(Reportajen Guilhermino Ramos/Editora Suzana Cardoso)
Dili (Media ONE Timor) – Membru Polisia Nasionál Timor-Leste (PNTL) na’in ida no membru Forsa-Deveza Timor-Leste (F-FDTL) na’in ida ne’ebé hala’o hela servisu sekretu deskonfia hetan tuda hosi komunidade balun.
Tuir públikasaun ne’ebé fó sai husi Serviços Relações Públicas, Ministériu Interior hateten, membru PNTL no F-FDTL ne’e hetan tuda bainhira sira hala’o hela servisu hodi apoiu check Point ne’ebé Polisia Tranzitu Dili hala’o hela iha estrada Estádiu Munisipál Dili nia oin, Segunda, (14/11/2022).
Hosi asaun tuda subar ho fatuk ne’e, rezulta membru PNTL no F-FDTL sira hetan kanek. Na’in ida ho inisiál MB hetan tuda iha parte kotuk laran. No na’in ida seluk ho naran inisiál CSJ hetan tuda iha parte hasan.
Maibé liu de’it minutu balun Polisia atua kedas iha fatin refere, hodi kaptura komunidade na’in ida ho naran inisiál HP ho nia idade 25. Deskonfia HP maka halo asaun hasoru autoridade seguransa na’in rua ne’e.
Dau-daun ne’e suspeitu HP aseguradu ona husi PNTL Munisipál Dili. No membru Servisu Sekreta na’in rua ne’e, hetan ona tratamentu intensivu husi pessoál saúde iha Sentru Saúde Vera-Cruz.
Motivu husi asaun tuda hasoru parte seguransa ne’e, deskonfia juventude hirak ne’e kontinua la simu vítima José Bernardo ne’ebé mate iha sela Polísia Caicoli, Munisípiu Dili iha fulan hirak liu ba. (Asesu Youtube/Facebook https://www.facebook.com/Media1Timor Media ONE Timor)
Ita nia komentariu konaba post ne'e.