Bloku AMP Deklara Rajaun Reseisaun Programa VII Governu

MEDIAONETIMOR– Hafoin Programa VII Governu Konstituisionál sumbar iha Parlamentu Nasionál (PN), Bankada Aliansa Maioria Parlamentar (AMP) aprezenta rajaun mosaun rejeisaun liu hosi komunikadu imprensa.

Tuir komunikadu imprensa ne’ebé le’e hosi Prezidente Bankada CNRT, Deputadu Arão Noe Amaral iha salaun Bankada uma fukun PN hetan akompaña hosi Prezidente Bankada PLP no Khunto, Tersa, (24/10/2017).

Tuir mai Media One Timor hatu’un kompletu Komunikadu Imprensa hosi Bankada AMP, CNRT, PLP no Khunto hanesan tuir mai;

Iha loron 16 to’o 19 Fulan Outobru 2017, Parlamentu Nasionál apresia apresentasaun Programa VII Governu Konstituisionál.

Hafoin diskute loron hat nia laran, Bankada Opozisaun ne’ebé hamahan a’an Aliansa Maioria Parlamentar (AMP), aprezenta mosaun rejeisaun ba programa VII Governu kontituisional.

Aktu Konstituisionál ida ne’e halao tuir artigu 109 Konstituisaun Repúblika Demokratika Timor-Leste (C-RDTL).

Aktu ida ne’e ezerse ho kuidadu no responsabilidade a’as, atu interese estadu no nasaun nian hodi haklaken knar lo-los tuir C-RDTL define iha artigu primeiru.

Tuir artigu 109 C-RDTL, apresiasaun programa Governu ne’e kompetensia esklusiva Parlamentar Nasional nain, tanba ne’e maka deputadu sira iha dever ho kompetensia hodi halo apresiasaun molok atu fo votus de confiansa ou votus de rejeisaun ba programa.

Husi biban ida ne’e, ami iha obrigasaun atu informa ba povu tomak razaun sira hanesan tuir mai ne’e:

Nudar reprezentante mairia populasaun timorense, bankadas aliansa Maioria Parlamentar iha dever no kompetensia tomak atu apresia no rejeita programa VII Governu Konstitusional.
Bankada opozisaun afirma katak formulasaun Governu nian falha atu kumpri rekezitus hirak ne’ebe hatur iha artigu 108 Konstituisaun RDTL konaba substansia ka konteudu hosi dokumentu ne’e rasik. Artigu 108 ne’e koalia klaru konaba materia saida deit maka presija inkorpora iha programa ne’ebe Governu lori mai Parlamentu Nasional hanesan (a) Prinsipius politiku, (b) Objetivu, (C) Medidas no (d) Tarefas atu fasilita fiskalizasaun, monitorizasaun no implementasaun programa hirak ne’e.
Bankada sira aliansa Maioria Parlamentar hare katak dokumentus ne’ebe aprezenta hosi Governu, hanesan dokumentu narativa ho aprezerentasaun iha Power Point la-han malu.
Iha debate programa Governu ne’ebe aprezenta hosi VII Governu Konstitusional, deputadu hosi bankada AMP hato’o pergunta espesefiku ba Governu, maibe Sua Excelensia Senhor Primeiru Ministru em vez de responde perguntas ne’ebe koloka, uza fali tempu hodi hato’o diskursu politiku, okasionalmente ataka deputadu bankada Opozisaun no halo fali hanesan kampanha Eleitor uza transmisaun direita ho kanais media nasionais;

Alem de razaun sira iha leten bankada sira aliansa Maioria Parlamentar hato’o mosaun rejeisaun ho razaun politika hanesan tuir mai ne’e:

VII Governu ida ne’e, la harii ho Maioria Parlamentar
Governu Minoritariu sei buka atu hetan apoiu tutuir dalan durante nia governasaun ne’ebe bele hamosu klima insustentabilidade
Atu prevene impozisaun hosi governu minoria ba maioria iha lalaok politika ita nia rai Timor-Leste iha futuru
Atu reafirma papel Opozisaun iha pais demokratiku nu’udar alternativa ba programa no mos ba governasaun
Atu evita hamosu Governu ida ne’ebe la forte, frazil no la estavel ne’ebe bele hamosu inserteza bo’ot ne’ebe la garante atu fo fiar ba konfiansa merkadu, investimentu zestranjeiru, públiku no privadu, no dezenvolvimentu ekonomia em jeral

Ho ida ne’e bankada sira Aliansa Maioria Parlamentar konklui katak:

VII Governu ne’e laiha apoiu politiku minimu necessariu iha Parlamentu Nasional no laiha kondisaun atu foti medidas xave hodi halao dezenvolvimentu. Bainhira governu ida fraku implika kustu politiku, social no ekonomia ne’ebe a’as tebes ba estadu
Bainhira governu ida ne’e laiha apoiu politiku sufisiente iha Parlamentu Nasional maka sei hamosu kompromisiu politiku barak hodi sustenta governu ne’e nia subrevivensia durante tinan 5. Ida ne’e sei prejudika tebes dezenvolvimentu ba povu
Governu ida ne’ebe laiha apoiu maioria iha Parlamentu Nasional sei laiha serteza no bele monu bainhira deit no sei prejudika dezenvlvimentu nasional.

Nune’e ami bankada Aliansa Maioria Parlamentar hakarak hato’o ba entidade hotu-hotu no mos povu doben Timor-Leste konaba rejeisaun programa Governu nian laos tanba ami la apoiu dezenvolvimentu (asesu be’e mos ne’ebe diak ba komunidade sira, asesu edukasaun ne’ebé diak, asesu ne’ebe diak ba saude, asesu ne’ebe diak iha empregu ba ema hotu, asesu Estrada ba ema hotu, asesu eletrsidade ba ema hotu, paz no estabilidade na Timor-Leste no kombate korupsaun) maibe mosaun de rejeisaun ne’e tanba ami hare katak Governu ida ne’e laiha kondisaun atu bele garante dezenvolvimentu no moris diak povu doben Timor-Leste.

Ikus liu ami hotu hakarak apresia no agradese wa’in:

Ba militantes no simpatizantes Partidu KHUNTO, PLP no CNRT, ne’ebe durante halao debate ba Programa Governu nian, fo apoiu no fiar nafatin ba ami deputadu sira no mos hatudu komportamentu ida ho forma sivika no responsevel;
Ba povu doben Timor-Leste tomak ne’ebe akompania debate ba Programa Governu nian ho forma ida pasifiku no kalma, atentu no hatudu sira bom susesu. Ita bo’ot sira hatudu duni ita bo’ot sira nia maturidade politika hodi la monu ba iha provokasõens oin-oin hodi estraga ita nia rai. Dala ida tan ami hato’o parabéns ba povu doben Timor-Leste tomak. Imi hanorin ami oinsa bele komporta ami nia-an hanesan politiku ne’ebé edukuadu no siviku.
Ba PNTL no F-FDTL ne’ebe durante debate Programa Governu to’o nia konkluzaun asegura ka garante seuransa no ordem publika iha Dili no teritoriu tomak.
Ba Dioceze Dili, Baucau no Maliana, konfesõens Reliziozas sira seluk, ba Veternaus sira, Organizasõens Rezistensia nian, Organizasaun defesa direitu feto nian, Organizasaun Juvenude sira, Estuante sira, ba Preofessores sira, ba Funsionariu Publiku tomak, ba defesa direitu difisiente no ba Organizasaun sosiedade sivil, ne’ebe durante debate ba Programa Governu nian hatudu komportamentu diak hodi kontribui ba paz no ordem politika.

Nune’e, ami hotu apresia ba povu debon timor oan tomak kontinua mantein nafatin kalma no halao ida-idak nia aktividade lor-loron nian. Husu atu akompania nafatin prosesu Konstitusional ne’e, kaer metin sivismu, no valores demokrasia nian. Prosesu demokratiku-konstitusional iha Parlamentu Nasional lao hela tuir regras ne’ebe hatur iha Konstituisaun RDTL. (Reportájem Jose Samuel/ Hilario da Silva/Dulce Ximenes)