(Reportajen Jornalista Mariquita Freitas)
Dili (www.mediaonetimor.co) – Justisa iha Nasaun Timor-Leste (TL) tenke ba ema hotu-hotu. Nune’e, Governu Konstitusionál da IX harii grupu traballu reforma setór justisa hodi garante justisa iha rai laran la’o ho di’ak.
Tuir komunikadu imprensa ne’ebé Media ONE Timor asesu husi Gabinete Mídia Primeiru Ministru (PM) nian, Segunda, (19/02/2024) hatete, grupu traballu reforma setór justisa harii hosi PM Kay Rala Xanana Gusmão iha tinan 2023.
Hatuir Koordenadora grupu traballu reforma setór justisa, Lúcia Lobato hafoin remata audensia ho PM Xanana iha Palasiu Governu katak, grupu ne’e harii atu ajuda hadia no reforma sistema justisa iha Nasaun TL.
“Grupu traballu ne’e sei ajuda governu hodi reforma setór justisa. Nune’e, tribunál sira bele servisu no hatán ba povu tomak nia preokupasaun. Katak, asesu ba justisa tenke ba ema hotu. No tribunál sira nia servisu atu garante justisa ba nasaun nia di’ak”, Lucia Lobato esplika.
Kona-ba objetivu enkontru ho PM Xanana, katak Lúcia Lobato, enkontru ho grupu traballu reforma setór justisa ne’e atu prepara relatóriu hodi halo rekomendasaun kongkreta ba Governu.
Hatete Lúcia Lobato, ho apoiu Programa Dezenvolvimentu Nasaun Unidas (UNDP), grupu ne’e sei halo diagnostiku ba justisa. Sei rekruta matenek na’in Timor-oan sira hodi apoia.
“Primeiru Ministru husu atu grupu traballu aprezenta rakomendasaun kongkreta. Lakohi relatoriu naruk. Katak, rakomendasaun hirak ne’e tenke kurtu prazu ne’ebe mak governu tenki implementa kedas. Maibé, tenki iha mós rakomendasaun medium no longu prazu”, Lúcia Lobato informa.
Aliende ne’e hatutan Lúcia Lobato, grupu traballu ne’e hasoru ona ho Prezidente Tribunal Rekursu, Deolindo dos Santos. Grupu ne’e husu atu tau atensaun mak’as ba reforsa rekursu umanu.
Katak Lúcia Lobato, Tribunál Rekursu tenke reforsa apoia formasaun rekursu umanu ba entidades Timor-oan ne’ebé servisu iha área judisiariu nian. No mós tenki hadia lei balun, halo lei foun balun no lei balun tenke hasai tia tanba la kondus ho realidade nasaun nian.
Tribunal Rekursu mós tenke hadia no dezenvolve infrastrutura setór Justisa nian katak Lúcia Lobato hodi hatutan, Grupu traballador mós sei hala’o reuniaun ho Ministru Justisa Dr. Sergio Hornai, Prezidente Repúblika José Ramos Horta, Bankada Parlamentár, akademiku, advogadu privadu, sosiedade sivil, emprezariu, grupu feto no atividade kona-ba direitu labarik nian.
“Grupu traballu ne’e serbisu to’o fulan Marsu 2024. Primeiru Ministru husu labele lalais liu. Tanba lalais liu sei lufu-lafu de’it. Maibé mós labele dada naruk. Tanba governu iha programa ida ne’ebé atu kumpri”, Lúcia Lobato dehan.
Entertantu enkontru ho Primeiru Ministru, Kay Rala Xanana Gusmão ne’e akompaña mós hosi Ministru Justisa Sergio Hornai, Eis Prezidente Tribunál Rekursu Cláudio Ximenes, CES-Coimbra Portugal Paula Fernando, no reprezentante hosi UNDP Patrick Keuleers ho nia ekipa tékniku sira. Asesu Youtube/Facebook https://www.facebook.com/Media1Timor Media ONE Timor)
Ita nia komentariu konaba post ne'e.