(Reportajen Editor Marcelino Tomae)
Dili (mediaonetimor.co) – Hatutan dezenvolvimentu ba Estadu Timor-Leste no serbí povu, maka liu husi komferesia nasionál Partidu Kongresu nasionál Rekonstrusaun Timorense (CNRT sigla Portugues) konkorda hodi halo koligasaun ho partidu Demokrátiku (PD) ba forma IX Governu Konstitusionál ba periodu tinan 2023 to’o 2028.
Sekretáriu Jerál Partidu CRNT Francisco Kalbuadi Lay ho Prezidente Partidu CRNT Kay Rala Xanana Gusmão liu-husi disikursu realiza iha Salaun OKA Surik Mas, Segunda, (19/03/2023) hatete, konkordansia ne’e hala’o hafoin desijaun hosi hotu-hotu ne’ebé kontribui tinan barak ona iha Partidu CNRT.
Konferénsia nasionál Partidu CNRT ne’ebé hala’o iha salaun OKA, Surik Mas, taka ba média, maibé hafoin diskusaun no tama ba votasaun média sira assesu hikas ho rezultadu hatudu maioria Konferesista deside fó apoiu tomak ba koligasaun entre partidu CNRT no PD hodi ba kaer ukun atu bele servi povu tuir kompromisu polítiku ne’ebé iha.
Sekretáriu Jerál Partidu CNRT, Francisco Kalbuadi Lay esplika, konferénsia nasionál ne’e partisipa husi kuadru sira, estrutura nasionál, koordenadór munisípiu 13 inklui Rejistu Administrativu Espesial Oe-kusi Ambenu (RAEOA), koordenadór postu administrativu no estrutura tomak.
“Prontu, komisaun verifikasaun verifika, hotu-hotu konkorda no ita avansa ba koligasaun ho PD ba formasaun IX Governu Konstitusionál,” Kalbuadi hateten.
Kalbuadi konta tuir katak, durante konferénsia, meza ho permisaun Prezidente Partidu CNRT, Kay Rala Xanana Gusmão atu husu ba konferensista sira hanesan órgaun ida ne’ebé aas liu no iha desizaun ne’ebé aas liu tuir Lei Eleitorál, nune’e mós estatutu foun partidu nian, se mak konkorda no la konkorda atu partidu CNRT halo koligasaun ho Partidu Demokrátiku ba formasaun IX Governu Konstitusionál.
Nune’e Sekretáriu Jerál Francisco Kalbuadi Lay husu ba komisaun hodi halo verifikasaun ba se maka la Konkorda, maibé iha verifikasaun Konkorda 100 % hodi halo koligasaun ho partidu Demokrátiku hodi forma Governasaun IX ba periodu 2023-2028.
Nune’e mós Prezidente Partidu kongresu Nasionál Rekonstrusaun Timorense (CNRT), Kay Rala Xanana Gusmão, hotu-hotu Konkorda tiha ona hodi halo koligasaun ho partidu Demokrátiku (PD) ba IX Governu konstitusionál, maibé estrutura CNRT tenke hatudu servisu di’ak ba estadu ida hadia Povu nia moris.
“Nu’udar partidu ida ne’ebé mosu ho hanoin atu partisipa hodi serbí Estadu no Povu ohin ita hotu hiit liman, hatudu hanesan sinal ida katak ita hotu-hotu konkorda pur Um Aminidade hodi halo koligasaun ho partidu Demokrátiku PD, ba lidera IX Governu konstitusionál”, hatete Prezidente CNRT Xanana Gumão.
Tanba ne’e Kay Rala Xanana Gusmão husu estrutura Partidu CRNT iha Munisípiu 13 inklui Rejiaun Administrativu Espesial Oe-kusi Ambenu (RAEOA) la bele kontente de’it hodi simu kargu Xefia, maibé tenke servisu maka’as hodi serbí Estadu Timor no hadia Povu nia moris.
“Ita tenke hateke ba oin hodi kria baze harii dadauk ona buat ruma ba aban bairua nian, tanba ida ne’e ita la halo buat hotu maibé ha’u sente katak Povu haree katak ita la halo buat ida kedas, la bele afirma ida ne’e, maka iha tinan ida ne’e eleisaun povu fó fali komfinasa ba partidu CNRT”, Xanana afirma hodi informa.
Partidu CNRT mosu iha tinan 2007 atu hakotu tiha krize boot iha Estadu Timor. No tiha krize boot iha 2009, moto ne’ebé maka Partidu CRNT fó ba povu katak adeus komflitu Benvindu Dezenvolvimentu.
Prezidente CNRT ne’e haktuir, Partidu hanesan organizasaun polítiku ida hodi la’o hamutuk ho esforsu aan hodi hatudu ba povu katak la’ós atu sai de’it Ministru, maibé tenke buka dalan lori rai ida ne’e ba oin no hadia Povu nia moris.
Prezidente Partidu CNRT, Kay Rala Xanana Gusmão fó obrigadu barak ba konferensista sira ne’ebé ho hanoin ida de’it halo desizaun ba partidu CNRT hodi la’o hamutuk ho Partidu Demokrátiku ba formasaun IX Governu Konstitusionál.
Xanana Gusmão husu bá militante, simpatizante no apoiante sira atu kontinua servisu hodi prepara-an ba eleisaun sira ne’ebé sei mai, hametin kuadru partidu CNRT nian iha baze atu partidu la’ós manán de’it eleisaun maibé servi povu tuir prinsípiu sira ne’ebé partidu hatur ba dezenvolvimentu nasionál no Dezenvolvimentu rekursu umanu Timoroan sira hotu nian.
Xanana Gusmão dehan, hanoin boot liu ne’ebé kuadru, militante no simpatizante sira CNRT nian tenke tau iha hanoin mak atu servi rai no povu ida-ne’e, lori povu ba moris di’ak, moris ho dignu hodi goza ukun an.
“Iha tinan lima ne’e sei la fásil, atu dehan karik ba imi atu komprende katak iha 2007 CNRT ba kaer ukun buat hotu bou de’it, lori tinan rua ka tolu atu hadi’a. Hadi’a katak harii tanba ne’e ohin ita deside depois de posse ba membru governu sei difisil liu,” Xanana subliña.
Difisil tanba katak Xanana, sistema sira ne’ebé antes ne’e iha, governu muda tiha ne’ebé IX Governu Konstitusionál sei la fásil atu ba tur de’it sai Ministru fásil maibé atu kumpri misaun servi rai no povu ida-ne’e difísil tebe-tebes no sei hatutan tán ba koordenadór munisípiu sira tanba iha tinan lima ne’e tenke hahú desentralizasaun tanba ne’e tenke prepara an buka hatene no koñese difikuldade inklui potensialidade kada munisípiu.
Antes ne’e mós PD hala’o ona konferénsia nasionál hodi hola desizaun polítika partidu nian atu halo koligasaun ho Partidu CNRT, hodi kontinua servi povu no hasai povu hosi mukit liu hosi dezenvolvimentu nasionál ne’ebé integradu iha seitór hotu-hotu.
Komferesia nasionál Partidu Kongresu nasionál Rekonstrusaun Timorense (CNRT) hetan partisipasaun husi estrutura CNRT Munisípiu 13 inklui Rejiaun Administrativu Espesial Oe-kusi Ambenu.(Asesu Youtube/Facebook https://www.facebook.com/Media1Timor Media ONE Timor)
Ita nia komentariu konaba post ne'e.