Malaysia (www.mediaonetimor.co) – Prezensa Nasaun Timor-Leste iha ASEAN (Association of Southeast Asian Nations) nu’udar membru ba dala 11 , hanesan parte foun hodi fó dinamika foun ba kolektivu ASEAN, la’ós deit politiku no demokrátiku maibé mos ekonomiku.
“Ami simu imi hanesan parte foun. Imi (Timor-Leste-Red) nia presensa sei fó dinamika foun ba kolektivu ASEAN, la’ós deit politiku no demokrátiku, maibé mos ekonomiku.”
Lia fuan ne’e hato’o husi Ministru Negosiu Estranjeiru Malaysia, Haji Mohamad Hasan iha serimónia depózitu instrumentu adezaun ba ASEAN husi Timor Leste, iha Kuala Lumpur, Malaysia, (25/10/2025).
Ohin loron ida ne’e (25/10/2025), katak Haji Mohamad, ami hamutuk ho Timor-Leste atu selebra loron internasional nian. Loron importante ne’e, bainhira imi tama mos iha família ASEAN ne’e, hodi hamutuk iha inkluzaun ne’ebé boot liu.
Iha nia lia fuan ba bemvindu, membru Governu Malaysia ne’e hatete, hamutuk iha komunidade ASEAN kria pas no hola fatin ne’ebé livre husi violensia sira. No hamutuk iha estabilidade no harmonia.
Tuir MNE Mohamad, adezaun Timor-Leste ne’e hatudu komitmentu boot. Maibé mos hanesan sinál ida husi determinasaun forte husi nasaun ASEAN sira. Katak, iha futuru hamutuk ho ASEAN iha kolektivu ida ne’ebé kompriende harmonia, kooperasaun, no respeitu mutuál.
MNE Malaysia ne’e rekunyese, Timor-Leste nia prosesu ba adezaun ASEAN nu’udar viajen ida ne’ebé la’ós fásil. Dezde inisiu to’o agora. ASEAN mos aprende buat barak. Istória ida ne’e mos kona-ba perseveransa no pasiénsia husi Timor-Leste.
“Agora, ho energia foun, pespektiva foun, no juventude ne’ebé preparadu atu kontribui, ami (ASEAN-Red) simu imi (Timor-Leste Red) hanesan parte foun. Imi nia presensa sei fó dinamika foun ba kolektivu ASEAN nian, la’ós deit politiku no demokrátiku, maibé mos ekonomiku”, deklara MNE Mohamad.
Katak MNE Mohamad, dinamika foun ba kolektivu ASEAN ne’e nu’udar forsa ida iha diversidade nian no kapasidade atu transforma diversidade iha unidade. “Ami fiar katak imi, Timor-Leste nia partisipasaun sei reforsa koezaun rejionál”, hatete Mohamad ho esperansa. (Asesu Youtube-https://www.youtube.com/@Media1Timor/Facebook- https://www.facebook.com/Media1Timor/Iha moos Kursu Jornalizmu no Lian Inglesh)
Ita nia komentariu konaba post ne'e.