DÍLI (Media ONE Timor) – Tanba kompleta ona sira nia estudu ho tuir ona yudisium, maka hamutuk estudante Universidade Oriental (Unital) nain 700 sei tuir serimonia graduasaun. Maibé depende ba despaisu husi Ministeriu Edukasaun Joventude no Desportu (MEJD).
“Preparasaun ba graduasaun iha tinan ida ne’e, total kandidatu 700-ital. Graduasaun ida ne’e mós sei hein despaisu husi ministru ka sei publika iha jornal repúblika,” hateten Reitor Unital, Florindo Pereira iha nia deskursu wainhira fo yudisium ba estudante Fakuldade Siensia Sosiais no Politika (Cispol).
Nia esplika liutan, hamutuk estudante Cispol nain 55 mak finaliza ona sira nia monografia. Sira bele halao ona sira nia yudusium hodi prepara ba graduasaun nian, hamutuk ho sira nain 700 seluk.
Katak Florindo, husi Cispol feto barak liu kompara ho mane. Feto maioria 20 %. Hasoru gradusaun, sira ne’ebé yudisium ona foin maka Fakuldade Cispol no Saúde. Fakuldade seluk sei iha fulan Setembru nia laran halao ona yudisium para tuir graduasaun.
“Kuandu despaisu husi MEJD iha ona, realiza graduasaun. Estudante Unital 700 ne’e nia estudu lisensiatura remata. Maka hein deit ba sira nia a’an rasik prepara tama iha komunidade nia leet hodi kontribui ba dezemvolvimentu,” tenik Reitor Unital, Florindo.
Iha parte seluk estudante yudisium Cispol husi Departementu Administrasaun Públiku, Simaõ Fatima Maetiz hato’o agradese ba Grasa no tulun ne’ebé simu hodi marka tan ístoria iha vida moris ho remata ona estudu lisensiatura ho valor boot, 3,48.
“Hetan valor boot laos fasil. Hasoru dezafius oi-oin. Maske buat sira nee hotu mak ami akumola sai objektivu ka mehi ida deit akaba lisensiatura. Ba loron ohin hau hetan valor bo’ot liu nu’udar Grasa,” dehan Simaõ.
Maibé katak Simaõ, valor ne’e laos iha surat tahan leten deit. Importante liu maka hetan valor boot wainhira iha kontribuisaun ba ema seluk iha aldeia, suku to’o Timor laran tomak. Nune’e, laos teoria deit maka importante. Maibe, valor praktika mós importante.
Simaõ dehan, estudante hetan valor boot, laos kontenti deit ho valor nee. Importante implementasaun iha komunidade. nia valor tenki boot liu teoria. Udan bele no anin bele boot, maibe tenki ultrapasa dezafiu ne’e.(Reportágem Ana de Jesus)
Ita nia komentariu konaba post ne'e.