Governu-UNFPA Lansa Sentru KEmON-B

(Reportajen Jornalista Media ONE Timor Mariquita Freitas-Iria da Cunha)

Gleno (www.mediaonetimor.co) –  Redus taxa mortalidade no morbidade inan no oan sira iha Timor-Leste (TL) maka Governu servisu hamutuk ho UNFPA (United Nations Population Fund) lansa Sentru kuidadu Emerjensia Obstetriku no Neo-natal Baziku (KEmON-B) iha Postu Administrativu Glenu, Munisipiu Ermera.

Haktuir Vise Premeiru Ministru no Ministru Koordenador ba Assuntus Sosiais, Dezemvolvimentu Rurál no Rehabitasaun Komunitaria (MDRHK), Mariano Assanami Sabino, Reprezentante Embaixadora Australia iha TL, Caitlin Wilson no Diretur Demographic Health Survey (DHS), Antonio Fatima de Deus iha loron Tersa, (23/04/2024), iha serimonia lansamentu ne’e katak, presiza hotu-hotu nia kolaborasaun hodi redus numeru mortalidade no morbidade iha TL.

Hatete Vise Premeiru Ministru (VPM) no Ministru Koordenador ba Assuntus Sosiais, Dezemvolvimentu Rurál no Rehabitasaun Komunitaria (MDRHK), Mariano Assanami Sabino, redus taxa mortalidade no morbidade iha TL maka Governu involve ona iha planu dezenvolvimentu nasionál no planu estratejia nasionál iha setor saúde tinan 2011 to’o 2030.

“Taxa mortalidade materna iha ita nia nasaun hatudu redusaun ba mortalidade inan nian iha tinan barak nia laran, no ikus liu iha tinan 2016 hatudu katak inan sira entre 195 to’o 100.000 maka mate. No numeru ne’e sei konsidera as kampara ho nasaun sira seluk iha rejiaun Sudeste Aseatiku.”VPM Assanami esplika.

VPM Assanami mos husu ba xefi saúde no pesoál  saúde sira iha Munisipiu Ermera  tenke serbisu professional. Liu-liu ba serbisu kuidadu emerjensia obstetriku no neotanal baziku hodi salva inan isin rua no inan tuur ahi. Inklui, bebè sira.

Katak VPM Assanami, servisu saúde la’os kualker profisaun. Serbisu saúde nian laos tanba osan. Maibé, profisaun ne’ebé ezizi fuan boot husi doutor, enfermeiru no parteira sira. Tanba, tenki tau as komprimisiu salva ema nia moris.

Maibé haktuir VPM Assanami, atu atendementu ne’e professionál liutan ho tau as interese humana maka presiza hasa’e liutan kapasidade salva ema nia moris. Pesoál saúde sira tenki kapasati an ho formasaun. Nune’e, atendementu salva ema nia vida bele la’o ho di’ak.

“Atendementu fuan boot maka fó garantia ba ema moras sira. Liu husi atende ho oin mamar, oin hamnasa ka oin midar maka pasiente sira sei sente hakmatek no seguru.  Tenki asegura atendementu ne’ebé seguru, nune’e sira senti hanesan sira hamutuk ho família sira”, VPM Asanami dehan.

VPM Assanami moos fó agradese ba Embaxaidora Australia ne’ebé fó ona apoiu ba Governu TL, liu husi UNFPA hodi hadia serbisu area saúde nian. Lansamentu KEmON-B ne’e bele fó benefisiu no satifasaun ba komunidade Ernera nia moris saudabel.

Iha parte seluk representante Embaixadora Australia iha TL, Caitlin Wilson konta katak, Governu Australia no Governu TL dezde uluk serbisu hamutuk hodi fó apoiu ba ministeriu saúde iha TL. Maibé, triste kuandu rona taxa mortalidade kontinua aumenta sa’e. Nune’e, liu husi apoiu UNFPA lansa  KEmON-B ne’e bele miniza númeru ne’e.

“Liu husi KEmON-B ne’e hodi fasilita servisu ministeriu saúde bele atende ho profesionál liutan. No apoiu ne’e moos ho esperansa hodi hatun taxa mortalidade no morbidade iha Timor-Leste. Liu-liu atendementu ne’ebé professional liutan ba inan isin rua no bebé sira. Tanba sira maka alvu ba numeru mortalidade no morbidade ne’ebé as ba bei-beik”, Caitlin dehan.

Lia fuan hanesan moos hato’o husi representante UNFPA, Bruce Campebell. Nia esplika, lansamentu fasilidade Sentru KEmON-B iha Postu Gleno ne’e ba dala lima ona.  Tuir mai sei lansa tan sentru KEmON-B hamutuk 22.

“Hodi redus taxa mortalidade no morbidade ba inan no oan sira maka ohin  iha loron importante ida ne’e ita lansa sentru KEmON-B ne’e. Lansamentu ne’e marka historia boot ba  apoiu serbisu UNFPA ba ministeriu saúde nian. No UNFPA sei kontinua supporta ministeriu saúde iha futuru”,  afirma Bruce.

Xefi Demographic Health Survey (DHS), Enf. Antonio Fatima de Deus hatutan, Munisipiu Ermera nu’udar faze dahuluk ba programa KEmON-B ne’e sei kolabora hamutuk ho primeiru mediku,  enfermeiru, parteira no tékniku aleadu na’in 86. No halo ona rekrutamentu ba iha autoridade  munisipiu hamutuk na’in 34.

Nune’e Antonio dehan, hamutuk na’in 120 maka prontu ona atu aloka ba sentru saúde no postu saúde sira hotu. Pesoál saúde hirak ne’e sei priense fila fali fatin sira ne’ebé mamuk, hafoin pesoál saúde hirak ne’ebé nia kontratu remata ona iha loron 31 fulan Desembru tinan 2023.

“Tuir mapamentu, ami iha postu saúde 38, postu tratamentu rua no sentru saúde hitu ne’ebé maka  pesoál saúde kontratadu sira sei koloka ba iha rekrutamentu fase primeiru nian.  Ba kolokasaun infermeiru sira iha postu no sentru saúde la-hanesan. Balun infermeiru nain ida de’it no balun seluk na’in rua ”, Antonio esplika.

Antes pessoál saúde sira dezloka ba postu saúde hodi fó atendimentu katak Antonio, pesoál saúde hirak ne’e sei hetan orientasun minimál semana rua iha sentru saúde.

Antonio rekuñese pesoál saúde ne’ebé rekruta iha etape dahuluk la sufisiente. No tuir mapamentu sei kontinua halo rekrutamentu iha etape daruak no datoluk. Iha etape tuir mai, identifika ona atu aumentatan mediku, parteira no enfermeiru entre ema na’in 40 to’o 50 de’it, hodi priense fatin sira hotu.

Relata Antonio, provizoriamentu moras ne’ebé aas iha Munsipiu Ermera mak ispa no diarea. Ba moras diarea as, tanba dau-daun ne’e mundu hasoru mudansa klimatika. No TL iha hela iklima udan. Nune’e, komunidade laiha preparasaun ba atetude sira hodi prevene moras diarea.

Moras ispa kontinua as katak Antonio, tamba komunidade kontinua sunu ahi hodi tein no nafatin fuma. Ida ne’e maka fó impaktu ba bebe sira bele hetan moras bronkok. Maibé, ekipa promosaun saúde nian nafatin halo edukasaun sivika hodi bele muda atetude fuma no sunu ahi.

“Kona-ba aimoruk iha Ermera sufsiente. Bainhira hetan pedidu regular no pedidu emerjensia sempre fó atendementu. Kazu perigu hanesan dengue komesa fulan Janeiru to’o Abríl tinan ne’e rejistu na’in 85.  Frekuensia nafatin aumenta kada loron”, Antonio hatete hodi hatutan.

Moras hirak ne’ebé aumenta ba bei-beik, nafatin esforsu hodi hadia no halo intervensaun ba komunidade nia atetude moris. Hasa’e mos promosaun frekuensia ba iha komunidade, sentru saúde no  kontrola ho regular ba ekipamentus hodi nafatin sufisiente. (Asesu Youtube/Facebook https://www.facebook.com/Media1Timor Media ONE Timor)