DILI (Mídia ONE Timor) – Atu proteze Timor-Leste (TL) hosi moras global Covid-19 (Virus Corona-2019) Konsellu Ministru (KM) foti ona desijaun hodi taka Portu no aeroportu ba sidadaun hosi nasaun sira ne’ebé afeitadu ba moras ne’e.
“Ohin KM foti ona desijaun hodi taka ita nia portu no aeropertu ba ema hosi nasaun besik 100 ne’ebé afeitadu ba moras Covid-19 atu labele tama lai mai Timor-Leste,” hateten Ministru Negosiu Estranjeiru no Kooperasaun (MNEK), Dionisio Babo Soares ba jornalista iha Palacio Governu hafoin remata enkontru KM nian.
Nia hateten, desijaun bandu sidadaun afeitadu Covid-19 tama mai TL ne’e governu foti liu hosi rezolusaun KM. Maibé, ba Timor-oan besik rihun 60 ne’ebé hela iha liur governu la-taka dalan ba sira para fila mai TL.
Katak MNEK, ba Timor-oan hirak ne’e fila mai sei hetan teste tuir prosedur Ministeriu Saúde nian antes ba hamutuk ho sira nia familia. Tanba, kuandu balun seluk hetan positivu hosi moras Covid-19 sei tau iha karantina ne’ebé estadu prepara tiha ona.
Maibé Ministru Dionisio fo hanoin, aeroportu barak maka taka ona ba ema hotu-hotu atu halo viajem ba-mai. Nune’e husu ba Timor-oan ne’ebé hela iha rai liur atu kuidadu án hosi moras epidemia mundial ne’e.
“Apela ba sidadaun hot-hotu nebé hela iha rai liur atu halo tuir Ministeriu Saúde rai ne’eba nian. No tuir mós regras ne’ebé organizasaun saúde mundial hasai ona,” tenik MNEK Dionisio hodi hatutan.
Ba Timor-oan sira iha rai liur, husu atu kuidadu án. Wainhira lao tenki ses dook hosi ema nebé afeitadu housi virus Covid-19. Labele ba iha fatin nebé ema barak halibur án.
Salienta MNEC Dionisio, nasaun barak maka taka ona sira nia aeroportu ba aviaun sira labele tama no sai. Sidadaun estranjeiru hanesan, Portugueza sira hela iha TL hakarak fila ba sira nia rain. Maibé, labele tanba aeroportu barak maka taka ona.
”Embaixador Portugues iha TL mós hateten ona. Katak, sidadaun Portugueza nebé hakarak sai ba rai liur, depende ba sira. Tamba iha nasaun barak mak taka ona sira nia aeroportu. Ho nune’e diak liu ita tenki proteje án. Tamba moras ne’e hanesan moras global. Nebé akontese kada tinan 100,” tenik MNEK Dionisio.
Tuir mensájem ístoria nebé Redasaun Media ONE Timor asesu hateten, kada tinan 100 sempre mosu moras global. Hanesan iha tinan 1720 moras ho naran Plague, tinan 1820 Cholera Outbreak, 1920 Spanish Flu, iha tinan 2020 mosu moras global Chinese Corona Virus. No iha tinan 2120 lahetene moras global saida maka sei akontesetan, ne’e segredu Maromak nian.
Bandu Rei Statua
Iha parte seluk hosi Igreja Katolika, Confêrencia Episcopal Timorense, liu hosi komunikadu espiscopal nebé fo sai iha Misa Dominggu nian, atu TL halo ona prevensaun ba moras global ne’e.
Katak Komunikadu Episcopal ne’e, Igreja Timor hamutuk ho Amo Papa nebé mos halo nia prevensaun konvida atu halo tuir rekomendasaun Organizasaun saúde mundial no pessoas saúde TL nian.
Hateten, buat hirak ne’ebé maka presiza halo tuir;
– Fase liman bei-beik
– Kuidadu fatin mós
– Fani no mear tenke taka ibun
– Evita atu kontatu ho ema seluk
– Evita atu labele kontatu ho animal fuik
– Membru familia sira ne’ebé foin fila housi rai liur mai, evita atu halo kedas kontatu fisika (kaer
liman, rei malu, hakuak malu).
Tanba uma kreda iha nia selebrasaun sira halibur ema barak no kreda sai fatin nebé ema barak ba.
Bainhira moras ida ne’e seidauk hadaet, Kreda Timor akonsellu prevensaun balu durante seberasaun sira maka hanesan;
– Liman labele kona agua benta fatin nebé iha uma kreda nia oin
– Evita rei statua sira nebé iha uma Kreda laran
– Fani no mear tenki taka ibun
– Lalika kaer liman bainhira fó paz ba malu
– Simu deit komuñiau iha liman
– Evita halo bensaun rei liman
– Igreja fo konsellu ba sira nebé mak moras, isin fraku, atu lalika mai missa, reza iha uma deit.
Biar mundu tomak no ita mos liu hela housi prova ida ne’e, ita hatene katak Nai Maromak sei la taka matan no tilun ba ita nia harohan.
Ne’eduni husu atu ita hotu reza hanesan salmista dehan, “rahun diak ba sira nebé tau fiar iha Maromak” (Sal.40.5).
Aliende ne’e housi parte Kongregasaun Salesianu Don Bosco organiza reza Tersu iha Igreja Maria Auxiliadora Comoro, hahu tuku 18:00 to’o remata, hodi hasa’e no husu tulun ba Inan Virgem Maria ba Moras Virus Corona ne’e.(Reportágem Sizana Cardoso/Anibal de Esprito Santo)
Ita nia komentariu konaba post ne'e.