DILI (Media ONE Timor) – Kombate no hamenus violensia bazeia ba jéneru iha eskola no sosiedade nia leet, Ministéiru Edukasaun Joventude no Desportu (MEJD) ho United Nations (UN-sigla Inglhes) Woman asina akordu programa parseria ba empodera komunidade iha eskola.
“Objetivu husi asina akordu ne’e importante tebtebes atu bele reforsa programa parseria ba empodera komunidade iha eskola para hatan ba violensia, bazeia ba jéneru no igualidade jéneru iha eskola sira.”
Hateten Diretor Jerál MEJD Antónino Pires ne’ebé akompaña hosi Xefi edifisiu UN Woman, Amy Nishta Satyam ba Jornalista iha Salaun Novu Turizmu, Kuarta, (24/08/22).
Tuir Antónino, programa asina memorandu ho UN Woman ne’e hodi parseira ba empodera komunidade iha eskola atu hatan ba violensia bazeia ba jéneru. Atu fó mós kontribuisaun ida ne’ebé diak hodi kombate no hamenus violensia bazeia ba jéneru iha eskola no sosiedade nia leet.
“Iha eskola ita hotu-hotu haree katak iha konvensia umanidade iha ne’ebá. Entaun MEJD ho UN Women hakarak atu kria kondisaun ida ne’ebé maka favoravel. Nune’e ema hothotu bele senti livre husi asaun violensia bázeia ba jéneru. Liu-liu ba feto no labarik feto iha territóriu nasionál”, Antónino informa.
Lori MEJD nia naran Antonino kongratula UN Women tanba iha komitmentu di’ak hodi tulun MEJD sensibiliza informasaun ba feto no labarik feto iha eskola.
Iha fatin hanesan Xefi edifisiu UN Women, Amy Nishta Satyam hatete, senti kontenti servisu hamutuk ho MEJD hodi hapara violensia hasoru feto no labarik feto iha eskola.
Maske iha tinan 2020 hatutan Amy, UN Woman asina ona memorandu ida ho MEJD hodi kombate violensia hasoru feto no labarik feto iha Timor-Leste. Maibé, UN Woman hakarak reforsa tan programa refere.
Tanba labarik mak rekursu umanu iha futuru maka Amy informa, programa parseria ne’e importante ba labarik sira foti desizaun hodi halo mudansa iha sira nia familia, komunidade nia leet no inklui iha eskola hotu-hotu.
“Ami sei servisu hamutuk ho Fundasaun Alola hodi haree ba empoderamentu sosiedade sivil nian, halo sensibilizasaun informasaun ba feto no labarik feto iha Kapitál Dili. Inklui Munisípiu 12 no Rejiaun Administrativu Espesiál Oeku-ssi Ambenu (RAEOA)”, Amy informa.
Maske foin maka asina akordu maibé programa ne’e MEJD implementa ona iha Munisípiu Baukau, Kovalima, Ermera no RAEOA. (Asesu You Tube/Facebook https://www.facebook.com/Media1Timor Media ONE Timor)
Ita nia komentariu konaba post ne'e.