DILI (Media ONE Timor) – Atu bele influensia ema seluk iha moris loron-loron nian hodi halo mudansa ba igualdade jeneru, maka feto Timor-Leste (TL) tenki halo uluk mudansa iha sira nia án rasik nu’udar exemplu ba foin sa’e sira.
“Apresiasaun nu’udar modelu mudansa ba ita nia foin sa’e no labarik sira. Nune’e sira mós bele fiar án. Katak, sira latauk. Tenke eskola diak no estuda makás hodi atinji sira nia mehi,” hateten Diretora Plan Internasional TL, Dalyana V. Daten Ximenes iha nia deskursu selebrasaun loron mundial feto, Kinta, (12/3/2020) iha Palasiu Nobre.
Partisipa iha serimonia selebrasaun loron mundial feto ne’ebé monu iha loron 8 Marsu 2020 ne’e, Primeira Dama Prezidente Repúblika TL, Cidalia Lopez Nobre Mauzinho Guterres, membru governu, deputadu sira, estudante universitariu no estudante secundariu.
Diretora Plan Internasional TL, Dalyana esplika liutan, loron mundial feto nian importante ba hotu-hotu atu selebra. Ba feto no mane sira tenki hamutuk hodi kontribui ba igualdade jeneru.
Tanba hatutan Dalyana, TL iha heroina no heroi ne’ebé barak maka halo ona mudansa ba asuntu igualdade jeneru. Nune’e Plan International TL idenfitika ona, hamutuk feto 12 maka durante ne’e halo ona mudansa iha sira nia papel loron-loron.
“Sira nain 12 ne’e halo mudansa ba asuntu igualdade jeneru hosi aspeitu oin-oin. Nune’e, Plan Internasional TL fó apresiasaun nu’udar modelu ba mudansa foin sa’e no labarik sira para fiar án. Tenke eskola no estuda mak’as. Latauk atu atinji sira nia mehi,” katak Dalyana hodi hatutan.
Apresiasaun ba heroina no heroi sira ne’ebé halo mudansa ba igualdade jeneru ne’e mós, bele motiva labarik to’o foin sa’e sira para halo mudansa ba sira nian án rasik. Inklui, ita hotu nia án rasik. Nune’e bele influensia ema seluk atu halo mudansa ba igualdade jeneru.
Edukasaun Maka Determina
Iha parte seluk ba jornalista iha Palacio Nobre, ida hosi sira ne’ebé simu sertifikadu apresiasaun ba heroina no heroi halo mudansa ba igualdade jeneru, Juiz Maria Natersia Gusmao Pereira hateten, ho edukasaun maka feto sira bele determina sira nia án.
“Feto sira tenki matenek atu determina saida maka sira bele halo mudansa iha futuru. Liu-liu foin sa’e sira ne’ebé hala’o hela sira nia estudu. Tenki tenta atu kumpriende didiak materia hotu-hotu. Para, labele iha difikuldades bainhira simu kna’ar iha sosiedade,” hameno Juiz Natersia.
Maria Natersia Gusmão hala’o nia kna’ar nu’udar juiz desde tinan 2000 to’o agora. Prestasaun iha mudansa igualdade jeneru maka kontribui iha tribunal rekursu desde tinan 2011 no nu’udar juiz.
“Prestasaun mudansa igualdade jeneru ne’ebé hetan, tanba hau nia servisu maka’as. Vontade hakarak estuda. Esforsu barak husi hau nia án rasik. Nune’e, tenki kontinua estuda. Tamba estuda sai matenek, sai nu’udar faktor ida determinante atu halo mudansa,” tenik Juiz Natersia ne’ebé haksolok ho rekunyesementu hosi Plan International ne’e.
Antes ne’e Prezidente Komisaun Organizadora, Lala Soares hato’o relatoriu hodi dehan, selebrasaun loron mundial feto ne’e realiza tanba servisu hamutuk entre Plan Internasional TL ho Gabinete Primeira Dama Prezidente Repúblika.
Hateten Lala, selebrasaun loron mundial feto tinan 2020 nian hamutuk ho Primeira Dama, Cidalia vizita ona Hospital Nasional Guido Valadares (HNGV) iha sala maternidade hodi selebra hamutuk ho feto maluk sira iha ne’eba.
“Ba serimonia selebrasaun loron mundial feto nian hala’o, para bolu atensaun ba ema hotu-hotu hodi kontinua konfiasaun ba direitu feto no labarik feto. No iha futuru sei kontinua kampaña ba sira ne’ebé kaben sedu, isin rua sedu nomos hapara violensia hasoru feto no labarik iha TL,” dehan Lala.
Serimonia selebrasaun loron mundial feto remata ho fahe sertifikadu ba heroina no heroi mudansa ba igualdade jeneru. Koa dosi no aprezentasaun muzika kadalak sorumutuk hosi Plan International TL. Antes atu fahe malu hala’o mós foto hamutuk.(Reportájem Anibal/Maria)
Ita nia komentariu konaba post ne'e.