Kansela Rekrutamentu PNTL, PM Sei Rekruta Mak F-FDTL

(Reportajen Livia Sarmento/Asistente Editor Marcelino Tomae)

DILI (Media ONE Timor) – Atu hadia ekonomia iha rai laran no tau matan ba dezenvolvimentu instituisaun sira, nune’e Primeiru Ministru (PM) Taur Matan Ruak sei kansela rekrutamentu Polisia Nasionál Timor-Leste (PNTL) ba tinan 2023 nian ne’ebé planu ona atu rekruta hamutuk ema na’in 600.

“Rekrutamentu PNTL ha’u kansela. Tanba dezenvolvementu institutusaun hotu-hotu, inklui PNTL tenke tau matan mós ba ita nia ekonómia. Se hahan uituan ita hatama ema barak, ne’e kualidade laiha. Hahán la to’o ita problema.”

Informa PM ne’ebé asumi mós kargu nu’udar Ministru Interior, Taur Matan Ruak ba Jornalista hafoin remata audiensia semanál ho Prezidente Repúblika José Ramos Horta iha Palasiu Prezidensiál, Kinta, (11/08/22).

Hatete PM Taur, daudaun ne’e membru PNTL sa’e ona ba membru hamutuk nain 4.000. Membru hirak ne’e, hakarak aumenta osan no hahán hodi tau atensaun ba instituisaun ne’e de’it. Ki’ik (komunidade-red) sira iha foho, presiza mós atensaun spesifiku liutan.

Rekrutamentu ba PNTL hodi aumenta forsa tuir PM Taur, tenke haree mós ba amesas no risku. Labele ba han de’it. Ejize saláriu. Depois tuur kajerna. Ida ne’e labele. Tenke servisu hodi dezenvolve rai ida ne’e.

“Ha’u dehan ba sira bainhira ha’u mak Ministru Interiór no Primeiru Ministru, PNTL ninia rekrutamentu laiha. Izola ida ne’e. No ha’u nia prióridade mak sira ne’ebé atinji ona tinan 60 tenke ba deskansa,” katak PM Taur hodi hatutan.

Tenke altera lei para sira ne’ebé idade 60 ba deskansa. Joven sira avansa. Se lae katuas ona la’o labele. Hanoin mós la la’o. PNTL sei iha fatin de’it. No Joven sira iha potensialidade no kapasidade modernu ona sei laiha fatin.

Aliende PNTL, PM Taur ne’ebé nu’udar mós Jeneral hateten, iha de’it maka planu ba rekrutamentu Falintil-Forsa Devesa Timor-Leste (F-FDTL). Tanba liu tiha tinan 20-resin, foin mak membru nain 2.600.

“Ha’u hanesan Jenerál, ha’u nia planu mak rekrutamentu membru F-FDTL. Tanba liu tiha tinan 20 tenki atinji to’o ema na’in 3.000. Maibé, hosi tinan 2000 to’o tinan 2022, realidade hatudu foin maka atinji ema nain 2.600”, deklara PM Taur. (Asesu You tube/Facebook https://www.facebook.com/Media1Timor Media ONE Timor)