(Reportájen Asistente Editor Marcelino Tomae)
DILI (Media ONE Timor) — Membru Polisia Nasionál Timor-Leste (PNTL) nain rua hetan kanek bainhira hala’o knaar seguransa ba serimonia graduasaun arte marsiais PSHT (Persaudaraan Setia Hati Terate) iha otel Timor Lodge Comoro nia oin.
“Suspeitu sa’e motor mak tuda bomba molotov ba PNTL sira ne’ebé hala’o hela seguransa iha Timor Lodge ba serimonia graduasaun PSHT nian”, esplika Komandante Komandu PNTL Munisipiu Dili, Superintendente Xefi Polisia, Henrique da Costa iha nia kna’ar fatin Caicoli Sesta, (19/08/2022) liu hosi konferensia imprensa.
Hanesan hotu-hotu hatene katak, serimonia graduasaun arte marsiais PSHT nian hala’o iha fatin tolu. Balun iha GMT, CCD no balun seluk iha Otel Timor Lodge iha loron ne’ebé hanesan, Kinta, (18/08/2022) kalan to’o Sesta, (19/08/2022) madrugada.
Superintendente Xefi Polisia Henrique esplika, kazu ne’e akontese iha Kinta, (19/08/2022) kalan iha resintu Estrada Timor Lodge Comoro nia oin. Hosi akontesementu ne’e, PNTL konsege asegura suspeitu nain ida. Maibé nain ida seluk konsege halai liu. No motor ne’ebé mak sira uza hodi halo asaun PNTL prende ona.
Katak Superintendente Xefi Polisia Henrique, akontesementu ne’e akontese tanba derepente mosu joven nain rua la uza helmet liu iha Estrada públiku Otel Timor Lodge nian oin.
Nune’e hatutan Superintendente Xefi Polisia Henrique, PNTL hirak ne’ebé fó seguransa iha ne’eba hapara sira. Maibé sira la simu. Sira deskute malu to’o suspeitu nain ida tuun hosi motor tebe ajente PNTL nain ida. Haree asaun brutalizmu ne’e, Ajente PNTL seluk halai ba ajuda. Hosi ne’e mak sira so’e bom Molotov ba Polisia.
“Hosi akontesementu ne’e polisia asegura ona suspeitu nain ida ho naran inisial RBH ho tinan 24. Hela iha Aldeia Niken, Suku Bairo Pite, Postu Dom Aleixo. Inklui motor ne’ebé uza hodi halo asaun brutál hasoru polisia ne’e. No sei buka tuir suspeitu seluk ne’ebé hakanek membru polisia nain rua ne’e”, Superintendente Xefi Polisia Henrique deklara hodi hatutan.
Hosi parte membru PNTL ne’ebé hetan kanek ne’e, na’in rua. Ida ho naran Ajente Leonito C. Goncalves no ida seluk ho Ajente Prinsipál Nicolao dos Santos hosi eskuadra Dom-Aleixo. Membru PNTL nain rua ne’e hetan kanek iha ulun no ain rezulta suku pontu lima.
Superintendente Xefi Polisia Henrique haktuir, daudaun ne’e membru PNTL nain rua ne’e halo tratamentu saúde iha Klinika Kampung Baru. Enkuantu suspeitu RBH detein ona durante oras 72 hodi kompleta prosesu. (Asesu You Tube/Facebook https://www.facebook.com/Media1Timor Media ONE Timor)
Ita nia komentariu konaba post ne'e.