Komunidade Hein Naroman Husi Kompañia Uka II Unip, Lda

(Reportajen Asisten Editor Jacinto Caet/Editora Suzana Cardoso)

DILI (Media ONE Timor) – Maske Kompañia Uka II Unip, Lda manan ona projeitu dada eletrisidade ba Suku Manelobas, Postu Administrativu Maubesi, Munisípiu Ainaro, maibé to’o agora komunidade hirak ne’e seidauk asesu ba eletrisidade.

“Kompañia Uka II, Unip, Lda maka manan projeitu dada eletrisidade ba Suku Manelobas. Kompañia ne’e survei ona iha baze. Maibé, to’o agora seidauk halo atividade dada liña eletrisidade ne’ebé komunidade moos hein hela naroman ne’e. ”

Hateten Portavos Unidade dos Estudante no Juventude Suku Manelobas (Unejusma), Juliao Timan iha sira nia konferensia imprensa, Sesta (01/07/2022) hodi ezize ba Kompañia Uka II Unip, Lda atu kumpri komprimisiu hodi fó naroman ba komunidade.

Nia hateten, Kompañia Uka II Unip.Lda manan ona tenderizasaun ba projetu ne’e. Maibé seidauk kumpre kompromisiu ne’ebé hetan husi VIII governu konstitusionál ne’e.

Juliao dehan, hanesan estudante no juventude presiza nafatin alerta. No prontu akompañia prosesu ne’e tomak hodi nune’e labele fo impedimentu ba populasaun Manelobas. Estudante hirak ne’e prontu atu hamriik iha interese sira ne’ebé a-favor ba dezenvolvimentu no povu nia nesesidade. Liliu fó naroman hodi populasaun sente no aproveita mehi ne’ebé sira rasik defende iha luta ba libertasaun nasionál.

“Ami husu mos ba governu atu tetu didi’ak molok hasai desizaun. Tenke fó poder ba kompañia nasional ne’ebé servisu hamutuk ho kompañia lokal, komunidade, veteran no autoridade lokál”, katak Julio.

Maski Kompañia Uka II Unip, Lda hetan ona fiar husi VIII governu konstitusionál, maibé tenke servisu hamutuk ho veteranu, autoridade lokál hodi hala’o servisu iha baze.

Entretantu Suku Manelobas iha aldeia haat mak hanesan; koto-matan, Arnadu, Hautilu no Hautehu. Total populasaun iha suku ne’e, na’in 1.469 ho ninia xefe familia hamutuk 310.(Asesu Youtube/Facebook https://www.facebook.com/Media1Timor Media One Timor)