Insendiu Edifisiu MAE, PNTL Investiga Bada’en 11

(Reportajen Editor Marcelino Tomae)

Dili (Media ONE Timor) — Insidente ahi han mutuk edifisiu Ministériu Administrasaun Estatál (MAE) ne’ebé akontese iha maizu menus tuku 23:40 kalan OTL ne’e, Polisia Nasionál Timor-Leste (PNTL) foti ona bada’en na’in 11 husi Oe-kusi hodi halo investigasaun.

“Husi insidente inséndiu iha edifísiu MAE ni’an ne’e rezulta sasan barak maka ahi han. Investigasaun foti ona ema na’in sanulu-resin-ida hodi mai halo identifikasaun para hatene sira ne’e involve ka la involve.”

Informasaun ne’e hato’o husi Portavós Komandu Jerál PNTL, Superintendente Xefe Polísia, Arnaldo de Araújo ba Jornalista iha nia kna’ar fatin, Kuartél Jerál, Caicoli, Sesta (24/03/2023).

Katak Arnaldo, sidadaun hirak ne’e maioria Oecusse-oan. Sira nu’udár bada’en ne’ebé servisu hela hodi halo konstrusaun ba edifisíu foun ida iha MAE ninian, ne’ebé iha duni resintu ministériu ne’e nian iha Caicoli.

“Sira na’in 11 ne’ebé PNTL ka’er ne’e maioria Oe-Kusi-oan. Sira nu’udár bada’en ne’ebé servisu halo konstrusaun ba edifisíu foun MAE ni’an, iha duni resintu ministériu ne’e ni’an iha Caicoli. Parte PNTL foti obrigatóriu traballadór sira ne’e hodi foti infromasaun dehan Xefe Arnaldo.

Xefe Arnaldo de Araújo informa, kazu insidente inséndiu ba cobby house MAE ni’an ne’e akontese iha Caicoli. Maizu menus Kinta, (23/03/2023) iha tuku 23:40 kalan derepente ahi lakan sa’e mak’as husi Cobby House ida ne’ebé besik los ho edifisiu MAE ni’an.

Inséndiu ne’e rezulta sasán no dokumentu MAE ni’an barak mak la salva. Barak mak ahi han motuk hotu. Barak mós mak tenke lakon. Tanba insidente ne’e mosu ema hotu laiha fatin. Inklui, seguransa sivíl sira ne’ebé hala’o seguransa iha fatin ne’ebá toba dukur hotu.

Dau-daun ne’e katak Arnaldo de Araújo, komandu bolu ona sira hodi foti de’it sira-nia deklarasaun. Depois mak halo tiha investigasaun foin bele hatene. Iha tempu badak bele iha ona informasaun serteza ruma kona-ba kronolojia loloos husi kazu insidente inséndiu ne’e.

Iha parte seluk tuir observasaun Media ONE Timor katak, edifisiu MAE ne’e iha diresaun lima ne’ebé akumuladu. Mak hanesan; Unidade Assesoria Ténika (UAT), Diresaun Nasionál Organizasaun Urbana (DNOU), Inspesaun Jerál Ministériu Administrasaun Estatál (IJMAE), Diresaun Rekursu Umanu (DRU) no Unidade Protokolu KomunikasaunInformasaun Externa (UPKIX).

Iha lokál insidente PNTL liu-hosi ekipa forensic tu’un direta ona iha terrenu hodi rekolla evidénsia ruma ne’ebé karik deskonfia nu’udár provas, hodi bele estuda no halo ezaminasaun ba fatin inséndiu, nune’e bele hatene kauza hosi ahi-han ne’e. (Asesu Youtube/Facebook https://www.facebook.com/Media1Timor Media ONE Timor)