DILI (Media ONE Timor) – Tanba konsellu veteranus nian hari’i ona, nune’e bele ona resolve problema hanesan rejidensia ba veteranus ne’ebé dau-daun ne’e Komisaun hosi Parlamentu Nasional sei buka hela solusaun.
“Ho konsellu veteranus ne’ebé hari’i ona ne’e bele sai hanesan sumbrinya hodi halibur veteranus hotu-hotu,” hateten Prezidente Parlamentu Nasional (PN), Arão Noe Amaral ba jornalista iha uma fukun PN.
Nia hateten, konsellu veteranus ne’ebé maka foin hari’i hein katak bele resolve problema hirak ne’ebé liga ba veteranus sira nia moris lor-loron. Tanba, maske simu ona orsamentu maibé seidauk sufisiente.
“Nune’e ho komisaun veteranus ne’e bele solusiona situasaun sira ne’ebé to’o agora, barak maka sei lamenta. Liu-liu konaba rejidensia. Uma ba hela fatin veteranus sira nian. Ami iha PN hari’i ona komisaun ne’ebé sei buka solusaun ba ida ne’e,” katak Prezidente PN, Arão.
Aproveita intervista ne’e Prezidente PN, Arão lori Deputadu iha Uma Fukun PN hato’o desezu loron veteranus ba selebrasaun loron espesial ne’e hodi hamutuk lori nasaun no povu Timor-Leste ba moris ne’ebé diak liutan. (Reportajem Estajiada Ana Maria de Jesus)
Ita nia komentariu konaba post ne'e.