APC Rejistu Ahi Han Uma 32, Na’in 2 Kanek-Na’in Ida Lakon Vida

(Reportajen Jornalista Media ONE Timor-Mariquita Freitas)

Dili (www.mediaonetimor.co) –  Anin boot ne’ebé akontese iha  Timor-Leste (TL) durante semana ida nia laran, konsege sobu estraga uma hamutuk 31 no um aida seluk ahi han motuk hodi halakon ema na’in ida nia vida.

Haktuir Diretur Gabinete Relasaun External no Komunikasaun,  Cesario da Silva Marques ba Jornalista sira liu husi konferensia imprensa ne’ebé hala’o iha salaun  Autoridade Protesaun Sivil (APC), Kaikoli, Dili, Segunda, (23/09/2024) katak, uma kain 32 ne’ebé hetan estragus husi anin boot ne’e, akontese iha loron 16 to’o loron 23 Setembru 2024.

Durante semana ida nia laran katak Cesario, CNOPC-APC (Centru Nasional Operasaun Protesaun Civil- Autoridade Protesaun Civil) konsege rejistu kazu ho tipu dezastre hamutuk uma 32 maka hetan estraga. Anin sobu uma 31. No ahi han uma ida. Bee lori ema na’in tolu. Na’in ida hetan maten. No na’in rua seluk kanek.  Husi uma 32 ne’ebé hetan estraga husi dezastre ne’e, hamutuk ema na’in 181 maka afetadu.

Desastre anin boot sobu uma ne’e akontese iha Munisipiu Atauru, Postu Atauru, Suku Beloi, Aldeia Arlo akontese anin sobu komunidade nia uma ida. Husi Munisipiu Kovalima, Postu Maukatar, Suku Olpilat, Aldeia Fatuk oan  relata katak, akontese anin sobu komunidade nia uma ida.

Iha Munisipiu Baukau maka barak liu.  Hanesan iha Postu Kelekai, Suku Abafala, Aldeia Caranu akontese anin sobu komunidade nia uma haat. Suku Letenumu, Aldeia Uaidora akontese anin sobu komunidade nia uma hamutuk 11. Suku Abafala, Aldeia Asa-Lequi akontese anin sobu komunidade nia uma rua. Suku Abafala Aldeia Teleha akontese anin sobu komunidade nia uma ida. Suku Makalaku, Aldeia Tefedae akontese anin sobu komunidade nia uma ida. Suku Makalaku Aldeia Pusi l Ae, akontese anin sobu komunidade nia uma ida. Suku Guruca, Aldeia Lakukela akontese anin sobu komunidade nia uma ida. Suku Waitame, Aldei Gugulai akontese anin sobu komunidade nia uma ida. Suku Waitame, Aldeia Gamana akontese anin sobu komunidade nia uma tolu. Nafatin husi Suku Waitame, Aldea Sialimu rejista katak akontese anin sobu kominidade nia uma ida.

Munisipiu Dili, Postu Kristu Rei, Suku Ailok, Aldeia Maliaboro akontese anin sobu komunidade nia uma ida. Nafatin Suku Ailok, Aldeia Koitutu akontese anin sobu komunidade nia uma ida. Postu Vero Krus, Suku Bairopire, Aldeia Fatumeta akontese ahi han uma ida.

Munisipiu Vikeke, Postu Uatu Karbau, Suku Bahatata, Aldeia Neluwai iha loron 18 fulan Setembru tinan 2024, akontese mota lori labarik nain tolu no labaraik nain rua konsege salva. Maibe vitima ho naran Nelvia da Crus ho idade tinan hitu lakon vida, tanba nia isin maten hetan fali iha loron 21 fulan Setembru tinan 2024 iha tuku 15:00 lorokraik.

Nune’e hamutuk desastre anin boot sobu uma iha Munisipiu Atauro anin sobu uma ida. Munisipiu Baukau anin sobu uma 27. Munisipiu Kovalima anin sobu uma ida. Munisipiu Dili anin sobu uma rua no ahi han uma ida. Munisipiu Viqueque ema lakon vida na’in ida no kanek na’in rua.

“Komandu APC munisipiu ho parseiru relevante fornese asistensia emerjensia ba família afetadu sira. Hanesan ai-han no laos ai-han (food item& non food item). Komandu APC  munisipiu sira sei kontinua halo hela levantamentu detaillu kona-ba sasán ne’ebé hetan estraga no lakon”, Cesario hatete.

Enkuantu intervensaun durante dezastre naturais ne’e, husi koandu APC iha munisipiu; Atauro, Baukau, Kovalima, Dili no Vikeke halo ona asesmentu, varifikasaun no fó ona apoiu emerjensia ba vitima hirak ne’ebé afetada. (Asesu Youtube/Facebook https://www.facebook.com/Media1Timor Media ONE Timor)