(Reportajem Angelo da Costa/Editora Suzana Cardoso)
DILI (Media ONE Timor) – Dezemvolve setór turizmu iha Timor-Leste (TL) liu hosi fa’an tikete, Kompañia Nasional Narpov Ateita Air (NAA) ofisialmente lansa tan ninia edifisiu sukursal, iha Universidade Oriental Timor-Lorosa’e (UNITAL).
“Ida ne’e mak ami nia lansamentu sukursal dahuluk, hafoin parseiru ho UNITAL hodi habelar liutan sukursal iha Timor-Leste. Tamba, hanesan ajensia fransain ba Via.com ami iha ona komitmentu hakarak promove setór turizmu nomos setór sira seluk.”
Lia fuan hirak ne’e kasu hosi Diretór NAA, José Alexandre Jeca Guterres ba Jornalista hafoin remata atividade lansamentu sukursal fa’an tiketi nian iha UNITAL, Sexta, (08/07/2022).
Lansamanetu ne’ebé realiza hafoin servisu hamutuk entre Ministeriu Turizmu Komersiu no Industria (MTCI-sigla Portuges) ho UNITAL ne’e tuir Jose Alexandre informa, liu husi lansamentu sukursal ne’e mos atu fó On job training (treinu iha prátika servisu nian) ba estudante finalista UNITAL hirak ne’ebé estuda konaba Tour Travel (viajen turneiu) ka turizmu. No oinsa fa’an tikete.
Hatutan Jose Alexandre, ajensia NAA mós fasilita transferensia osan entre munisipiu. Transfere hosi munisipiu ida ba munisipiu seluk nomoos hosi nasaun seluk mai TL liu hosi Alexandre Money Transfer (AMT).
“Ami mós sai hanesan liman ain promove turizmu ba iha mundu Internasional, liu husi plataforma dizitalizasaun Via.com”, katak Jose Alexandre hodi hatutan, “Setór turizmu produtivu tebes. Nune’e, NAA fó opurtunidade ba foinsa’e sira ne’ebé remata ona estudu iha area turizmu atu servisu hamutuk kria pakote viajem hodi promove setór turizmu.”
Iha sikun seluk Reitor UNITAL Florindo Pereira, hato’o agradese ba NAA ne’ebé fó ona oportunidade ba estudante fakuldade ekonomia, UNITAL para aprende iha fatin refere hodi dezelvolve setór turizmu.
“Liu husi Sukursal NAA nian iha UNITAl ne’e bele fasilita ona estudante Departementu Turizmu para aprende. Husu ba foinsa’e sira ne’ebé mak hala’o hela estudu iha universidade sira, presiza iha koñesimentu, kapasidade no skill ne’ebé naton atu dezenvolve area turizmu”, katak Florindo.
Esplika Florindo, TL seidauk promove nia turizmu atu ema bele haree didiak. Ne’e responsabilidade estudante area turizmu atu promove. Maibé, ajensia NAA nia ajensia faan tikete iha UNITAL para fasilita vizitantes sira konaba oinsa atu ba no mai TL.
“Atu dezenvolve setór turizmu, la’os Governu mesak. Maibé, inklui moos setór privadu nomoos sidadaun hotu-hotu nia servisu hamutuk atu bele promove turizmu iha Timor-Leste. Tamba promove setór turizmu nu’udar solusaun ba dezenvolvimentu sustentavel”, dehan Reitór UNITAL Florindo. (Asesu Youtube/Facebook https://www.facebook.com/Media1Timor Media ONE Timor)
Ita nia komentariu konaba post ne'e.