(Reportajen Marcelino Tomae/Editora Suzana Cardoso)
Dili (Media ONE Timor) — Maske la-hetan konkordansia husi partidu balun, maibé órgaun eleitorál Sekretáriadu Tékniku Administrasaun Estatal (STAE) no Comissão Nasionál das Eleições (CNE) hamutuk ho partidu polítiku (Parpol) halo ona validasaun boletín votu ba eleisaun parlamentár (ElPar) 2023.
Hatete Prezidente CNE, José Agustinho Belo no Prezidente STAE, Acilino Manuel Branco ba Jornalista iha Salaun Lalini Lariguto iha semana dahuluk Fulan Fevereiru 2023 hateten sira konkorda ho foto no emblena iha bulletin nian laran.
Tuir Prezidente CNE, José Agustinho Belo hateten iha boletín votu ne’ebé STAE prepara iha modelu uza númeru sorteu ne’ebé dada iha Tribunál Rekursu. No ida seluk la uza númeru sorteu.
Maibé tuir José, maioria Parpol ne’ebé atu konkore iha ElPar iha loron 21 Fulan Maiu 2023, konkorda ona ho boletín votu ne’ebé uza númeru sorteu. Aliende ne’e, Parpol sira mós konkorda atu iha bulletin votu tau emblema Parpol no foto lideransa partidu nian iha laran.
Nune’e katak Prezidente CNE ne’e, validasaun ba boletin votu tuir la’o tuir lei ne’ebé iha ona. Katak, impresaun boletin votu bazeia ba Parpol ida-idak nia aprezentasaun. Partidu balun uza de’it emblema. Balun seluk uza foto lideransa partidu nian iha laran.
“Iha validasaun ne’e maioria Partidu Polítiku sira konkorda ho modelu boletín votu ne’ebé STAE aprezanta tuir proposta hosi kada partidu. Tuir lei eleisaun parlamentár, hafoin hetan konkordánsia no aprovasaun hosi Komisáriu sira iha CNE nian, maka bulletin votu ne’e validu ona”, José dehan hodi hatutan.
Órgaun eleitorál sira hamutuk ho Parpol hotu halo kedas asinatura validasaun nian ba iha dokumentu ne’ebé CNE prepara. Husi asinatura ne’e maka modelu bulletin votu ba eleisaun parlamentár 2023 hetan ona aprovasaun.
Lia fuan hanesan hato’o husi Diretor jerál STAE, Acilino Manuel Branco fó nia apresiasaun ba Parpol sira ne’ebé sai ona testamuña ba aprovasaun matéria importante ba eleisaun nini’an. Maka hanesan; halo ona tinta. No validasaun modelu boletín votu.
“Modelu boletín votu rasik, prosesu ida ne’ebé la’o tuir lei. Bainhira Tribunál Rekursu (TR) halo tiha sorteu orgaun eleitorál, sira komunika kedas ho ParPol sira hotu tuir lei eleisaun parlamentár nian”, dehan Acilino.
Nia hateten, iha lei eleisaun nian defini mós STAE nia kompeténsia atu simu de’it saida mak partidu ida-idak hato’o ba iha STAE. Sei ajusta ba iha modelu ne’ebé STAE rasik prepara tiha ona.
Katak Acilino, STAE halo tuir lei eleisaun parlamentár iha artigu 39 lei númeru 6/2016 no alterasaun lei númeru 9/2017. Lei ne’e hateten, iha modelu boletín votu ne’e rasik saida mak hateten iha lei. Hanesan proposta ida tuir lei 39 ne’e
Diretor jerál STAE ne’e hatutan iha konteúdu prinsipál husi boletín votu sei kontempla logo tipu RDTL no mós STAE nian ho títulu Eleisaun Parlamentár ho lingua tétum, no tuir mai iha mos Eleisaun Parlamentár iha lian portugés.
“Kona-ba naran partidu, emblema no sigla partidu nian ami tau konkretamente saida mak ami simu hosi ita bo’ot sira, ami laiha kompeténsia atu hamenus virgula ka pontu ida, tamba STAE laiha kompeténsia atu halo ida-ne’e,” Nia informa hodi esplika.
Sekuénsia iha boletín votu tuir ordenamentu sorteu ne’ebé iha no kualidade surat tahan tuir artigu 39 katak surat tahan ne’ebé la transparante, ho kualidade 80 grau, ho nia tamañu ka luan 20 no naruk 60 no sei bele akomoda ho diak tebes elementu sira ne’ebé ohin temi iha leten.
“Kona-ba naran partidu, emblema no sigla partidu nian ami tau konkretamente saida mak ami simu hosi ita bo’ot sira, ami laiha kompeténsia atu hamenus virgula ka pontu ida, tamba STAE laiha kompeténsia atu halo ida-ne’e,” informa Acilino. (Asesu Youtube/Facebook https://www.facebook.com/Media1Timor Media ONE Timor)
Ita nia komentariu konaba post ne'e.