(Reportajen Jornalista Media ONE Timor-Iria da Cunha)
Dili (www.mediaonetimor.co) – Hametin liña ko’ordenasaun hodi kontrolu atividade komersiál órgaun no meius komunikasaun sosiál iha media ne’ebé ezisti iha Nasaun Timor-Leste (TL) nian, maka Konsellu Imprensa (KI) no Server,I.P (Servisu Rejistu no Verifikasaun Emprezariál, Institutu Públiku) estabelese nota entendimentu.
Tuir Prezidente KI, Otelio Oté no Diretor Exkutivu Serve,I.P, Fausto Soares Dias hafoin remata asina nota entendimentu iha salaun KI, Kintal Boot, Dili, Tersa, (11/02/2025) ba Jornalista hatete, estabelesimentu nota entendementu entre KI ho Serve ne’e hodi hametin liu tan liberdade imprensa no liberdade espresaun iha TL.
Prezidente KI, Otelio Oté esplika, nota entendimentu ne’e nu’udar nesesidade ba liña ko’ordenasaun hodi tau matan ba servisu órgau no meius komunikasaun sosiál rádiu no televizaun sira husi nivél nasionál no internasionál ne’ebé hala’o atividade komunikasaun sosiál nian iha nasaun ne’e.
“Tanba, konsellu imprensa maka reprezenta Estadu Timor-Leste hodi rejista orgaun no meius komunikasaun sosiál sira atu bele hetan rekoñesimentu ba sira nia atividade komersiál nian. Liu husi, fó formatu no entrega sertifikadu rekoñesimentu. Maka Server,I.P. nu’udar tarzetu importante iha asina memorandu ne’e”, Otelio Oté dehan.
Nune’e Otelio Oté hatutan tan, presiza teb-tebes iha akordu tékniku sira hamutuk ho Server, I.P ne’ebé fó lisensa komersiál nian. Nune’e, sei hametin liu tan ko’ordenasaun iha verifikasaun legál tuir rekezitus ne’ebé KI no Server, I.P iha.
“Ida ne’e importante tebes ba média atu hala’o sira nia atividade, sei sente metin liutan. No Konsellu Imprensa mos bele sente metin ba ita nia ezistensia lao iha tinan naruk nia laran, sem prezudika ita nia atividade lor-loron nian”, Otelio Oté tenik.
Presidente KI ne’e esplika katak objetivu ikus husi estabele nota entendementu ne’e mak, atu garante asesu informasaun ba públiku ho loloos. Aliende ne’e atu garante liberdade imprensa no moos garante liberdade opiniaun, liberdade espresaun no haburas órgaun no meus komunikasaun sosiál ho demokrasia ne’ebé loos iha rai laran.
Prezidente KI Otelio Oté ne’ebé nia mandatu sei remata iha fulan Fevereiru 2025 ne’e, husu ba ekipa ezekutivu KI nian atu kontinua halo komunikasaun no ko’operasaun ho ekipa ezekutivu Serve,I.P. Nune’e tratamentu sira tuir mai, la prezudika média nain sira nia ezistensia iha órgaun no meius komunikasaun sosiál nian. Tratamentu ne’e nu’udar parte ida atu ajuda Estadu TL hodi hatudu preforma di’ak iha mundu.
Iha parte seluk tuir Diretor Exkutivu Serve,I.P. Fausto Soares Dias katak, komesa husi asina nota entendementu ne’e ba oin Serve,I.P sei ko’opera ho KI hodi hatur Kompañia media sira nia atividade ho loloos. No mos bele kuñese ona kompañia emprezariál nasionál no internasionál husi parte media nian ho spesifiku liutan.
“Memorandu ne’ebé asina, Serve, I.P. mos bele hatene ona katak média sira nu’udar kompañia ida. Ba maluk kompañia emprezariál sira, tantu nasionál no mos internasionál ne’ebé hakarak hari’i média iha ita nia rai, tenki lao tuir memorandu ne’ebé parte rua asina ona. No ami mos bele asesu informasaun ne’ebé kompletu liu kona-ba Kompañia Emprezariál média nian”, Fausto deklara.
Hatan kona-ba dadus konkreta Kompañia Emprezariál husi parte média nian ne’ebé rejistu iha Serve,I.P., hanesan bain-bain Nasaun TL sempre kiak dadus hodi Fausto dehan, dadus konkretu kona-ba totál média ne’ebé durante ne’e eziste, hotu-hotu mai iha KI.
Entertantu, se de’it mak hakarak eziste liu-liu média sira, hatutan Diretór Exekutivu ne’e, Serve, I.P., regulariza ona hanesan emprezariál ba sira ne’ebé mak atu hari’i. No KI maka sei regulariza kona-ba média nia atividade. Ko’alia kona-ba emprezariu, Serve,I.P mak regulariza tuir lei ne’ebé vigor iha TL.
“Ho memorandu ida ne’ebé asina ona, komesa aban ba oin kompañia ida ne’ebé hakarak investe ka atu harii média iha ita nia rai, tenke lao tuir lei ne’ebé mak iha ona. No mos tenke lao tuir lei ne’ebé atribui ona ba kompetensia Konsellu Imprensa no Serve,I.P hatur ona. Hotu-hotu tenki hakruk ba lei ne’e”, katak Fausto. (Asesu Youtube/Facebook https://www.facebook.com/Media1Timor Media ONE Timor)
Ita nia komentariu konaba post ne'e.