Haksolok Tinan Hitu Ona, Deskonfia Taka Naran Ba Roo Seluk

(Reportajen Asistente Editor Marcelino Tomae/Editora Suzana Cardoso)

DILI (Media ONE Timor) – Tinan hitu ona roo haksolok ne’ebé sosa iha Portugal no fó bensaun ona hosi Bispo Dom Carlos Filipe Ximenes Belo,SDB seidauk mai Timor-Leste (TL), maka deskonfia autoridade prinsipál hosi Rejiaun Administrativu Espesiál Oe-Kussi Ambenu (RAEOA) halo manipulasaun naran hodi troka roo seluk.

“Roo ne’e laiha ona. Keta halo RAEOA buka meius hola fali roo seluk ho nia modelu kuaze atu hanesan roo ida agora dadaun ne’e. Pois hakerek nia naran iha isin lolon de’it. Taka fila fali roo ida agora dadaun ne’e ne’ebé sei hadia nia estaleiru. Dezde uluk temi de’it roo nia naran. Maibé isin lolon laiha.”

Hatete membru Bakanda opozisaun Kongresu Nasionál Rekonstrusaun Timorense (CNRT-sigla Portugeza) Deputadu Domingos de Carvalho ba Jornalista iha resintu uma fukun Parlamentu Nasionál, bainhira pauza debate Orsamemtu Jerál Estadu (OJE) ba espesialidade, Kinta, (17/11/2022).

Deputadu Domingos haktuir, tinan-tinan sempre tau osan. Maibé roo haksolok seidauk mai. Lider Fretilin Rogero Lobato ba halo video. Roo laran mamuk. Laiha makina roo. Hela de’it roo nia isin lolon ho kondisaun aat ona. Tanba didin de’it ho triplex.

Informa Deputadu Domingos, iha V Governu Konstitusionál bainhira fó posse ba Eis Prezidente Autoridade RAEOA Mari Alkatiri hato’o pedidu sosa roo haksolok hodi troka roo Nakroman iha momentu ne’ebá. Hasai tiha osan hodi sosa, to’o agora roo ne’e la mai de’it.

Nune’e Deputadu Domingos, husu ba Komisaun ‘E’ trata asuntu infrastrutura ninian atu uza OJE tinan 2023 ninian hodi halo fiskalizasaun ba roo haksolok. Deputadu sira too rasik iha fatin, hodi haree ho matan roo ne’e nia konidsaun.

“Labele rona de’it hosi Prezidente Autoridade RAEOA, dehan roo haksolok sei mai. Husu hela de’it osan hodi hadia, maibé la mai hela de’it. Ita koalia nia klamar, isin lolon laiha”, Deputadu Domingos esplika hodi hatutan.

Prezidente Parlamentu Nasionál, Aniceito Longuinhos Guterres Lopes halo diskriminasaun boot. Sira komisaun ‘E’ hiit liman para hato’o preokupasaun kona-ba roo ne’e. Maibé, halo vinji la hetan. La fó tempu ba komisaun ‘E’ hodi ko’alia.

Hatan Jornalista kona-ba investigasaun katak Deputadu Domingos, Komisaun Anti Korupsaun (KAK) nia investigasaun la’o dadauk ona. Tribunal de contas mós deteta tiha ona problema sira.

Katak Deputadu Domingos, tuir loloos kuandu tama tiha ona tribunal de contas deteta ona iregularidade, tenke hapara ona osan. Labele tau beibeik osan konstrui roo ne’e.

Antes ne’e iha plenaria debate OJE tinan 2023, Prezidente RAEOA, Arcenio Paixão Bano hatan sira ne’ebé hatete katak RAEOA hasai osan milliaun 14 USD ba investimemtu roo haksolok, me’e laloo. Tanba osan too haksolok seidauk gasta hotu.

“Ita sosa sosiu 95 % ho mil 133 €. Ita la gasta osan barak. Tanba sasán balu sei iha ne’ebá ita nian. Nune’e ita tenke halo marketing hodi hatama fali osan ida ne’e maka investimemtu ba rai li’ur” Prezidente Autoridade RAEOA Arceino hatete. (Asesu Youtube/Facebook https://www.facebook.com/Media1Timor Media ONE Timor)