Governu TL Hetan ICU Mobel

DILI (Media ONE Timor) – Haluan servisu saúde Timor-Leste (TL) nian ba populasaun vulnerável sira no fó kuidadu intensivu ba pasiente Covid19 nian maka Estadus Unidos Amerika (EUA) fó apoiu ekipamentu Intersive Care Unit (ICU) movel.

Tuir enkaregadu negosiu emabaixada EUA, Zema Semunegus ba Jornalista iha Portu Dili, Sesta (24/06).

Katak Zema, TL menus ekipamentu saúde. Maka EUA apoiu ekipamentu ICU movel hodi halo tratamentu emerjensia ba sidadaun iha Hospital Nasionál Guido Valadares (HNGV).

Zema haktuir, ICU movel ne’e sei intrega ba HNGV. Ekipamentu ne’e, sei haluan signifikativamente kapasidade servisu saúde Timor-Leste nian no sei fó kuidadu intensivu ba pasiente Covid-19.

Nia hatutan, apoiu ne’e mai husi povu Amerikanu hakarak ajuda hodi responde ba nesesidade servisu saúde nian. Iha fatin hotu iha nasaun ne’e. ICU nia kapasidade sei aumenta pursentu 150. Kama ICU movel hamutuk sia no mos dezeña inkluzivu atu fornese asesu fasil ba ema ho defisiénsia sira.

ICU movel ne’e, parte ida husu 20 millaun ne’ebé Estadus Unidus oferese hodi apoia Timor-Leste ninia seguransa saude. Inklui doasaun vasina Pfizer doze liu 200,000. Xegada ICU movel ne’e mos reflete kompromisu atual Estadus Unidus nian hodi luta hasoru COVID-19 no moras sira seluk hodi salva vida Timoroan sira nian.

“Komando Indo-Pasífiku Estadus Unidus no Ajénsia Estadus Unidus ba Dezenvolvimentu Internasionál serbisu hamutuk ho ajénsia Nasoins Unidas no Governu Timor-Leste mak harii no fornese ICU movel ne’e”.

Ministra Saude, Odete Maria Freitas Belo hatutan, dezde Timor-leste ukun aan HNGV iha ICU ida ho kama 25 maibe ne’e la-sufisiente. Entaun ho fatin ida ne’e di’ak no kondisaun di’ak liu kompara uluk nian.

“Ha’u hanoin ida ne’ebé bele ajuda la’ós halo tratamentu de’it maibé bele ajuda halo treinamentu ba ICU ne’ebé kona-ba kuidadu intensivu ne’ebé lidera husi apoiu OMS no médiku sira iha HNGV.”

Nia konta, USAID sira promete atu bele fó ICU mobile ida, ne’ebe lalais liu hodi halo atendimentu no Ministériu saúde hein ekipamentu ICU mobile ne’e desde fulan Novembru no ohin simu ona.

MS husu ba parseiru sira nafatin servisu hamutuk ho atividade vasinasaun, ekipamentu ne’e la’os ba covid-19 de’it maibé ba moras seluk.

“Ha’u nafatin ko’alia katak ita husik Covid-19 ne’e ba kotuk no ita koko atu haree moras seluk liu-liu ba inan isin rua sira ba labarik sira ne’ebé presija tebes fatin ida ne’e”, katak ministra Saude Odete Maria Freitas Belo.(Asesu YouTube Facebook Média ONE Timor)