(Reportajen Angelo da Costa/Editora Suzana Cardoso)
DILI (Media ONE Timor) – Atu fó vitoria absoluta ba Partidu Kongresu Nasional Rekonstrusaun Timorense (CNRT) iha eleisaun jerál tinan 2023 maka movimentu Klibur Tane Partidu (KTP) organiza konferensia durante loron ida.
Iha abertura konferensia, Koordenador KTP-CNRT, Marcos Soares Pacheco, Sabadu (18/06/2022) hateten, konferensia ne’e atu hametin liutan strutura KTP-CNRT nian to’o baze.
“Hamutuk ita harii, hametin no haburas Partidu CNRT hahú hosi baze hodi fó vitoria absoluta ba ita nia partidu iha eleisaun jeral tinan 2023 to’o tinan 2027”, dehan Marcos hodi hetan basa liman hosi partisipante sira.
Konferensia nasional KTP-CNRT dahuluk nian ne’e ho nia objetivu katak Marcos, hodi hametin estrutura iha baze hodi apoiu Partidu CNRT iha eleisaun parlamentar.
Katak Marcos, KTP sei estabelese estrutura hosi nasionál to’o munisipiu ho nafatin servisu hamutuk ho partidu aliadu CNRT.
Marcos konta, servisu hamutuk ho CNRT hahú ona iha eleisaun prezidensial tinan 2022 ne’ebé liu tiha ona. No sei kontinua iha eleisaun jeral tinan 2023.
Aliende ne’e haktuir Marcos, iha konferensia ne’e rasik sei koalia konaba programa KTP nian. Inklui, fó orientasaun sosializasaun para to’o duni iha baze.
“KTP sei halo programa hodi sosiliza ba iha komunidade sira, hahú hosi Lospalos to’o Oe-cuse hodi apoia partidu CNRT iha eleisaun parlamentar 2023 nian”, katak Marcos.
Iha Fatin hanesan, Prezidente Konselu Diretivu Nasional (CDN-sigla portuges) Partidu CNRT, Dionisio Soares Babo hato’o parabéns ba KTP-CNRT nia esforsu tomak hodi fó vitoria ba CNRT iha eleisaun prezidensial ne’ebé liu tiha ona.
Eis Governante ne’e moos hatutan, estrutura ne’ebé apoiu Partidu CNRT, inklui moos organizasaun massa ne’ebé fó apoiu ba politika partidu CNRT nian ne’e sei servisu hamutuk hodi sai forsa liutan.
Nune’e Dionisio husu ba membru sira ne’ebé halibur aan iha KTP-CNRT ne’e atu tau organizasaun ida ne’ebé iha interese nasional ba dezenvolvimentu povu no rai doben Timor-Leste.
“Liu hosi konferensia ne’e bele haforsa liutan estrutura iha nasional to’o baze. No tau aas interese nasional hodi dezemvolvementu rai laran bele lao ho di’ak,” tenik Dionisio.
Konferensia KTP-CNRT ne’e hala’o durante ida hodi deskute konaba rejimentu, estatutu no moos politika jeral KTP nian
Konferensia ne’e rasik hetan partisipasaun maximu hosi membru KTP hosi munisipiu 13 no moos rejiaun espesial Oe-Cussse. (Asesu Youtube/Facebook Media ONE Timor)
Ita nia komentariu konaba post ne'e.