Modalidade 5 Preparadu Ba Kompetisaun Jogu AUG

(Reportajen Jacinto Caet/Editora Suzana Cardoso)

DILI (Média ONE Timor) – Hamutuk atleta na’in 30 hosi modalidade lima mak sei reprezenta kontijente Timor-Leste hodi ba tuir kompetisaun jogu Asean University Games (AUG).

Esplika Prezidente Federasaun Desportu Akademika Timor-Leste (FDA-TL), Zeferino Veigas Tilman ba Media ONE Timor iha knar fatin kampus sentral UNTL, Kuarta (15/06) katak, daudaun ne’e sira halo hela preparasaun para kompete iha jogu AUG ne’ebé sei hala’o iha Thailandia tinan 2022.

Katak Zeferino, kontijente Timor-Leste sei haruka atleta hosi modalidade; Taekwondo, Atletizmu, Foot-ball, volley-ball praya no Xadrez ba kompetisaun ne’ebé sei hala’o iha Thailandia.

“Husi modalidade lima ne’e halo ona selesaun final ba atleta sira. No daudaun ne’e sira prepara intensivu tebes tanba falta de’it loron 42 ona kompetisaun ne’e atu hahú”, katak Zeferino hodi hatutan.

Husi modalidade football hamutuk atleta na’in-18, volleyball praya na’in haat, Xadrez na’in haat, atletizmu na’in rua no taekwondo na’in rua. Hamutuk atleta na’in 30 mak reprezenta kontinente Timor-Leste hodi partisipa eventu refere.

Durante preparasaun Zeverino dehan, karik atleta balun iha mundansa liliu liga ho atleta sira nia saude maka tuun derepente, atleta seluk bele subtitui. Maske nune’e, daudaun ne’e, atleta sira prepara iha ida-idak nia fatin, antes FDA-TL tau hamutuk atleta sira iha kajerna hodi prepara di’ak liu tan.

Zeferino informa, FDA-TL halo ona komunikasaun ho Governu TL hodi apoiu orsamentu kuaze 190 Mill ital. USD. Husi total orsamentu ne’e sei fahe ba kada ekipa. Ekipa Football sei hetan osan boot liu. Tanba ekipa boot. Hamutuk; atleta na’in 18, total ho ekipa tékniku kuaze na’in 22.

“Ita mos komunika ho komisaun organizadora iha Thailandia hodi apoiu kontijente Timor-Leste iha parte balun liuliu bele hatun ba kustu konsumu no kustu seluk nian”, katak Zeferino Veigas Tilman. (Asesu You Tube/ Facebook Média ONE Timor)