Kampaña Elpar Hakotu Hó Dame

MEDIAONETIMOR-Maske partidu 5 maka taka odamatan hó hala’o kampaña dala ikus iha Kapital Dili, maibé Timor-oan hirak ne’e hatudu duni sira nia maturidade politika hodi remata hó paz no dame.

“Parabéns ba Timor-oan sira nia maturidade politika hodi halo tuir lia fuan murak husi igreja Katolika Timor-Leste (TL) hameno hela, hodi labele husik hela kanek no trauma ba sosiadade. To’o kampaña remata iha paz no dame nia laran. Obrigadu no parabéns,” hateten ida hosi komunidade Comoro, Tome Tilman ba Media One Timor.

Kampaña ba dala ikus hosi partidu governante CNRT no Partidu Esperansa Patria (PEP) hala’o iha loron Tersa,(18/07). No loron tuir kedas, Kuarta, (19/07) hala’o hosi Partidu Fretilin, Partidu Demkratika (PD), Partido CASDT, Partidu PSD no Partidu APMT.

Hosi kampaña partidu 5 ne’e, Partidu Frenti Revolusinariu Timor- Leste indepeden (Fretilin) halo kampaña iha tasi tolu hó ema ne’ebé barak halo engrafamentu etrada públiku ba Comoro to’o tasi tolu nian.

Tuir observasaun hosi estrada sorin militante hakilar, “viva Fretilin, viva Fretilin, viva Fretilin. Iha estrada sorin seluk militante hakilar, “Viva PD, viva PD, Viva PD.” Laos ne’e deit, militate hosi Partidu CASDT, PSD no APMT mós hasoru malu. Kada militante foti liman ba malu fó adeus hodi hakilar tuir idak-idak nia naran partidu.

Antes ne’e Partidu CNRT nia kampaña ikus hetan seguransa masimu hosi PNTL hamrik forma iha riska mutin klaran hodi manda movimentu ba no mai Tasi tolu nian. Seguransa PNTL nian forma hosi Tasi tolu to’o rotunda estatua Prezidente Nicolau Lobato. PNTL hamrik iha etrada ibun sorin-sorin hahu hosi rotunda Comoro tama to’o Palacio governu. Iha tasi ibun pantai kelapa F-FDTL mós halo seguransa iha ne’eba.

Militante CNRT ne’ebé hetan bandu hosi Prezidente partidu CNRT nian atu labele halo pawai ne’e, tama ona ba tasi tolu labele sai. Tenki hakmatek iha ne’eba to’o kampaña remata. Iha estrada ibun militante partidu Fretilin balun hamrik hó sira nia bandiera hodi fó adeus no hakilar haksolok ba militante CNRT ne’ebé liu ba-mai tasi tolu. Kampaña ne’e remata hó paz no dame.

Ihaloron tuir mai, iha kampaña Partidu Fretilin nian hó militante mós barak. Maibé, seguransa PNTL nian diferente. Sei hosi observasaun Media One Timor katak ladun barak. Mayoria polisi trafiku nian maka manda militante no movimentu transporte nian.

Hahu iha maizu menus tuku 11: 00 dader militante balun hó motor no balun seluk hó kareta hakilar viva ona iha estrada laran. Iha maizu menus tuku 13:00 militante hosi partidu nain 5 ne’e, ida-idak nadodon ba nia fatin kampaña.

Fretilin hala’o kampaña iha tasi tolu. PD nadodon ba konsentra iha heliport. CASDT nadodon ba kampu Taibessi, PSD nadodon ba konsentra iha kampu Becora no APMT ba iha Fatuhada.

Hosi partidu nain 5 ne’e, Fretilin maka domina estrada públiku. Ho militante barak, to’o maizu menus tuku 15:30 foin maka laiha ona engrafamentu. Polisia balun kumesa ona deskansa. Militante idak-idak hakmatek iha nia fatin kampaña.

Iha kampu tasi tolu mean klak simblu partidu Fretilin viva hodi simu Sekretariu Jeral Partidu Fretilin, Marí Bin Amude Alkatiri. Marí hahu nia kampaña hodi aprezenta programa politika tinan 5 mai.

“Bainhira Fretilin ba ukun, hau hakarak hahu’u kedas atu kria planu nasional hodi haburas TL. Hadia sistema edukasaun hosi professores no diretores sira la tama servisu maibe asina deit hodi manan osan fulan-fulan. Ne’e parte korupsaun,” hateten Marí hodi kontinua kampaña programa seluktan.

To’o kalan maizu menus tuku 19:30 estrada Dili kumesa mamuk ona. Transporte ida ka rua maka liu ba-mai iha estrada públiku. Obrigadu ba Polisia Nasional Timor-Leste (PNTL) hamutuk hó Batalhião Ordém Públiku (BOP) ne’ebé fó ona seguransa masimu durante kampaña. Parabéns ba timoroan tomak ne’ebé hatudu maturidade poltika hodi tuir kampaña politika durante fulan hó dame no paz.(Reportájem Aderito Ximenes/José Samuel)