Negosiante Kontinua Fa’an Iha Estrada Ninin, PM Taur Bolu Ona PAM

(Reportajen Asistente Editor Jacinto Caet)

DILI (Media ONE Timor) – Maske Primeiru Ministru (PM) Taur Matan Ruak fó ona atensaun ba negosiante sira para labele fa’an iha estrada ninin, maibé iha fatin ne’ebé movimentu mak’as domina ho merkadu lorokraik hodi halo Prezidente Autoridade (PAM) Munisipiu Dili hetan atensaun.

“Bolu ona Prezidente Autoridade Munisípiu Dili. Husu para kontrola sidadaun sira ne’ebé fa’an sasan iha estrada ninin. Tanba bele kria engravamentu ba movimentu sidadaun sira nian”, PM Taur hatete ba Jornalista iha Palasiu Prezidente Repúblika Aitarak laran.

Negosiante sira fa’an modo iha merkadu Komoro sai mai to’o estrada ibun

Tuir observasaun Media ONE Timor, Segunda (11/07/2022) katak, iha estrada ninin; Audian, eis merkadu Komoro, Delta rotunda Francisco Xavier do Amaral, Kampung Baru no Terminal Tasi Tolu rame ho bazar lorokraik hahú tuku 16:00 OTL, negosiante idaidak lalin nia modo no sira mai okupa estrada ninin.

Maioria negosiante hirak ne’ebé fa’an iha dalan ninin, fa’an modo tahan, ikan no balun seluk fa’an ropa uzadu ka obralan. Negosiante sira aproveita, tempu lorokraik bainhira tempu sai servisu.

“Sai servisu antes ba to’o uma, liu dalan sosa kedas modo. Kuandu to’o ona uma tein de’it ona. Ami la presiza to’o uma tiha depois mai sosa fila fali, ne’e ita sei lakon mina no tempu. Maibé, nia ladiak maka negosiante sira halo emgrafamentu”, Josefina Fernandes ne’ebé foin maka fila hosi servisu fatin hatete.

Negosiante sira fa’an iha estrada ibun iha merkadu Komoro

Nune’e PM Taur lamenta ho negosiante sira ne’ebé mak fa’an iha estrada ninin. Tanba, aliende kria engrafamentu ba movimentu bele mós kria dezastre. Kareta bele soke ho movimentu velosidade mak’as ba mai.

Aliende ne’e, negosiante iha Kampung Baru, hafoin kalan-kalan remata fa’an sasan antes atu fila uma, sira dasa fo’er hatama fali ba valeta ko’ak. To’o tempu udan, kria inundasaun iha fatin ne’ebá. Be’e nalihun iha estrada rotunda Prezidente Nicolau Lobato nia oin. Balun seluk bou hela iha estrada públiku, kuandu saneamentu sira mai raut tarde hamosu lalar ne’ebé bele lori moras ba ema.

“Tanba ne’e, ha’u husu ba sidadaun sira, Ita boot sira tenke iha komprensaun no mós dixiplina uitoan. Tanba ita iha uma mós fó dixiplina ba ita nia oan sira. Entaun ita nia sidade mós tenke dixiplina”, tenik PM Taur hodi hatutan.

Negosiante sira tenke fa’an iha fatin ne’ebé Governu prepara tiha ona hodi kria ambiente di’ak ba Kapital Dili ne’ebé sai hanesan odamatan prinsipal ba vizitante sira tama sai TL.Nune’e ba oin hothotu tenki tau konsiderasaun ba sidade Dili. (Asesu Youtube/Facebook https://www.facebook.com/Media1Timor Media ONE Timor)