CAC Indika Prátika KKN Iha Rekrutamentu Guarda Floresta

(Reportagen Flavio Suni / Editora Suzana Cardoso)

DILI (Media One Timor) – Rekrutamentu ofisial guarda florestal ba Ministeriu Agrikultura no Peskas (MAP) deskobre hosi Comissão Anti-Corrupção (CAC) katak iha indikasaun forte ba prátika kolusaun no nepotizmu.

Kazu indikasaun irregularidade rekrutamentu guarda florestal iha MAP ne’ebé hala’o iha fulan Juñu 2022 no hetan debate aas iha públiku ne’e, obriga Komisariu Adjuntu Comissão Anti-Corrupção (CAC) ba Asuntu Prevensaun no Sensibilizasaun, Luis de Oliveira Sampaio hodi lidera ekipa Quadrilateral kompostu husi CAC, Comissão Função Pública (CFP), Provedor Direitur Humanus no Justisa (PDHJ) no Inspector Geral do Estado (IGE) ba hasoru malu ho ekipa juri rekrutamentu nian CAC iha loron Sesta-feira (10/6).

Tuir aprezentasaun Komisariu Adjuntu CAC ba Asuntu Prevensaun no Sensibilizasaun, Luis de Oliveira Sampaio ho ninia ekipa deskobre, rekrutamentu ofisiál guarda florestal ne’ebé debate iha públiku, indika eziste poténsia irregularidade durante prosesu rekrutamentu.

Komisariu Adjunto Comissão Anti-Corrupção (CAC) ba Asuntu Prevensaun no Sensibilizasaun, Luis de Oliveira Sampaio akompanha husi Diretor Rosario Araujo ho estrutura Prevensaun korupsaun Sesta-feira (1/7) semana ne’e, aprezenta rezultadu deskobrimentu konaba rekrutamentu ofisial guarda florestal ne’ebé fulan kotuk sai debate nivel nasionál tanba indika eziste poténsia irregularidade durante prosesu rekrutamentu.

Analiza ba rekrutamentu prelimináriu ne’e aprezenta iha Sesta, (01/07/2022) hosi ekipa delegasaun CAC ba Diretor Jeral Floresta Simão Raimundo Mau nu’udar moos Prezidenti Ekipa Juri rekrutamentu nian, ho ninia estrutura iha Salaun Diresaun Jeral Florestas, Café e Plantas Industriais MAP iha Caicoli.

Hafoin halo analiza no verifikasaun ba dokumentu sira ne’ebé MAP aprezenta ba CAC aprezenta, hodi revela katak, la’os kandidatu na’in sia mak sai problema hanesan viral iha públiku. Maibé, tuir lolos hamutuk kandidatu na’in 15mak deteta iha irregularidade.

Nune’e indikasaun ba faktus irregularidade hirak ne’ebé CAC deskobre mak hanesan:

1. Husi kandidatu funsionariu guarda floresta sira ne’e balun nia naran la sai iha lista prezensa simu dokumentus nian husi Diresaun jeral floresta.
2. Iha faze submisaun dokumentu, kandidatu balun la hatama dokumentu.
3. Faze selesaun dokumentu kandidatu balun la liu (eskluidu) kedas ona.
4. Kandidatu balun nia lista prezensa laiha, la hatama dokumentus, selesaun dokumentus la liu, la tuir teste eskrita maibé naran sai fali iha teste final ka óral nian ho valor klasifikadu.
5. Kandidatu balun iha teste óral valor la reflete tiha ona estandar ka padraun. Tuir Lei Funsaun Públika valor minimu 60. Maibé, kandidatu balun nia valor atinzi to’o de’it 54 mai kra’ik.

“Ho deskobrementu hirak ne’e, CAC prezume katak prosesu hirak ne’e iha indikasaun forte ba familiarizmu, klientismu no nepotismu. Rekrutamentu ida ne’e la reflete ba baze ho meritu, koñesimentu profesional adekuada no abilidade relevante ka badaen iha area referidu.

Rekrutamentu mos la bazeia ba PAA 2022, maibé halo adjustamentu de’it ba orsamentu ratifikativu nian. Aleinde ne’e, tuir CAC hateten, esplikasaun entre prezidenti ba ekipa juri Simão Raimundo Mau no membru juri diferente. No moos dokumentu ne’ebé submete mai CAC no revela verdade oin seluk.

Reflete ba rezultadu preliminaria ne’ebé bazeia ba analiza no deskobrimentu ne’e, ekipa Unidade Inspesaun CAC hola konkluzaun katak:

1. Iha prosesu rekrutamentu ne’e hatudu indisiu forte katak iha aranju husi MAP hodi fó oportunidade ba klientilismu, familiarismu no nepotismu.
2. Prosesu rekrutamentu ne’e mos nakonu ho potensia konflitu interese hodi fó vantajen ba grupu proferensial asosiadu sira.
3. Iha tendensiozu mak’as kona-ba posibilidade atu halo koreksaun dokumentu ba kandidatu sira.
4. Iha konfuzaun kona-ba modalidade rekrutamentu nian tanba tuir esplikasaun husi juri sira katak rekrutamentu ne’e ho karakter kazuais. Maibé, implementasaun iha avizu ne’ebé fó sai iha konkursu dehan kontratu anual ho posibilidade ba extendsaun.
5. Rekrutamentu ida ne’e la refleta ba prinsipiu meritu, profesionál no badaen di’ak.
6. Rekrutamentu la bazeia ba PAA 2022, maibé halo ajustamentu ba orsamentu retifikativu.

Tanba ne’e, bazeia artigu 5 (1) letra c, CAC akonsella diretor jeral floresta no ekipa juri sira atu rekonsidera prosesu rekrutamentu ne’ebé hatudu indisiu forte ba irregularidade ne’e.

Luis de Oliveira ne’ebé reprezenta ekipa CAC subliña, independentemente husi aprosimasaun no akonsellamentu ne’ebé Diresaun Prevensaun realiza dadauk ho Diretor Geral Floresta ho estrutura jestor sira iha MAP, Diresaun Prevensaun sei entrega deskobrementu hirak ne’e ba iha Diresaun Investigasaun Kriminal CAC nian hodi halo investigasaun klean liu tan ba prosesu ne’e.

Aleinde ne’e, deskobrimentu ne’e sei partilla ho Komisaun Funsaun Públika (CFP) atu haree ba kestaun administrativu ne’ebé kabe ba Comisaun Funsaun Públiku nian kompetensia. ( Asesu YouTube Facebook Media One Timor)