(Reportajen Asistente Editor Marcelino Tomae/Editora Suzana Cardoso)
Dili (Media ONE Timor) – Liu husi papél jormalizmu, Max Stahl muda hahalok mundu nian ba Timor oan nia luta hodi ukun rasik an. Espiritu heroi solidaridade ne’e sei moris ba nafatin, maske nia isin mate ona.
Tuir Sekretáriu Jerál Joventude no Deportu (SEJD) Abrão Saldanha no Prezidente Konsellu Imprensa (CI-sigla Portugues) Virgilio da Silva Guterres alias “Lamukan” iha komemorasaun loron Sebastião Gomes ba dala-31, heroi Jornalista Max Stahl nia dezlutu no sira ne’ebé mate iha Portu Dili, inklui sira ne’ebé mate iha Balibo ka Balibo five ne’ebé komemora iha edifisiu Max Stahl, Sesta, (28/10/2022), SEJD Abrão fó hanoin fila fali Heroi Max Stahl nia solidaridade.
Hateten SEJD Abrão, tinan ida ona Timor oan nia belun di’ak Heroi Max Stahl husik hela mundu ne’e. Asaun solidadridade humanu ne’ebé nia halo sai konkretu. Sai realidade. Nia faktu mak konta dau-daun iha komemorasaun kalan ne’e nian. Katak, Max Stahl nia produtu mak foka ba mundu tomak hodi TL manan independensia.
Max Stahl nia prezensa iha TL katak SEJD Abrão, hatudu no valoriza ho fuan solidadridade humanu luta ba atividade mídia nian. Hatudu ona papél jormalizmu, hanesan camera man no reporter hodi muda hahalok mundu nian.
“Max Stahl mate. Maibé ístoria nakonu iha Timor. Heroi sei la mate. Ba maluk sobrevivente sira sei bele mai vizita para oinsá hatene di’ak liu tan valores ba área jormalizmu nian”, husu SEJD Abrão hodi hatutan.
Dau-daun ne’e, TL iha ona liberdade imprensa. Fiar katak liberdade ne’e uza Ita nia objetivu no kapasidade ne’ebé di’ak hodi ajuda mós ema seluk. No ajuda Ita nia povu rasik ne’ebé maka lian la to’o. Hanesan komunidade sira ne’ebé hela iha area rurais.
Iha fatin hanesan Prezidente CI Lamukan iha nia deskursu hatete, Max Stahl mate ona. Maibé sei kontinua moris iha fatin seluk hodi kontinua ninia obra ne’ebé maka nia husik hela iha TL no ba mundu tomak.
“Ita lakon ema hanesan Max Stahl. Maibé, Ita la lakon nia hanesan heroi ne’ebé sei moris nafatin. Hanesan ohin kalan Ita hamutuk iha fatin ida ne’e hodi fó obra no valoriza Max Stahl nia obra ne’ebé hatudu ona iha Timor. Hatudu ona ba mundu tomak”, Lamukan hateten.
Max Stahl maski iha mundu seluk maibé katak Lamukan, nia sei kontinua lori nia kamera hodi buka tuir sobrevivente sira ne’ebé maka to’o ohin loron família sira buka tuir nia restus mortais, maibé la hetan.
Lamukan fiar katak, Max Stahl hetan uluk ona mak Sebastião Gomes hodi hatutan sira nia obra iha mundu seluk. Tanba, sira rua nia loron mate hanesan. Maibé ba sira ne’ebé nia restu mortais seidauk hetan, Max Stahl nia kamera televizaun nian leno tuir sira. No hasoru ona sira.
“Max Stahl ho jornalista sira ne’ebé mate iha Balibó, sira maka fó informasaun para muda mundu nian opiniaun hodi apoiu Timor atu hetan independensia. Tinan ida ne’e sai refleksaun ba Timor oan. Liu-liu, jornalista sira hodi banati tuir korajen ne’ebé maka Max Stahl iha hodi sai referesia boot ba jornalista hotu”, Lamukan esplika. (Asesu Youtube/Facebook https://www.facebook.com/Media1Timor Media ONE Timor)
Ita nia komentariu konaba post ne'e.