(Husi Hermenegildo Tilman)
Ohin loron ita ko’alia kona-ba nasaun demokrasia. Tuir definisaun universal nian liga ba demokrasia hanesan planu institusionál ida atu atinje desizaun polítika ne’ebé ema ida-idak hetan podér atu deside dalan luta kompetitivu ba povu nia votu. Signifikadu demokrasia nian bele haree hosi revizaun linguístika (epistemolójika) ida no termu sira (terminolojia). Epistemolójikamente, “demokrasia” kompostu husi liafuan rua ne’ebé mai husi lia fuan gregu “demos” ne’ebé signifika ema ka rezidente sira fatin ida no “cretein” ka “cratos” ne’ebé signifika podér ka soberania.
Iha kontestu linguajen demos-cratein ka demos-cratos maka estadu nasaun nian iha ne’ebé iha sistema governu soberania iha povu nia liman, podér supremu hela iha desizaun koletiva povu nian, povu mak ukun, governu povu nian no hosi povu.
Ko’alia kona ba demokrasia government of the people katak Kontein signifikadu relasiona ho governu ne’ebé lejítimu no rekoñesidu (ligimate government) iha povu nia matan. Pelu kontráriu iha governu ne’ebé la lejítimu no la hetan rekoñesimentu (unligimate government).
Governu rekoñesidu maka governu ne’ebé hetan rekoñesimentu no apoiu popular. Importánsia hosi lejitimidade ba governu ida maka governu bele halai roda burokrasia no programa sira.
Governu ne’ebé rekoñesidu halo buat hotu tenke bazeia ba bem commun povu nian. Mantein demokrasia nu’udar orden no sistema sosiál polítika depende tebes ba elementu sira ne’ebé apoia demokrasia rasik, elementu sira-ne’e maka: Estadu Direitu (Rechtsstaat no Rule Of Law) Iha literatura jurídika Timor nian, termu estadu jurídiku maka tradusaun ba rechtsstaat no Rule Of Law.
Konseitu protesaun legál ba sidadaun fó protesaun legál ba sidadaun sira liuhosi instituisaun judisiál sira ne’ebé livre no imparsiál no garante sidadaun sira nia direitus umanus. Termu rechtsstaat no rule of law nian tradús hanesan Estadu direitu esensialmente iha signifikadu diferente. Termu rechtsstaat uza barak iha nasaun sira iha Europa Kontinentál ne’ebé depende ba sistema direitu sivíl (civil law), enkuantu iha regra direitu barak dezenvolve iha nasaun Anglo-Saxon sira ne’ebé depende ba Komún Lei (Common Law). Direitu sivíl foka liu ba lei administrativu, enkuantu lei komún foka ba judisiál.
Bainhira la tuir norma no kompromisu ne’ebé iha maka Povu nia Direitu atu altera ka halakon tiha governu ida-ne’e, no atu harii governu foun, hodi tau nia fundasaun iha prinsípiu sira-ne’e no organiza nia podér sira iha forma ne’ebé parese liu ba sira-nia efeitu Seguransa no ksolok ba bem commun povu nian.
Tuir Montesquieu, ezisténsia governu demokrátiku maka ema sira ne’ebé maka iha podér supremu iha kualidade “virtude públika”, signifika katak sira hetan motivasaun hosi hakarak atu atinji bem públiku la’os interese individu. Maski virtude públika bele la nesesáriu iha monarkia ida no konserteza la iha rejime despótiku sira, nia tenke prezente to’o grau ruma iha repúblika aristokrátiku sira no to’o grau boot iha repúblika demokrátiku sira. Montesquieu afirma katak lahó virtude públika ne’ebé forte, repúblika demokrátiku ida provavelmente sei hetan destruisaun hosi konflitu entre “faksaun” oioin, ida-idak buka nia interese ki’ik rasik hodi estraga bem públiku ne’ebé luan liu. Nia argumenta, Soberania povu nian, labele aliena ka reprezenta. “Ideia kona-ba reprezentante sira maka modernu,” nia hakerek. ”
Iha sistema demokrasia koñesidu termu isonomia no isogória, katak prinsípiu sira kona-ba liberdade opiniaun no igualdade iha lei nia oin. Situasaun sosio-polítika ida-ne’e mak halo tradisaun dialétika no retórika sai forte liután. Maski nune’e, Platão nafatin kritika sistema demokrasia, tanba tuir nia bele hamosu sentimentalidade (hanesan polítika identidade) no bele rezulta injustisa.
Aleinde ne’e, liberdade iha demokrasia bele hamosu oligarkia ephitumia nian, nomeadamente grupu ne’ebe mak kaer ukun tanba rikusoin atu kaer ukun no sira iha objetivu atu asegura sira-nia interese. Ho liafuan seluk, iha objetivu atu buka tuir hakarak mundu nian. Entretantu, tuir Platão, lider sira tenke hili bazeia ba razaun rasionál, hanesan bazeia ba abilidade.
Iha sistema polítiku demokrátiku, iha mós termu espasu públiku ka public sphere. Budi Hardiman, iha ninia livru ho títulu Espasu Públiku, esplika katak bazeia ba literatura iha siénsia sosiál no filozofia, espasu públiku hanesan palku ida ba komunikasaun polítika no partisipasaun demokrátiku iha estadu jurídiku ida. Se iha Grésia klásiku, espasu públiku iha dalan sira, teatru sira, nst., iha sékulu XXI, diskursu iha ita-nia espasu públiku barak liu akontese iha siber espasu (mídia sosiál). Ida-ne’e sai preokupasaun ba ita hotu, tanba afinál, ita-nia espasu públiku tenke nakonu ho funu ideia no nosaun sira, la’ós atitude sentimentál sira ka diskursu ódiu nian.
Entretantu, Setyo Wibowo, iha nia livru Paidea, esplika saida maka moras iha demokrasia, temi opiniaun hosi Jacques Ranciere, filózofu fransés kontemporáneu ida ne’ebé hatete katak moras iha demokrasia maka bainhira demokrasia domina hosi oligarkia. Nia fahe tipu oligarkia sira ba grupu rua, mak hanesan oligarkia peritu (peritu koñesimentu) no oligarkia investidór.
Peritu oligarkia maka elite polítika, iha ne’ebé atu hetan podér sira presiza lejitimidade husi eleisaun, enkuantu eleisaun presiza kapitál barak, ne’e mak momentu ne’e mak oligarkia investor bele dudu oligarkia peritu (elite polítiku) ne’ebé ho objetivu atu hetan akumulasaun kapitál barak liu tan. Ho liafuan seluk, demokrasia uza hanesan meius ida husi oligarkia sira atu asegura sira nia interese. Ida ne’e hanesan reflesaun ida ba ita hotu, atu hatene keta karik ita nia demokrasia ohin loron iha ona sírkulu oligarkia karik? Hatán ba tuir ita nia perspetiva.
Atu realiza demokrasia ideál ida ne’e, ita presiza afina buat ne’ebé hanaran ethos polítiku iha demokrasia. Budi Hardiman iha nia livru Demokrasia no Sentimentalidade esplika katak saida maka signifika ethos polítiku iha demokrasia maka enerjia ka mentalidade ne’ebé dudu ema ida-idak hodi hala’o demokrasia. Ulun ida de’it konserteza la to’o atu harii demokrasia ida ne’ebé ideál, presiza konxiénsia koletiva ida atu rezolve ida-ne’e.
Adorno propoin iha edukasaun ba maturidade maka atu treinu ita-nia an iha argumentasaun rasionál envezde husik ita-nia an atu hetan rasta husi sentimentu primordiál sira. Ita-nia jerasaun bele hahú ida-ne’e hodi koko aplika ba ita-nia an rasik, atu nune’e ita hatoman an atu nune’e iha futuru bainhira ita assume lideransa, mezmu bainhira ita iha ona família, ita bele aplika ida-ne’e iha ita-nia família, ho esperansa katak ita-nia jerasaun tuir mai bele hadi’a ita-nia kultura polítika no bele kria buat ne’ebé hanaran demokrasia ida ne’ebé ideál. Tanba ne’e presiza hatene, “Ema maka animál polítiku ida ho natureza.” – Aristóteles.
Referénsia:
Burnyeat, Gwen, dan Miranda Sheild Johansson. “An Anthropology of The Social Contract: The Political Power of An Idea.” Critique of Anthropology 42, no. 3 (2022):
221–37. Locke, John. An Essay Concerning Human Understanding. Philadelphia: Kay & Troutman,1847. Grigore, Nora. “Hobbes and Locke in The State of Nature and What Threatens Peace in Society.” Studies in Epistemology & Theory of Values/Studii de Epistemologie şi Teorie a Valorilor 9 (2023): 163–77. Junaedi, Junaedi, dan Agus Dimiyati. “Hakikat Dan Fungsi Negara: Telaah Atas Persoalan Kebangsaan Di Indonesia.” Logika: Jurnal Penelitian Universitas Kuningan 11, no. 01 (2020): 1–9. (Asesu Youtube–https://www.youtube.com/@Media1Timor/Facebook- https://www.facebook.com/Media1Timor/Iha moos Kursu Jornalizmu no Lian Inglesh)
Ita nia komentariu konaba post ne'e.