MEDIAONETIMOR-Hafoin partidu mais votadu husu atu adia pose ba IV Lejislatura Parlamentu Nasional (PN) nian tanba formasaun VII governu seidauk preparadu, Prezidente Repúblika (PR), Francisco Guterres Lú Olo konvoka hikas enkontru hó partidu Fretilin, CNRT, PLP, PD no Khunto.
“Ami Khunto nia posizaun hakarak koligasaun. Maibé kona-ba insidensia pois mak haré fila fali. Husi Khunto fó sai ona estigmentu hakarak koligasaun para atu bele hare liu ba nasaun nia estabilidade.”
Hatan Prezidente Partidu Khunto, Armanda Berta Dos Santos ba jornalista sira hafoin remata enkontru ho PR, Lú Olo iha palasiu Prezidensial, Tersa, (29/08/2017) hodi koalia konaba progresu formasaun VII governu.
Prezidente Partidu Khunto ne’e dehan, Partidu Fretilin rasik deklara katak sei forma governasaun ho modelu insidensia Parlamentar ho inklusaun. Maibé Khunto nia posisaun hakarak koligasaun hanesan hatu’ur ona iha Konstituisaun RDTL.
Hanesan hateten iha konstituisaun Kápitulu II; Formasaun no responsabilidade artigu 106 (Nomeasaun), 1. Primeiru-Ministru hili hosi partidu ida ne’ebé iha votu barakliu ka hosi aliansa partidu sira-ne’ebé iha nia ema barak iha Parlamentu no iha nomeasaun hosi Prezidente-Repúblika, wainhira rona tiha partidu politiku sira ne’ebé iha reprezentante sira iha Parlamentu Násional. (2) Membru Governu siraseluk, Prezidente-Repúblika mak sei hili liu husi Xefe-Ministru nia proposta.
Antes ne’e website www.mediaonetimor.com iha notisia ho titlu “PLP Tama Iha Inkluzaun, PD Hakarak Tama Iha Prosesu”, Sekretáriu Jeral Partidu Fretilin, Mari Bin Amude Alkatiri lia tu’un ba jornalista hafoin remata sorumutu hó estrutura PD iha Ótel Novo Turizmu, (18/08/2017) hateten katak, Fretilin la-manan absoluta maka prontu buka dalan para bele iha plataforma diak atu inklui nafatin rekursu poténsial husi partidu seluk no ema independente husi governasaun foun ba mandatu tinan 2017 to’o 2022.
“Hau hanoin iha komprendesaun katak, PD hakarak tama iha prossesu. No tuir diresaun Fretilin nian sempre iha dalan ida ne’e mak lós duni. PD la ejije buat ida maibe PD hakarak deit kontribui,” haktuir Mari.
Nia esplika liu tan, koligasaun iha. No lao daun-daun ona. Mak Fretilin, PLP, Khunto ne’e para atu hetan maoria absoluta ida para sustenta governu. Sustenta para programa atu halo Nasaun TL buras liu hó 6 H.
“Maibé hau hanoin governu ida ne’ebé atu mai sei forte liu tan. Tanba PLP tama iha inkluzaun. Iha inklusaun ne’e para ema hotu-hotu partisipa iha prosesu. Laos atu hatama hotu iha governu ne’e lae prosesu governasaun,” tenik Mari.
Armanda esplika liutan, iha sorumutu ho PR, Lú Olo koalia kona-ba plataforma koligasaun atu kolabora ho partidu mais votadu hodi aselera lalais ninia produsaun dokumentus. Maibé, diskusaun ba formasaun governu entre Khunto ho Fretilin lao hela.
Ba PR Lú Olo Armanda hateten, Partidu Khunto fo hanoin para atu aselera lalais plataforma governasaun. No mos oinsa partidu Fretilin, PLP no Khunto tu’ur hamutuk para haré lalais koligasaun. Nune’e, loron 5 Setembro 2017 fiar katak sei realiza duni VII Governu Koligasaun.
PLP Hakarak Koligasaun
Maibé tuir Prezidente Partidu PLP, Taur Matan Ruak hafoin remata hasoru malu hó PR Lú Olo iha Palasiu Prezidensial, Tersa, (29/08/2017) ba jornalista deklara, PLP hakarak Governu Koligasaun. Laos Insidensia Parlamentar no Inkluzaun hanesan fo sai husi Partidu Fretilin.
“Ami agora deskute liu maka konaba koligasaun. Tanba ne’e PLP kontinua deskuti ba nia posizaun liuliu ba Governu Koligasaun no garante katak diskusaun entre PLP ho FRETILIN sei hetan solusan diak,” dehan Taur.
Nu’udar lideransa ba partidu ne’ebé hili husi povu Timor-Leste Taur hateten, sira garante ba Prezidente katak diskusaun kona ba formasaun VII governu la kleur tan bele hetan akordu prinsipiu ida asenta koligasaun ida ne’ebé sei forte iha periodu tinan 2017 to’o 2022.
Fretilin Simu Dokumentu
Hanesan públika tiha ona iha media nasional, Adjuntu Sekertariu Jeral Partidu Fretilin Jose Reis hateten, Fretilin simu ona dokumentu ida ne’ebé maka Fretilin intrega ba PLP ho Khunto halo sira nia apresiasaun.
“Ohin ami husi ekipa negosiasaun neebe lidera husi Sekertariu Jeral Partidu Fretilin Mari Alkatiri, halo apresiasaun ba dokumentus Minuta ba akordu koligasaun, no orsida loraik ami sei iha inkontru ida ho PLP para atu aserta ekslarese ba malu konaba dokumentu prinsipiu ba koligasaun nee, aban mos ami sei iha inkontru ida ho PD, Khunto depois ho CNRT,” dehan Adjuntu Sekjer Fretilin Jose Reis, ba jornalista sira, iha sede CCF, Comoro, Dili.
Nia dehan, Fretilin foin simu PLP nia feedback ida, agora Fretilin ho PLP atu tur hamutuk fila fali, hodi kolia konaba dokumentu ida nee. Prosesu nee tuir Jose Reis katak, lao no ema hotu hatene katak, loron 5 Setembru meja Parlamentu hamrik, depois bele konklui tempu ba iha formasaun VII Governu.
Iha biban nee mos Adjuntu Sekjer Fretilin Jose Reis hateten, Estatu Fretilin nian klaru rezultu eleisaun povu husu atu Fretilin lidera prosesu ida, no povu hakarak mudansa, maibe atu deside lolos se maka sai Peremiru Ministru sei hare iha membru CFF atu bele foti desizaun ida nee ba oin. (Reportájem Aderito Ximenes/Mario Lobo)
Ita nia komentariu konaba post ne'e.