(Reportajem Angelo da Costa/Editora Suzana Cardoso)
DILI (Media ONE Timor) – Atu realiza atividade sensus populasaun iha teritoriu Timor-Leste (TL) ba dala haat iha tinan 2022 hafoin ukun aan tinan 22 nia laran, maka Governu sei gasta osan hamutuk Juta 3.1 USD.
“Ne’e sensus populasaun ba dala haat iha ístoria Timor-Leste. Hanesan nasaun Indepedensia halo ona sensus uma kain iha tinan 2004, 2010 no tinan 2015. Maske antes ne’e sensus populasaun ita koñese de’it hanesan resensiamentu.”
Deklarasaun ne’e hato’o husi Ministru Finansas (MF), Rui Agosto Gomes iha ninia intervensaun ba lansamentu atividade sensus populasaun tinan 2022 nian iha CCD, Segunda, (15/08/2022).
Atividade sensus ba populasaun tinan 2022 nia lansamentu hala’o husi orgaun soberania Timor-Leste (TL) no entidade sira iha loron Segunda, 15 Agosto 2022. Maibé atividade sensus sei hahú iha loron 4 Setembru to’o loron 5 Outubru tinan ida ne’e.
Dehan MF Rui, rezultadu sensus ne’e importante ba dezemvolvimentu. Hosi rezultadu sensus mak kosok oan no labarik barak liu iha fatin balun, Governu sei harii Pre-eskolar. Maibé ba munisipiu hirak ne’ebé ferik no katuas mak barak liu, Governu sei harii fasilidades hodi tau matan ba populasaun ne’ebé idade ona.
Katak MF Rui, prioridade dezenvolvimentu mak ema nia moris di’ak. Nune’e kapitál humanu sai hanesan pontu importante hodi hatene lolos informasaun kona-ba sosiedade iha nível nasionál to’o lokál.
Aliende ne’e, MF Rui dehan liu husi sensus populasaun sei hatene totál populasaun iha Timor-Leste (TL) hosi area edukasaun no empregu. Sei iha mós pergunta kona-ba hela fatin iha ne’ebé, asesu ba bee moos ka lae no asesu ba servisu públiku ka lae.
Atu fasilita atividade sensus populasaun ne’e, Governu rekuruta treinador na’in 200. Ema na’in 100 mai hosi diresaun jerál estatistika no na’in 100 mai husi liñas ministeriais.
Aliende ne’e MF Rui hatutan, Governu mós rekruta tan ema na’in 3.424 para apoiu sensus. Maioria joven. No sei koloka kada suku nain 300. Balun sei hala’o knaar nu’udar supervizor no enumerador.
“Iha OJE 2022 ita tau osan hamutuk milaun (Juta) 3.1 USD hodi implementa sensus ida ne’e. No besik milaun ida mai hosi ita nia parseiru dezenvolvimentu iha Timor-Leste”, MF Rui esplika.
Sensus Baze Informasaun
Iha fatin hanesan Prezidente Repúblika (PR), José Ramos Horta iha nia deskursu hateten, sensus populasaun nu’udar baze informasaun ba Governu, parseiru internasionál sira, akademiku, Jornalista no estudante.
“Nune’e ha’u apela ba autoridade lokál sira hahú hosi aldeia, xefe suku to’o prezidente autoridade atu kontribui halo sensibilazasaun para sidadaun hotu-hotu partisipa.
Hato’o dadus ho lolos ba ajente sira. Nune’e Governu bele hadiak liu tan dezenvolvimentu hodi lori Timor-Leste tama Azean”, PR Horta apela hodi hatutan.
Realidade TL atu adere ba Azean besik ona. Maka, Nasaun TL tenki fornese informasaun ho dadus ne’ebé sientifiku ba parseiru sira iha Azean. No estatistika labele manipula. Labele bosok. Tenke kredivel ba sensus populasaun nian.
Katak PR Horta, hosi sensus populasaun ne’ebé kredivel sei hatene lolos problema sosiál, humanu no polítiku TL. No nu’udar baze informasaun ba governu halo planifikasaun didiak hodi fó resposta ba dezafiu ne’ebé TL hasoru.(Asesu You Tube/Facebook https://www.facebook.com/Media1Timor Media ONE Timor)
Ita nia komentariu konaba post ne'e.