(Reportajen Livia Sarmento)
Dili (Media ONE Timor) – Televizaun husi Australia Broadcasting Cooperation (ABC) hakarak materializa kooperasaun di’ak ho Radio Televizaun Timor Leste (RTTL), E.P no media privadu iha Timor-Leste.
“Ohin kolega sira mai informa ba Prezidente Repúblika saida mak sira sei halo atu apoiu media iha Timor-Leste. Ho RTTL asina ona memorandu entendimentu ho ABC kona-ba troka kontíudu ne’ebé maka sina ona entre RTTL ho ABC kona-ba troka kontíudu no hanorin English liu husi televizaun.”
Asuntu ne’e hato’o husi prezidente Konsellu Administrasaun Rádiu no Televizaun Timor-Leste, Empreza Públika-RTTL,ep, José António Belo ne’ebé partisipa mós Ho Ekipa Televizaun ABC ba Jornalista sira Hafoin remata enkontru ho Prezidente Repúblika José Ramos-Horta iha Palásiu Prezidensiál, Kinta, ( 17/11/2022).
José Belo hatutan, RTTL ho televizaun ABC sei asina akórdu kooperasaun iha área formasaun no kapasitasaun lian Ingles ba media sira iha Timor-Leste, inklui harii seksaun lian Ingles iha RTTL.
Iha Fatin hanesan, Lead International Development Public Affairs, Jo Elsom hateten, enkontru ho Xefe Estadu ne’e ko’alia liu kona-ba importánsia media no liberdade ba media nian, tanba media broadcasters nasional nia papel mak promove interese públiku nian nomós apoiu sidadaun sira atu asesu ba informasaun.
“Ami agradese tebes ho Prezidente. Ami ko’alia liga ba dezenvolvimentu media nian no oinsá atu servisu hamutuk ho media iha Timor hodi harii kapasidade no “skill” ho matenek ne’ebé ami iha. Nomos ami sei aprende buat balun husi media iha Timor. Nune’e bele kria relasaun iha lian jornalizmu,” tenik Jo.
Jo Elsom mós agradese ba Prezidente Repúblika, José Ramos-Horta bele disponibiliza nia tempu hodi hasoru malu no sira husi televizaun ABC. (Asesu Youtube/Facebook https://www.facebook.com/Media1Timor Media ONE Timor)
Ita nia komentariu konaba post ne'e.