KUALA LUMPUR, Malazia (www.mediaonetimor.co) – Hafoin deklarasaun ofisiál sai membru ASEAN iha loron Domingu, 26 Otobru 2025, Governu Timor-Leste (TL) oferese almosu fraternidade ba nasaun membru ASEAN sira. Inklui Sekretariu Jerál ONU, Antonito Guterres no mós Prezidentii Konsellu Uniaun Europeia, Antonio Costa.
Almosu ne’ebé hetan mos partisipasaun husi emprezariu Malazia balun, Xefi Bankada Parlamentu Nasionál, Xefe Estadu Maior Jenerál Falintil-Forsa Defeza Timor-Leste (F-FDTL), Tenente Jenerál Falur Rate Laek, membru IX Governu konstiuisionál ho emprezariu Timoroan sira.
Almosu ne’e mos nu’udar sentidu agradesimentu ba nasaun membru ASEAN ne’ebé ho ofisiálmente simu ona Nasaun Timor-Leste sai família boot nu’udar membru ASEAN permanente ba da-11.
Primeiru Ministru (PM), Kay Rala Xanana Gusmão iha serimonia almosu ne’e hato’o agradesimentu ba Xefe estadu sira husi nasaun membru ASEAN no Sekretariu Jerál ONU, inklui Prezidenti Konsellu Uniaun Europeia, ne’ebé hola parte iha almosu fraternizaun ida ne’e, hafoin TL adere ba ASEAN ba dala-11.
“Ha’u hato’o ida ne’e ba governu no povu Malazia nian no ba ita-boot nia estadu membru sira hotu ne’ebé ho fuan bele simu Timor-Leste iha familia boot iha ASEAN,” hatete PM Xanana iha Kuala Lumpur Convention Center, Malazia, Segunda, (27/10/2025).
No liu husi selebrasaun espesiál ida-ne’e, PM Xanana fiar sei hametin liutan amizade entre nasaun membru liu husi Timor-Leste nia dansa kultura, no muzika sira iha fatin ida-nee.
“Ohin loron, ami kontente atu fahe ami nia kultura, nu’udar identidade nasaun Timor-Leste liu hosi almosu fraternidade ida ne’e, hanesan beleza no espiritu. Ida-ne’e maka ami nia maneira atu hato’o agradesimentu,” PM Xanana katak.
Iha fatin hanesan, Primeiru Ministru Malazia, Seri Bin Anwar Ibrahim, sente orgullu tanba Timor-Leste bele hola parte ona iha nasaun membru ASEAN ba dala-11.
“Ami bele hatudu ba ita-boot sira, katak parseiru ida ne’ebé loos no funsionál. Ami mos kompriende ita-boot sira nia aspirasaun nakloke. No mai ita hamutuk harii ASEAN,” dehan PM Malazia Anwar Ibrahim.
Portantu, hola parte iha almosu ne’e mak Primeiru Ministru Malazia Datuk seri anwar Ibrahim, Sultan Brunei, Sultan Hassanal Bolkiah, Prezidenti Republika Indonezia (PR-I) Prabowo Subianto, Primeiru Ministru Kambodia, Sonexay Siphandone, Primeiru Ministru Singapura Lawrence Wong, Primeiru Ministru Tailandia Anutin Charnvirakul, Prezidenti Filipina Ferdinand Marcos JR, Prezidenti Timor Leste Jose Ramos Horta, Primeiru Ministru Timor Leste Kay Rala Xanana Gusmão inklui Sekretariu Jeral ONU Antonito Guterres nomos Prezidenti Konsellu Uniaun Europeia, Antonio Costa. (Asesu Youtube-https://www.youtube.com/@Media1Timor/Facebook- https://www.facebook.com/Media1Timor/Iha moos Kursu Jornalizmu no Lian Inglesh)
Ita nia komentariu konaba post ne'e.