MEDIAONETIMOR-Tanba jestaun be’e nian fraku maka populasaun idak-idak uza be’e konforme sira nia hakarak. To’o balun seluk labele asesu ba be’e mós. Nune’e, iha Kampaña Eleisaun Parlamentar 2017, maioria lideransa Pártidaria kestiona konaba populasaun falta be’e mós ba Partidu CNRT ne’ebé kaer ukun durante tinan 10 nia laran, nu’udar materia importante ba kampaña hodi manan povu nia laran.
Ida hosi jestaun ne’ebé fraku maka be’e naksulin estraga iha be’e dalan area Eis Perumahan Bank Tabungan Negara (BTN), Aldeia 02, Suku Fatuhada, Postu Administrativu Dom Aleixo, Dili.
Tuir observasaun Media One Timor iha loron, Kuarta, (02/08/2017) nota katak be’e ne’ebé liga hó besi kanu iha ponte okos ne’e naksulin estraga iha be’e dalan besik ona tinan barak nia laran.
Tanba, iha sementi lolon no besi kanu iha ona be’e te’en. Maibé, laiha kontrola masimu husi parte komunidade hodi hato’o keisa ba Sefi Aldeia 02 ka ba diretamente iha Servisu Agua no Saniamentu (SAS) hodi halo levantamentu para hadia.
Nu’udar sidadaun ne’ebé diak, tenki kontribui hó kuidadu ba sasan ne’ebé governu prepara ona. Labele falta be’e mós maka hakilar. Be’e ne’ebe naksulin estraga, hotu-hotu iha dever atu halo levantamentu para hadia. Nune’e, be’e bele naksulin ba to’o ida-idak nia uma hodi uza tuir nesesidade.
“Tanba naksulin estraga, ami loron-loron fase modo iha ne’e antes lori ba fa’an. Kuandu ema balun liga hó manggera, entaum ami hasai tiha depois monta fali,” hateten ida hosi vendadores roda rua, Pedro ne’ebé fase hela nia modo iha be’e ne’e.
Ahi bele troka hó jerador, lilin, eletrisidade, lampra no maneira seluk. Maibé, be’e labele troka hó buat seluk. Nune’e, tenki uza hó kuidadu. Ema barak sei presiza be’e ba sira nia nesesidade loron-loron. Tuir lolos autoridade lokal hamutuk hó komunidade iha bairu 02, hato’o ba SAS para tau matan. Labele hein deit estadu mak tenki tu’un direita para rezolve problema ki’ikoan sira hanesan ne’e. Mai ita hotu kontribui ba dezemvolvimentu!!!!(Reportájem Mario Lobo)
Ita nia komentariu konaba post ne'e.