Dili (Media ONE Timor) – Anin mak’as hosi tasi akompaña ho udan hafanu funsionariu Palasiu Governu ne’ebé besik loos ho tasi ibun iha Ponte Kais hodi halo hotu-hotu halai sai hosi servisu fatin.
Tuir observasaun Media ONE Timor iha Plasiu Governu, akontesementu ne’ebé akontese iha Sesta, (20/01/2023) maizu menus tuku 09:30 OTL mosu iha Kapotál Dili ne’e hamta’uk funsionariu sira hodi halai sai hosi sira nia servisu fatin.
Sira hamriik iha karidor Palasiu Governu. Balun perkupa ho sira nia familia hodi telephone ba familia. Balun seluk tauk ba uma Cube House anin huu bele nakloke. Nune’e ida-idak buka fatin seguru hodi salva aan maske la akontese dezastre.
Antes anin mak’as hodi hafanu funsionariu sira, eletrisidade derepente mate. Hafoin mosu anin mak’as mai hosi tasi akompaña ho udan ne’ebé lais de’it. Maizu menus to’o tuku 10:00 OTL situasaun normal hikas fila fali. No ida-idak fila ba hala’o sira nia servisu hanesan bai-bain.
Iha parte seluk anin ne’ebé mak’as rezulta ai-kakeu iha UN Campound, Caicoli, Dili monu baku kareta hirak ne’ebé para iha ne’ebá at balun hetan kondisaun at grave, balun seluk at kmaan, tuir imajen ne’ebé fahe tutan iha media sosiais.
Sei nafatin hosi media sosiais, professor balun avizu hodi inan aman sira ba foti sira nia oan sedu. Tanba impaktu hosi anin mak’as bele afeita ba dezastre sira. Nune’e, antisipa ba labarik sira atu fila sedu ba uma. To’o notisia ne’e hatuun udan sei nafatin monu iha Palasiu Governu. (Asesu Youtube/Facebook https://www.facebook.com/Media1Timor Media ONE Timor)
Ita nia komentariu konaba post ne'e.