DILI (Media ONE Timor) – Despeza orsamentál duodesimal ba Fulan Abril ho valor U$114.887.000 sei uza mós hodi hola aimoruk no ekipamentus médiku sira hodi hatán epidemia Virus Corona Tinan 2019 (Covid-19) iha Timor-Leste.
Despeza ba hola aimoruk no ekipamentus médiku Covid-19 ne’e Konsellu Ministru (KM) aprova hodi bele hala’o assinatura ba kontratu, entre Governu Timor-Leste (TL) ho Programa husi Nasoins Unidas ba Dezenvolvimentu (PNUD).
“Ministru Negósiu Estranjeiru no Kooperasaun aprezenta projetu deliberasaun, ne’ebé hetan aprovasaun husi Konsellu Ministrus (KM), hodi hafoin asinatura kontratu sei ba hola aimoruk no ekuipamentus médiku sira, relasiona ho Covid-19.”
Esplika Komunikadu Imprensa nebé Redasaun Media ONE Timor asesu hosi Porta-Voz Konsellu Ministru (KM) hafoin remata sorumutuk KM iha Sentru Konvensaun Dili, Loron Kuarta, (01/04/2020).
Komunikadu Imprensa ne’e esplika liutan, iha reuniaun ne’e KM aprova projetu
Dekretu Governu nebé aprezenta husi Ministra Finansas iha ezersísiu, Sara Lobo Brites, kona-ba alterasaun dahuluk ba Dekretu Governu n.° 1/2020, loron 15 Fulan Janeiru
Dekretu Governu n.° 1/2020 ne’e kona-ba ezekusaun orsamentál iha rejime duodesimál iha tinan finanseiru 2020 nian. Alterasaun ida ne’e atu fó dalan hodi realiza atividade normal ba Estadu nian.
No iha mós posibilidade ba ezekusaun husi despeza públika sira to’o limite ne’ebé mak fixa ona iha Orsamentu Jerál Estadu uluk nian no estabelese konjuntu ida hodi salvaguarda no garante jestaun ida ne’ebé prudente ba dotasaun orsamentais.
Ho nune’e, Dekretu Governu, ida ne’e aprovadu ona, no prevé konjuntu husi ezekusaun ba rejime duodesimal, no iha posibilidade hodi rezolve konjuntu husi konstranjimentus ka kendala ne’ebé impede ona Estadu hodi kumpri integralmente ninia obrigasaun.
Obrigasaun hirak ne’e mak hanesan, resposta ba situasaun atual husi emerjénsia provoka husi pandemia COVID-19, no krize ekonómika ne’ebé relasiona ho situasaun sira ne’e.
Nune’e deliberasaun governu, nebé aprezenta husi Ministra Finanças iha ezersisiu, aprezenta despeza orsamentál duodesimal ba Fulan Abril ho total valor U$114.887.000, la inklui empréstimu hetan mós aprovasaun.
Deliberasaun ida ne’e prevé despeza relasiona ho akuizisaun ba; ai-moruk no ekipamentus sira hodi hatán ba Covid-19 nomos pagamentu ba; pensaun, arrendamentu no ba instalasaun husi misaun diplomata sira.
Iha deliberasaun orsamentál ne’e, governu halo suspensaun ba despeza, durante vijénsia estadu emerjênsia mak hanesan despeza ne’ebé relasiona ho viajen lokál sira no viajen estranjeiru, organizasaun husi formasaun no semináriu no mós manutensaun ba veíkulu sira.
Kombate Covid-19
Iha parte seluk Ministra Finansas iha ezersísiu, aprezenta mós projetu Dekretu Governu ida, ne’ebé aprova husi Konsellu Ministru, refere ba alterasaun dahuluk husi Dekretu Governu n.° 3/2019, loron 27 Fulan Marsu.
Dekretu ne’e kona-ba ezekusaun husi Orsamentu Jerál Estado ba tinan 2019. Alterasaun ida ne’e atu fó dalan hodi realiza despeza ne’ebé iha relasaun ho prevensaun no kombate ba COVID-19, ho urjénsia no ho ajilidade (kelincahan), mak hanesan despeza ne’ebé relasiona ho servisu aviasaun, no ho kontribuisaun sira hodi organizasaun internacionais, antes verifika ba efetiva prestasaun servisu ka entrega ba bens sira.
Maibé ba vijénsia estadu emerjênsia, Konsellu Ministrus aprova projetu Decretu-Lei ida nebė aprezenta husi Ministru Obras Públika, Salvador Soares dos Reis Pires hodi estabelese Empreza Públika Be’e Timor-Leste (BTL, E. P.)
Empreza públika BTL, E. P. nia misaun ba prestasaun husi servisu públiku ida ba abastesimentu ka reserva ba bee no saneamentu. Liuhusi investimentu iha konstrusaun, jestaun no fiskalizasaun husi sistema be no saneamentu ba territóriu tomak. Estabelesimentu bee iha níveis servisu uniforme iha abastesimentu husi bee no fornesimentu saneamentu ba populasaun.
Ministru Obras Públika aprezenta mós projetu Dekretu-Lei, ne’ebé aprova husi Konsellu Ministrus, kona-ba kriasaun entidade reguladora ba bee no saneamentu, I. P. (ERAS I. P.).
Institutu públiku ida ne’e sei iha misaun hodi propor, akompanha no assegura ezekusaun ba polítika nasionál iha domíniu husi rekursu hídriku, ho forma atu assegura ninia jestaun sustentável no integrada sira.
Ho nune’e, atu fó garantia ba supervizaun no fiskalizasaun husi setór servisu husi abastesimentu públiku ba bee, no saneamentu husi bee rezidus urbana no resídu sólidu urbanu.
Konsellu Ministrus aprova mós projetu Dekretu-Lei, ne’ebé aprezenta husi Ministru Obras Públikas, ne’ebé mak estabelese kritériu ba kontrolu husi kualidade ba bee hodi bele uza ba konsumu umanu.
Diploma ida nee hetan aprovasaun no hodi estabelese kritériu șira ne’ebé mak defini rekuizitu essensiais sira hanesan, kualidade ba bee hodi bele uza ba konsumu umanu, no ninia objetivu ba protesaun saúde ba populasaun no atu prevene bee nee laiha kontaminasaun, hahú husi halibur bee ne’ebé kualidade too ninia distribuisaun ba konsumidór, no garante ninia abastesimentu ba bee moos no ninia ekilibriu ba kompozisaun. (Reportájem Mario Lobo)
Ita nia komentariu konaba post ne'e.