(Reportajen Jornalista Teotonia Neto)
Dili (www.mediaonetimor.co) – Servisu administrasaun públiku tenki hala’o ho meritu no professionál ba atendementu públiku. Nune’e, labele politiza iha prosesu administrasaun tomak. Servi Estadu no povu ho efisien no efikasia.
“Servisu ho meritu no profesionál. Signifika, ezerse funsaun ho didi’ak. Halo atendementu ba públiku ho efisiente no efikasia. Hanesan hatudu ona iha prosesu selesaun por meritu ba pozisaun Diretor Jerál foun ba administrasaun públiku iha Ministeriu Petroliu Rekursu no Minerais (MPRM). Servi estadu no povu ho di’ak, liu husi pozisaun ne’ebé responsel atu ezerse ba.”
Lia hirak ne’e hato’o husi Prezidente Interinu Komisaun Funsaun Públiku (KFP), Fausto da Silva Freitas iha ninia deskursu iha serimonia tomada posse ba Diretor Jerál (DJ) foun administrasaun públiku iha MPRM, iha salaun Garden Beace, Kinta, (19/10/2023).
Nia esplika liutan, iha servisu administrasaun públiku tenki asegura transparente. Kria komunikasaun di’ak ho superior no superiora sira, no mós sub ordinariu sira. Nune’e, bele evita konflitu interese, tantu pesoál no interese groupu.
Prezidente Interinu Fausto husu ba sira ne’ebé servisu ba atendementu públiku atu hala’o sira nia funsaun ho imparsialidade. Liu-liu, tenki evita politizasaun servisu iha administrasaun públiku nian. Hases an husi hahalok prátika korupsaun.
Iha deskursu ne’e, Fausto mos manifesta KFP nia protidaun hodi fó apoiu ba ministeriu sira nia prosesu rekrutamentu. Apoiu ne’e hodi garante imparsialidade. Evita intervensaun, para asegura katak administrasaun públiku harii ho baze ne’ebé forte no permanente. Parte KFP kontinua eziste hodi asegura pontualidade servisu atendementu ba públiku.
“Tanba ne’e husu ba DJ foun ne’ebé hanesan kandidatu admitidu hodi priense ba pozisaun hanesan diretur jerál (DJ) ba MPRM. Tenke esforsu an atu hala’o funsaun sira ho kapasidade meritu. Ne’ebé hatudu ona iha prosesu selesaun por meritu hodi serbí estadu no povu liu husi pozisaun ne’ebé atu haknaar an”, Fausto dehan.
Iha parte seluk Ministru MPRM, Francisco da Silva hatete, pozisaun DJ responsabilidade ida ne’ebé sei hamutuk ho ministru. Kolabora hamutuk ho ministru hodi implementa vizaun no programa polítikas ne’ebé maka planu ona. Servisu ba objetivu ida.
Ba funsionariu sira, Ministru Francisco fó hanoin katak Tmor-Leste (TL) sei tama iha situasaun finanseiru ida ne’ebé difisil iha futuru. Hotu-hotu tenki fó kontribuisaun ba TL, liu husi sobrevivensia ba ekonomia estadu nian. Liu-liu TL nia dependente ba setór Petroliu no minerál bele lao ba oin.
Iha biban ne’e Diretor Jerál Administrasaun Públiku MPRM, Frederico da Costa Maya ne’ebé hetan ona tomada pose hatete, prontu hala’o knaar ho responsabilidade. Prontu servisu hamutuk ho kargu diresaun hotu-hotu. Hamutuk tau perioridade ba planu esensial ministeriu nian. Dezemvolve planu petroliu nian ba projetu tasi mane, para atinji atividade ministeriu nian.
Iha serimonia toma pose ba DJ administrasaun públiku nian ne’e hala’o mós ho nomeasaun ba Diretor no diretora sira iha ministeriu Petroliu rekursu Minerais nian hamutuk nain hitu. Hanesan; kargu Diretor nasionál planeamentu no monitorizasau Moises da Costa, Diretora nasionál administrasaun no Finansas Ana Paula Castro de Jesus, Diretor nasionál jestaun no rekursu humanos David Monteiro, Diretor nasionál aprovozionamentu Manuel Mendonsa, Diretor nasionál teknolojia no informasaun Joanico Mendonsa, inspektur do Gabinete no fiskalizasaun ba auditoria Augusto Barreto no mós Diretora Nasionál komunikasaun no relasaun públiku Ana Lucinda de Araújo Ribeiro. (Asesu Youtube/Facebook https://www.facebook.com/Media1Timor Media ONE Timor)
Ita nia komentariu konaba post ne'e.