PM Xanana Sei Partisipa Simeira ASEAN Iha Melbourne

(Reportajen Jornalista Mariquita Freitas)

Dili (www.mediaonetimor.co) – Tuir planu Primeiru Ministru (PM) Timor-Leste (TL), Kay Rala Xanana Gusmão sei partisipa simeira Asosiasaun Nasaun Sudeste Aziátiku (ASEAN-sigla Inglesh) ne’ebé sei hala’o iha Melbourne, Austrália durante loron tolu.

“Ha’u mai hasoru Primeiru Ministru, Xanana Gusmão hodi atualiza preparasaun ba semeira ASEAN Austrália nian, ne’ebé sei hala’o iha semana oin durante loron tolu. Simeira ne’e  sei partisipa hosi entidade oin-oin. No simeira ne’e sei ko’alia kona-ba futuru rejiaun sudeste Aziátiku iha pás no prósperu”.

Lia hirak  ne’e hato’o  husi  Embaixadora Australia,  Caitlin Wilson  ba Jornalista sira hafoin remata hala’o enkontru ho PM Kay Rala Xanana Gusmão iha Palasiu Governu, Segunda, (26/02/2024).

Embaixadora Australia Caitlin esplika, objetivu enkontru ho PM Xanana hodi atualiza ninia ajenda vizita ba Australia hodi tuir  simeira ASEAN nian ne’ebé sei hala’o, hahú iha loron 04 Marsu to’o loron 06 Marsu 2024.

Katak Caitlin, Austrália ho haksolok hodi konvida TL no nasaun membru ASEAN hodi partisipa iha atividade internasionál ne’e.  Maske nu’udar partisipante iha simeira ASEAN nian, maibé Xanana Gusmão nu’udar PM nia vizita ne’e, nu’udar vizita dahuluk nian. Maka, Australia haksolok hodi fó bem-vindu ba PM Xanana nia prezensa.

“Antes ne’e Primeiru Ministru Xanana hasoru malu ona ho Primeiru Ministru Austrália, Anthony Albanese iha simeira Austrália ASEAN ba dala-tolu nian ne’ebé hala’o ona iha Jakarta, Indonézia iha loron 07 Setembru 2023 hodi ko’alia kona-ba kooperasaun rai rua nian”, Caitlin dehan hodi hatutan.

Xefe Governu Xanana dehan, TL no Austrália sei kontinua servisu hamutuk nu’udar pais vijiñu. Tanba, nu’udar viziñu besik ho Austrália no nasaun barak iha ASEAN,TL felisita parseria pozitiva entre ASEAN ho Austrália.

Hatete Caitlin hodi hasara PM Xanana katak, Austrália nu’udar kontribuidór prinsipál ida ba dezenvolvimentu konstrusaun Nasaun no Estadu TL.  Inklui, fó oportunidade ba Timor-oan rihun ba rihun hodi hetan kompeténsia no esperiénsia serbisu nian iha Austrália.

Tuir planu PM Xanana ho ekipa sei dezloka hosi Dili loron rua antes simeira Asutralia ASEAN nian hahú, iha loron 02 Marsu 2024 iha Melbourne, Australia no tuir planu PM Xanana ho ninia ekipa sei fila fali mai iha loron 07 fulan Marsu tinan 2024.(Asesu Youtube/Facebook https://www.facebook.com/Media1Timor Media ONE Timor)