu halakon.

Prosesu hakerek katak Nungro esplika, hahú peskiza no hakerek iha Fulan Janeiru 2020. Estuda mós referensia barak husi nasaun seluk. Matadalan Jornalista ne’ebe halo Europa, Afrika, Amerika Latina no Asia rasik. Estuda mós estuda relatoriu violesia ba jéneru TL nian rasik. Inklui, relatoriu UN no relatoriu sira seluk kona-ba violensia jéneru.

Autór ne’e dehan, Jornalista nia servisu maka fó naroman ba povu kona-ba saida mak akontese iha TL ka mundu. Maka Jornalista, lorloron tenki estuda. Jornalista maka intelektual ninia servisu. Intelektual ne’e servisu kakutak nian tenke estuda kualker asuntu.

Aliende ne’e tuir Embaixadór Uniaun Europeia (UE) iha TL, Andrew Jacobs hateten, labele fó kulpa ba vitima sira husi violensia kontra feto no labarik feto. Ne’e hanesan kulpadu ba krime. Jornalista tenke halo reportajen loloos kona-ba krime violensia hasoru feto no labarik feto.

Haktuir Andrew Jacobs kontenti Jornalista koñese liu halo reportajen kona-ba violensia hasoru feto ho labarik feto. KI mos ho inisiativa halo spotlight ho Nasoens Unidas dzsde tinan tolu iha ámbitu violensia kontra feto no labarik.

“Ami kontente haree iha diferensia. Ami ko’alia iha sosiedade TL kona-ba problema violensia. Tinan lima liu ba ami la ko’alia barak kona-ba violensia kontra feto no labarik. Inportante sosiedade aseita ka problema eziste. Liuhusi programa spotlight aumenta vizivilidade ba problema ho Jornalista sira iha papél inportante aumenta komprensaun ba problema aktu kombate ho susesu”, Andrew Jacobs dehan.(Asesu You Tube/Facebook Media ONE Timor)