(Reportajen Angelo da Costa/Asisten Editor Jacinto Caet)
DILI (Media ONE Timor)— Tuir dadus hatudu husi Hospital Nasionál Guido-Valadares (HNGV) virus HIV-SIDA sa’e mak’as, nune’e Institutu Nasionál Combate (INC) dezamina informasaun ba estudante no komunidade sira atu hadook aan husi virus refere.
“Dezmina informasaun ne’e atu hakle’an joventude, estudante no komunidade sira nia koñesimentu hodi bele habelar tan ba familia, kolega, viziñu, komunidade no sosiedade. Atu nune’e nia komunidade sira bele kompreende situasaun jerál HIV-SIDA nian no situasaun rai-laran nian hodi prevene virus ne’e rasik iha futuru mai.”
Lia fuan ne’e hatun hosi Prezidente INC-SIDA, Atanasio de Jesus ba jornalista Media One Timor, iha Xanana Reading Room Lesidere, Dili Segunda (20/06/2022).
Prezidente INC esplika, liga ba kazu HIV-SIDA iha Timor-Leste rejistu ho númeru aas, nune’e politika governu liuhusi INC-SIDA nafatin halo sosializasaun ba populasaun iha teritorriu laran tomak, hasa’e koñesimentu di’ak hodi kombate moras ne’e.
Tuir dadus ne’ebé INC rejista iha Timor-leste daudaun hamutuk 1582, mate na’in 268, sira ne’bé halo tratamentu agora 814 pessoa.
Atanasio afirma, materia ne’ebé fahe ba estudante no komunidade sira atu hatene virus HIV no moras SIDA, tanba moras ne’e hada’et husi relasaun sexual. Dezamina informasaun hahú iha tinan 2014 to’o 2022.
“Tanba papél INC-SIDA nian ne’e mak atu halo promosaun no edukasaun ba iha komunidade sira atu prevene no hadook aan hosi virus aat HIV-SIDA ne’e rasik”, katak nia.
Ho nune’e prezidente nia parte husu ba sidadaun hotu-hotu hadook aan husi ransu livre. tanba husi ransu livre mak hada’et moras HIV-SIDA bele kontribui ho númeru ne;ebé aas iha Timor-Leste.(Asesu Youtube/Facebook Media One Timor)
Ita nia komentariu konaba post ne'e.