BAUKAU (Média ONE Timor) – Kondisaun kareta ne’ebé Governu entrega ba Administradór Postu Administrativu Kelikai, Munisípiu Baukau, Mateus Soares Cabral nia kondisaun aat, lorloron obriga aan tenki la’o ain mai servisu fatin.
“Ha’u lorloron la’o de’it hosi Laisorulai mai Kelikai hodi halo servisu. Dala ruma sa’e karreta bis ka truk kuandu iha entaun ha’u sa’e tuir. Maibé kuandu laiha ha’u la’o de’it,” kestaun ne’e hato’o hosi Adminisitradór, Postu Adminisitrativu Kelikai, Mateus ba Jornalista iha nia rezidensia Uatulete-Baukau Vila, Sabado, (02/07/2022).
Hanesan públika ona katak, Mateus Soares Cabral troka Administradór Kelikai sesante Sebastião Pereira, sai Administradór ba Postu Kelikai simu posse hosi Ministéru Administrasaun Estátal (MAE) ho nia Vise Lino de Jesus Torrezão iha loron 16 Fevereiru 2022 iha salaun Sentru Konvensõens Baukau (CCB‐sigla portugés) ba mandatu tinan 4 nian.
Tanba ne’e, Administradór sesante entrega karreta, inklui patrimóniu estadu nian ne’ebé utiliza iha servisu Administrasaun Postu Kelikai nian ba Administradór foun hodi hahú servisu, maibé karreta estadu ne’ebé maka Administradór sesante entrega ba Administradór foun kondisaun aat.
Tanba ne’e, ékipa fiskalizasaun hosi Munisípiu Baukau evakua karreta refere hosi Postu Administrativu Kelikai mai Munisípal atu halo manutensaun, maibé to’o ohin loron seidauk di’ak.
“Ékipa Munisípal sira ba halo fiskalizasaun iha ne’eba foti tiha ba Munísipiu, maibé lakonsege hadi’a halo manutensaun mós labele, ha’u husu mós dehan labele entaun agora para de’it iha Munisípiu,”
Katak Mateus, preukupasaun ne’e hato’o ona ba Prezidente Autoridade Munisípiu Baukau no mós ba Ministéru Administrasaun Estátal (MAE).Maibé seidauk iha responde.
Nune’e ba prosesu tomak atu halo manutensaun ba karreta refere ou la’e, hanesan Administradór Kelikai sei la halo obrigasaun atu halo manutensaun lalais ba karreta ne’ebé dadaun kondisaun aat.
“Prosesu ne’e ami labele obriga dehan bainhira, ami hein de’it, i servisu mós ami la’o nune’e de’it ona bainhira transporte laiha, servisu ruma iha Munisípiu mós sei lapartisipa, tanba difikulta ba transporte, maibé karreta ne’e nia kondisaun komforme tekníku sira konta mai, mina atu halai ba mesin karreta nian ne’e maka labele, tanba dehan manguera mina nian ne’e maka aat, maibé karreta moris, mais atu halai maka ladi’ak,”
Mateus akresenta, relasiona ho kondisaun karreta Administrasaun Postu Kelikai ne’ebé dadaun avaria, difikulta tebes servisu Administradór nian atu kontrola servisu iha kada Suku sira iha Kelikai.
Enkuantu Suku ne’ebé eziste iha Postu Kelikai hamutuk 15 kompostu Aldeia 55 ho nia populasaun hamutuk 2.800 resin.
To’o notísia ne’e públika, jornalista hosi Média ONE Timor iha Munisípiu Baukau seidauk halo konfirmasaun ho Prezidente Autoridade Munisípiu (PAM) Baukau, tanba iha loron ferias nian.(Asesu Youtube/Facebook https://web.facebook.com/Media1Timor Média ONE Timor)
Ita nia komentariu konaba post ne'e.