(Reportajen Livia Sarmento/Editora Suzana Cardoso)
Dili ( Media ONE Timor) – Konsidera Nasaun Brazil iha esperiénsia ba luta kontra ki’ak, hamalaha no sai produtór mundiál ba alimentasaun, maka Timor-Leste no nasaun ne’ebé rekursu finanseiru mai husi exportasaun petróleu no gáz sei iha problema barak, presiza aprende hosi Nasaun CPLP ne’e.
“Ami la akonsella governu Brazil atu fó apoiu finanseiru. Importante liu ba ami, mak konsellu tékniku hodi ajuda iha programasaun luta kontra pobreza. Halo Timor sai paiz agríkula. Asegura seguransa alimentar. Hadi’a no halakon sub nutrisaun infantil.”
Assuntu ne’e hato’o hosi Prezidente Repúblika (PR), José Ramos Horta hafoin remata hasoru malu ho responsável husi Agência Brasileira de Cooperação (ABC) iha Palasiu PR, Aitarak laran Lobatu, Sexta, (06/01/2023), ne’ebé Media ONE Timor asesu liu hosi Komunikadu Imprensa.
Sorumutu ne’ebé koalia kona-ba kombate ki’ak no sub-nutrisaun ne’e katak PR Ramos Horta, kombate ki’ak no sub-nutrisaun konta ho tulun husi Programa Mundiál ba Alimentasaun (PMA), UNICEF no parseiru seluk, hodi atinji meta ida ne’e ba tinan lima mai.
Maske hatutan PR Ramos Horta, iha situasaun pandémia prezensa parseiru dezenvolvimentu laiha iha baze. Laiha prezensa Governu, Organizasaun Não Govermentais (ONG) nasionál no moos internasionais sira. Programa husi ONU moos laiha. Hosik povu mesak loos.
“Iha Timor-Leste (TL) pandemia deklara iha Marsu 2021. Iha Maiu, hanesan eis Prezidente no líder polítiku dahuluk ne’ebé iha situasaun serka sanitaria la’o hale’u nasaun. Maibé la haré prezensa osan. La haré prezensa husi governu, ONG internasionál, programa husi ONU moos laiha. Povu husik hela” tenik PR Ramos Horta.
Iha Fatin hanesan Diretór ABC, Ruy Pereira ba Jornalista hateten, iha sorumutu ne’e sira atualiza ba Xefe Estadu kona-ba implementasaun programa iha TL ne’ebé monitoriza husi Ministériu Agrikultura no Peskas (MAP) no PMA.
“Projetu ne’e foin dahuluk. Ami halo iha Atabae, Munisipiu Bobonaro. La’os de’it ajénsia humanitária. Maibé atu rekonstrui kapasidade produsaun unidade ki’ik sira iha aldeia, ho formasaun téknika husi Brazil. Programa ne’e importante bá seguransa alimentar no nutrisionál, ne’ebé sai hanesan preokupasaun bo’ot iha Timor-Leste,” relata Ruy Pereira.
Katak Ruy Pereira, PR Ramos Horta moos husu hanoin husi ABC kona-bá programa merenda eskolar iha Brazil hodi dehan, kustu refeisaun bá kada alunu iha Brazil sita ona iha Sistema Nasionál Alimentasaun (SNA).
Nune’e Ruy Pereira dehan, Governu Federál komplementa de’it finansiamentu ba alimentu suplmentar ne’ebé munisipiu sira prepara. Kada tinan orsamentu bá kategoria rekursu suplementar totaliza real billaun haat. Ekivalente ho dollar Amerikanu liu millaun atus hitu.
Nia esplika, durante ne’e Brazil hetan apoiu orsamentu husi Programa Alimentar Mundiál (PMA) iha Dili ho dólar Amerikanu rihun 120 bá asaun kooperasaun humanitária hodi rekupera atividade subsisténsia hafoin passajen siklone iha tinan hirak liu bá.
Entre tinan 2006 to’o 2016, rejista asaun 7 iha assisténsia humanitária ho TL ba Koordenasaun Jerál bá Kooperasaun Humanitária no Kombate hamlaha (CGFOME Sigla Portuguéz) ho orsamentu dolar Amerikanu liu rihun atus tolu. (Asesu Youtube/Facebook https://www.facebook.com/Media1Timor Media ONE Timor)
Ita nia komentariu konaba post ne'e.