Formandu Ceftec Vizita Dapur Diáriu Timor Post

DÍLI (Media ONE Timor) – Atu iha kuñesementu klean konaba servisu jurnalistiku emprimi nian, Formandu Centro formação técnica comunicação social (Ceftec), Unidade hakerek imprensa hala’o vizita ba dapur Diáriu Timor Post.

“Bemvindu mai dapur Diáriu Timor Post. Ne’e maka ami nia edifisiu. Nu’udar servisu nain iha negosiu informasaun, ami sempre nakloke a’an atu akumula informasaun hotu-hotu ba nesesidade públiku nian. Liu-liu media ofisiais sira.”

Lia fuan ne’e hato’o husi Diretora Diáriu Timor Post, Santina da Costa Araújo wainhira simu formandu ceftec, unidade hakerek imprensa iha Salaun Diáriu Timor Post, Segunda, (28/09/2020).

Diretora ba diáriu ne’ebé hari’i dahuluk hafoin ukun a’an ne’e esplika, jornál Diáriu Timor Post hari’i husi Timoroan nain 14. Iha tempu okupasaun Indonesia, maioria sira servisu iha Diáriu Suara Timor-Timur (STT). Nain hitu jurnalista. Nain walu seluk servisu iha negosiu no administrasaun.

Tanba internalmente Nain ba Kompaña Timor Post, S.A (Sosio Anonimo) solidu, katak Santina maka Diáriu Timor Post sei eziste to’o agora. Maske hasoru dezaviu oin-oin. Liu-liu iha situasaun impasse politika no pandemia covid19.

“Hahu tinan 2018 to’o agora, aumenta tan ho pandemia Covid19 halo sirkulasaun osan iha Timor-Leste (TL) menus ba beik-beik. Nune’e afeita teb-tebes ba reseita negosiu jornál no públisidade. Ema lakohi sosa jornál. Governu no emprezariu sira lakohi monta públisidade. Ida ne’e afeita reseita jornál,” katak Santina hodi hatutan.

Hafoin impasse politika iha tinan 2017 sei aguenta to’o tinan 2018, Diáriu Timor Post ne’ebé antes ne’e públika to’o Dominggu, agora to’o deit Sabadu. Husi pajina 20 tu’un ba pajina 16 deit. Nomos hapara ona funsionariu lubuk ida.

Maske jornál tuan, iha tinan 2020 barak maka hari’i tan jornál. Nomos, prezensa telekomunikasaun husi internet ne’ebé avansadu, halo ema hotu-hotu fasil fahe no asesu informasaun liu husi media sosiais sira. Nune’e, hamenus vontade ema atu le’e jornál.

Maske nune’e katak Santina, komitmentu Nain ba Compaña Timor Post, S.A tenki lori diáriu ne’e ba oin. Esforsu tomak sei hala’o. Liu husi meus oin-oin, ida husi ne’e maka loke ona online Diáriu Timor Post.

Aliende ne’e Kompaña Timor Post, S.A, desde tinan 2002 to’o tinan 2019 loke ona formasaun jornalizmu baziku ba foin sa’e sira ne’ebé hakarak atu sai jornalista. Maioria media iha Timor-Leste (TL) uza eis formandu no eis jornalista Timor Post nian.

“Ami nain 14 iha komitmentu atu lori jornál ne’e ba oin. Ho style rasik, jornál Timor Post sei eziste nafatin to’o mundu ne’e remata. Ami hakarak Jornál Timor Post ema kuñese loron ba loron, maske loron ruma ami laiha ona iha mundu,” hateten ida husi Nain ba Diáriu Timor Post ne’e.

Hanesan públika ona antes ne’e katak, Kompaña Timor Post,S.A hari’i husi Timoroan nain 14. Mak; Suzana Cardoso, Aderito Hugo da Costa, Santina da Costa Araujo, Rosa Garçia, Claudio Araujo Martins (matebian), José Ximenes, Lourenço Vicente Martins, Joao Barreto, Otelio Oté, Afonso da Costa, Jacob Ximenes, Domingos Freitas, Antonio Marcos no Ilidio de Carvalho.

To’o tinan 2020 kompaña Timor Post, S.A aliende hala’o negosiu Diáriu Timor Post, loke mós Sentru Formasaun Jurnalismu (SFJ) baziku no iha website. Iha ona makina empressora rasik.

Media Ofisiais Aprezenta dadus
Iha parte seluk Diretora Diáriu Timor Post, Santina husu ba formandu Ceftec ne’ebé sei hala’o servisu nu’udar media ofisiais para hakerek komunikadu imprensa mai redasaun Timor Post tenki aprezenta ho dadus.

Katak Santina, dadus nu’udar evidensia ba faktus informasaun ne’ebé hakerek iha komunikadu imprensa. Aprezentasaun dadus ho klaru, sei konfense media sira públika komunikadu imprensa ne’e. No dadus sei fortifika informasaun.

Aleinde ne’e dehan Santina, hakerek komunikadu imprensa tenki ba interese públiku. Informasaun ne’ebé refere ba individual ka interese groupu, Diáriu Timor Post sei la halo públikasaun. No desijaun atu públika depende ba enkontru editorial. Molok halo públikasaun sei hetan edita.

“Media ofisiais sira nia komunikadu imprensa haruka mai Diáriu Timor Post dala barak soe ba lisu. Tanba, informasaun la konvense ami hodi públika. Balun informasaun la kompletu 5 W (what, why, who, where no when) nomos How,” katak Santina.

Tuir Santina, maioria media ofisiais sira la le’e jornál. Nune’e, kuandu haruka konvite mai Diáriu Timor Post, maske sefi redasaun troka ona, maibé naran iha konvite ne’e sei uza nafatin. To’o agora barak maka sei hakerek sala ba naran sefi redasaun.

Direitu de Resposta Tuir deadline
Lia fuan hanesan mai husi Sefi redasaun Diáriu Timor Post, Carlos Malilaka. Nia hateten, media ofisiais nia komunikadu ne’ebé haruka mai Diáriu Timor Post dala barak la hetan públikasaun. Tanba, informasaun sira iha laran halo editor sira konfuzaun.

Katak Carlos hodi fo ezemplu; sala hakerek lia fuan komunikadu imprensa no konferensia imprensa. Ne’e sei fo kunfuzaun iha parte “ne’ebé” (where) eventu ne’e hala’o. Hakerek informasaun la struturadu hodi fo duvidas ba politika redasaun.

“Komunikadu imprensa ne’ebé media ofisiais sira haruka mai, hakerek kona-ba atividade ne’ebé jurnalista Timor Post la partisipa. Maibé fali; tuir konferensia imprensa ne’ebé hala’o iha fatin balun. Ne’e fo kunfuzaun mai editor sira etu edita,” dehan Carlos.

Nia esplika liutan, Diáriu Timor Post iha Departementu redasaun halo jestaun konaba notísia no departementu negosiu jere públisidade no sirkulasun. Media ofisiais iha relasoens públikas dala barak konaba públisidade telephone hotu mai sefi redasaun.

“Kaundu hakerek konvite mai hodi husu ba halo kobertura, haruka mai sefi redasaun. Konvite hotu-hotu labele diriji ba Diretora Timor Post. Seluktan mak, dala barak relasoens públikas telephone mai koalia konaba públisidade, depois esplika hau hateten ne’e laos hau nia servisu. Haré iha jornal dere ba negosiu nian,” esplika Carlos hodi hatutan.

Funsionariu media ofisiais, loron-loron tenki check notísia ne’ebé públika ona. Hetan faillansu husi hakerek notísia sala, hatan kedas ho karta direitu ba resposta. Kuandu la halo check list ba notísia, superior sira koalia sala liu loron 21 data públikasaun notísia tuir lei komunikasaun sosiál labele ona halo direitu ba resposta.

Maibé husi check list, katak Carlos, hetan sala hakerek notísia bele halo kedas karta direitu de resposta. Labele hein to’o liu tiha fulan ida maka hakfodak. Tuir lei to’o deit loron 21 bele halo direitu resposta. Liu prazu ne’e la konsidera ona.

“Ami iha ne’e servisu 24 óras. Hanesan korente motor ne’ebé kabuar. Labele kotu. Ida kotu, jornál sei la públika. Hahu dader tuku 08:00 ÓTL jornalista ho koordenador kobertura halo enkontru kobertura. Remata husi ne’eba mai hakerek notísia,” dehan Carlos.

Nia hatutan, deadline hatama notísia to’o lorokraik tuku 15:00. Ba notísia extraordenariu to’o tuku 17:00. Editor simu kedas lista notísia enkontru, no edita to’o kalan tuku 22:00, kuandu laiha notísia extraordinariu. Parte Lay out deseñu antes atu emprimi.

Husi produsaun simu notísia husi lay out hodi kontinua ba emprimi. To’o tuku 04:00 madrugada sirkulasaun simu jornál lori ba fahe kliente iha Dili laran. Balun seluk haruka liu husi bus ba munisipiu sira. Fahe jornál to’o dader 10:00, iha tempu ne’eba jornalista ba rekolla ona informasaun ba jornál edisaun loron aban nian.

Iha sorin seluk Formadora Ceftec, unidade hakerek imprensa, Suzana Cardoso reforsa katak, durante óras 80 aliende hetan materia kona-ba hakerek no halo reportájem notísia, formandu sira mós hetan materia konaba hakerek komunikadu imprensa no hakerek karta direitu ba resposta.

Vizita formandu Ceftec remata ho vizita ba fatin servisu ekipa; redasaun, negosiu, administrasaun no ikus liu iha fatin makina emprimi jornál Timor Post nian, hodi hare diretamente prosesu servisu media emprimi nian.(Reportájem Formandu Ceftec Juvinal de Araujo/Gil Danilo de Menezes Ximenes)